جوزجان ولايتي پوليس قوماندان ليگي، بو امنيتي ارگان ده عيال لر حضوري گوپيگني دن خبر بيريب پوليس صفي گه عيال لر قوشليشي گه رغبت كون اوتيشي بيلن آرتيب باريشي ني ايتكن.

 امنيتي ارگانلرده وظيفه بجريش اينگ آغير ايشلردن سنله دي و دنيا ملت لري نينگ عرف و عادت و مدنيتي ده عسكرليك اينگ مقدس وظيفه دير، شو سبب دن ايركك و عيال ياش لر اوز اولكه و ملت لري قدريت لريدن مدافعه ايتيش اوچون پوليس صفي گه قوشيليب خذمت كورسته ديلر.

افغانستان ده دولتي اداره لرده عيال لر قرشي سيده كوپ معمالر تورگن اما عيال لرني پوليس صف گه قوشيليش لري عيال لر خوفسيزليگي ني تامين لش و معمالريني برطرف ايتيش ده اميد لرني كوپيتيرگن.

جوزجان ولايتي امنيه قومانداني سمونيار عبدالواحد وجدان نشانه خبر آژانسي بيلن صحبت ده ايتي:” پوليس قوتلري نينگ بير مهم بوليمي  وظيفه سي ني عيال پوليس لر بجره ديلر.بو وظيفه عمليات لر و جنايتچي لرني توتقين ده آليش جريانيده يعني  اوي لر و عيال لرني تلاشي و تيكشيريش دير، بو مهم وظيفه ني عيال پوليس لر بجريش لري لازم”.

جوزجان پوليس باشليغي گه كوره پوليس نينگ هر بير ايشي عيال پوليس بولمگنده ناقص دير.

اوتكن بير ييل جريانيده جوزجان ده عيال لرني پوليس صفي گه قوشيليش گه رغبت لري آرتكن، بو توغريده وجدان جنابلري ” حتي عايله لر اوز رغبت لري بيلن قيزلريني پوليس صفي گه قوشليش ده ترغيب ايته ديلر” ديدي.

حاضرچه جوزجان ده بيرقطار دولتي اداره لردن علاوه خصوصي بانك لرده هم مراجعه ايتوچي عيال لرني تيكشيريش اوچون عيال پوليس لر وظيفه بجره ديلر.

جوزجان امنيه قومانداني ديدي:” اوتميش ده بيزنينگ ييريك معما ميز شو ايدي كه عيال پوليس بولمگنده تحقيق جريانيده عيال لر اوز خصوصي معما و قيينت چليك لريني ايركك پوليس لرگه ايته آلمسديلر اما حاضر بو معما برطرف ايتيلگن”.

جاري ييل ده قريب ٧٠ عيال پوليس جوزجان امنيه قوماندان ايگي ني تورلي بوليم لريده وظيفه بجره ديلر و اوتكن ييل گه قركنده بو رقم ٥٠ فايز كوپيگن.

وجدان جناب لري پوليس صفي گه قوشليش گه رغبت لري بولگن عيال لرگه خوش خبر بيريب ايتي:” بيز حاضر بير لايحه اوستيده ايش آليب باراتيك كه اداري و دفتري ايش لر برچه سي ني عيال پوليس لرگه تاپشيرماقچي ميز و بوندن مقصدميز تحصيل قيلگن عيال لرگه ايش زمينه سي ني مساعد ايتيش دير”.

جوزجان امنيه قومانداني بو صحبت يكونيده بيز عيال پوليس لر بيلن يان مه يان اولكه ميزده خذمت قيليش دن فخرلنه ميز ديب ايتي.

بوندن اون ييل آلدين جوزجان پوليسي صفي ده عيال لر حضوري قول برماق لري ساني دن آشمسدي، اما ايندي ليكده عيال لر ساني بو امنيتي ارگان ده كوزگه كورنرليچه ارتب بارگن.

بوندن نيچه كون الدين نشانه خبر آژانسي لمري ساتنمن نجيبه نور بيلن – جسور پوليس- عنواني بيلن بير راپور نشر ايتي، جوزجان يشوچي لري و خصوصا جوزجان ليك قيز و عيال لر اوني قيزيق آلقيشلديلر.

جوزجان يشوچي سي و ١٢ نچي صنف ني بيتيرگن سميرا عزيزي ديدي:” نجيبه صحبتي و حياتي حكايه سيني اوقيگن دن سونگ، قيز ايكن ليگيم گه فخر لندم و پوليس صفي گه قوشيليش گه رغبتم تاباره آشدي”.

جوزجان ده عيال پوليس لر قنداي ايش لرني بجريشي دن باخبر بوليش اوچون دريم ساتنمن ناجيه بيلن همصحبت بولديك، او جوزجان امنيه قوماندان ليگي جنايي ايشلرگه قرشي كورش اداره سيده خذمت قيله دي. بير ييل آلدين پوليس صفي گه قوشيلگن ناجيه، افغانستان درد كورگن مملكت و عيال لري هم بي حد عذاب چيكن قتلم بولگني ني اورته گه قويب پوليس صفي گه قوشيلگنيم دن مقصد عيال لر، ايركك لرگه ايته المه ياتگان معما و قيينت چليك لريني عيالر بيلن اورته گه قويش اوچون زمينه مساعد ايتيش دير،بيز وطنداشلري ميز گه خذمت كورستيش دن بي حد قوانه ميز ديدي ناجيه.

حاضر جوزجان امنيه قوماندان ليگي ده عيال پوليس لر عموماجنايي، اداري بوليم لر و عيال لر مراحعه ايتوچي لرني تيكشيريش ساحه سيده وظيفه بحرب و انده سنده عيال پوليس لر گه صرورت سيزيله ياتگان پوليس عمليات لريده هم قتنشيب حصه قوشه ديلر.