شبرغان يشوچي سي خدايداد اوچ كون دن بويان اوغلي و جييني ني علاحيده اتاقلرده قرنطين قيلگن.

اوني فرزند و جييني بير يريم ييل آلدين ايشلش اوچون ايران گه كيتگندي. خدايداد نشانه خبر آژانسي بيلن صحبت ده اوغلي و جييني تازه ايران دن قيتيب كيلگني دن خبر بيريب “مين عايله ام و اولكه داشلريم ساغليگي اوچون اولرني ١٤ كونگه چه قرنطين قيلديم و شوني اوچون ايككولريگه علاحيده اتاق آلديم و حاضر اوشه ييرده كون كيچيرماقده لر”ديدي.

خدايداد علاوه ايتي: «كرونا ويروسي نينگ هيچ علامه سي بو ايككي كيشي گه كورينمسدي اما مين احتياط ني نظرده آليب اوز مسوليتيم ني اولكه داشلريم برابريگه ادا قيلديم، هرچند عايله م وآنه سي اولربيلن يقين دن اوچرشيش ني ايسترديلر اما ١٤ كون كوتيشلريز لازم ديب ايتديم.»

اوني مردم گه هم پيامي بار، اگر مردم، اولكه لري و عايله لريني سيوسه لر، ايران دن قيتيب كيلگن قوم وقرينداشلريني قرنطين قيليش لري شرط ديدي.

عيني حالده، جوزجان ساغليك ني سخلش اداره سي مسوللريدن بيري داكتر غلام خالص نشانه خبر آژانسي بيلن صحبت ده. “حاضرگه قدر جوزجان ولايتي ده ٣١٠ عايله ايران دن تازه قيتيب كيلگن يقينلرني قشلاقلرده قرنطين قيلگن و هر كوني قريب ٤٠ كيشي كرونا ويروسي ني يوقتيرگني تشويشي دن كسلخانه گه مراجعه ايتماقده لر”ديب ايتي.

جوزجان ولايتي عامه ساغليك اداره سي شونينگ ديك دولتي اداره لرگه دوا سيپيش كمپايني يولگه قويلگني دن خبر بيريب مردم دن عامه ساغليك وزيرليگي توصيه لريگه جدي اعتبار قرتيش لريني طلب ايتكن لر.