جوزجان ده تورت يوزدن كوپراق قابله و نرس تعليم ني بيتكزديلر
neshananews
20 February 2020جوزجان ولايتي مركزي شبرغان شهريده ٤٣١ قابله و نرس بير خصوصي طبي مركزده تعليم ني بيتكزيشديلر، بولردن ٢٠١ كيشي سي عيال لر بولگن.
شبرغان شهري باشقه منطقه لرگه قرگنده تينچ بولگني و شونينگ ديك فارياب و سرپل ولايت لري و اندخوي تومني آره سيده جايلشكني اوچون هركوني كوپلب بيمارلر دوا لنيش اوچون مراجعه ايتيش لريگه گواه دير.
٢٠١ عيال داخل ٤٣١ قابله و نرس لرني بو تعليمي دوره دن فارغ التحصيل بولگني نه فقط جوزجان ولايتي بلكه قوشني ولايتلر اهالي لري اوچون قونلرلي خبر بولدي.
شبرغان شهريده فعاليت قيله ياتگان خصوصي طبي مركز مسولي شاه محمد احسان گه كوره بو مركزده تعليم ني بيتيرگن ياشلر، عالي نرسينگ، فارمسي، طبي تكنالوژي،قابله ليك و تيش پروتيزي بويچه كيرك بولگن مهارتلرني كسب ايتيب، فارياب، جوزجان، و سرپل ولايت لريده ساغليك ني سخلش خادملرگه بولگن احتياج ني برطرف ايته آله ديلر.
درزاب، خم آب، قرقين و چهارشنغو تومنلري جوزجان ولايتي ني ناتينچ و تاغليك حدودلري ديركه تعليم كورگن طبيات خادملري او ييرده باريب ايشلش گه حاضر بولميديلر اما بو دوره ني بيتكزگن ممناز خانم ديدي:” بيرينچي دن ينگي مهارتني كسب ايتگنيم دن خرسندمن و ايككنچي دن ايش سيز قاليشيم دن خواتيريم بار، اما بونگه قره مسدن بيز اوزاق توشكن منطقه لرگه باريب ايشلشده حاضر ميز چونكه طبابت، چيگره، تيل و قوم و ايل ني تاني مي دي، بيزني اساسي بورچ ميز انسانلر حياتي ني قوتقريش دير”.
عيني حالده جوزجان ولايتي ايريم يشوچيلري اوزاق توشكن منطقه لرده ساغليك ني سخلش خذمتلر يوق ليگي دن شكايت ايتماقده لر.
جوزجان ولايتي عامه ساغليك اداره سي ريسي اورين باسري فريد عزيزي اخبارات واسطه لربيلن صحبتده ديدي:” بخت گه موافق جوزجان ولايتي نينگ برچه ساغليك نب سخلش مركزلري فعال دير و فقط تورت مركزده يول اوزاق ليگي و ناتينچليگي سبب عيال شفاكار يوق ليكن باشقه مركزلرده طبيات خادم لري بار و كيرك بولگن خذمت لر عادي شكلده اهاليگه يتكزيلماقده”.
جوزجان ولايتي ده ساغليك ني سخلش بويچه دولتي مركزلردن علاوه اوچ خصوصي مركزهم فعاليت آليب بارماقده،بو مركزلرده جوزجان قوشني ليگيده جايلشكن ولايت طلبه لري هم تعليم اليشماقده لر.
عزيزي جنابلريني معلوم قيليشيچه جوزجان عامه ساغليك اداره سي طبيات خادملريگه بولگن احتياجي ني شو مركزلرده تعليم كورگن كيشي لردن تامين لشكن.
خصوصي طبيات تعليمي مركزلرده قيزلر عموما نرسينگ، قابله ليك و طبي تكنالوژي ساحه لريده تعليم كوريب و عايله لري هم بو ساحه لرده قيزلري مهارت كسب ايتيش ده رغبت كورستيش لري دقت گه سزاوار.
