جوزجان ده سويتكزيش ني ايككي ترماقي تهداب تاشي قويلدي
neshananews
12 November 2020جوزجان ولايتي محلي رسميلري، بو ولايت نينگ آقچه و خواجه دوكوه تومنلريده اهالي گه ايچيمليك سويتكزيش ايككي پروژه تهداب تاشي قويلگني دن خبر بيرگن.
حوزجان ولايت حاكمي سوزچيسي عبدالمعروف آذر بوكون (پنجشنبه ٢٢عقرب) نشانه خبر آژانسي بيلن صحبت ده بو ايككي پروژه خراجتي اوچ ميليون و سكيز يوز مينگ افغاني، اكتيد دفتري تمانيدن تامين لنگن ديدي. آذر جنابلري جوزجان محلي حكومتي ترقيات پروژه لر قنداي تطبيق ايتيليشي بويچه اكتيد دفتري و باشقه نادولت موسسه لر بيلن همكار دير ديدي.
جوزجان ولايت حاكمي سوزچيسي بو پروژه لر تطبيق ايتيليشي بيلن تورت قشلاق خواجه دوكوه تومنيده و توقيز قشلاق هم آقچه تومنيده ساغلان ايچيمليك سوگه قول تاپه ديلر ديب ايتي.جوزجان ولايتي نينگ بو ايككي تومنيده بو پروژه لر ايشگه توشيريليشي اونداي بيرحالده باشلنگن كه بو ايككي تومن يشوچيلري ساغلان ايچيمليك سو معما و كمچيليگي گه دچار ايديلر.
جوزجان ولايتي ده ايچيمليك سو يوق ليگي و كم چيليگي اوتكن ايگرمه ييل جريانيده محلي حكومت قرشي سيده تورگن مهم معما ايدي.
جوزجان ولايت حاكمي سوزچيسي، محلي حكومت قشلاقلرني رواجلنتيريش اداره سي و باشقه بير قطار نادولت موسسه لر ياردم و همكارليگي بيلن بو ولايت سطحي ده ايچيمليك سو معماسيني برطرف ايتيش ده سعي قيله ياتكاني ني هم تاكيدلشكن.
