جوزجان مرکزی شبرغان شهریده بیرقطار سوداگر عیاللر بو ولایت نینگ خبر و مدنیت اداره سی صحنی ده عیاللر قول صناعتی بازارچه سی نی ایجاد ایتکنلر. بو سوداگرلرگه کوره بو تشبث «ابرهام لینکن» تعلیمی مرکزی حمایتی بیلن یولگه قویلگن و اوندن مقصد عیاللر قول صناعتی محصولاتی نی نمایش و ساتیش بولگن.

عیاللر قول صنعتی بازارچه سی نی ایجاد ایتکن و لینکن تعلیمی مرکزی اورین باسری ملالی مبارز نشانه خبر آژانسی بیلن صحبت ده دیدی صلح مذاکره لری باشلنیشی مناسبتی بیلن بو بازارچه جوزجان ولایتی ده ایجاد بولگن. خانم مبارز علاوه ایتی:« جوزجان ده کوپلب عیاللرقول صنعتی ساحه سیده خصوصا بکس تیکیش، خیاط لیک، مینچاق تیکیش و قرص تیکیش ده فعال دیرلر.» اونگه کوره جوزجان عیاللری قول صناعت محصولاتی برچه اهالی گه نمایش ایتیریلیشی لازم. او بوندای بازارچه لر باشقه منطقه لرده کیله جک کون لرده هم ایجاد ایتیلیشی دن خبر بیردی. لینکن تعلیمی مرکزی اورین باسری، بوندای بازارچه لر ایجاد ایتیلشی عیاللر اقتصادی فعالیت لری رواجلنیشی ده مثبی تاثیر قالدیریشی نی تاکیدلب بو ندای برنامه لر یولگه قویلیشی دولتی و نادولت ارگان لر او عیال سوداگر لر را کوبریک رولی نی اوینه آله دی دیب ایتی.

بونگه قوشیمچه بو بازارچه ده ناگران قیزلر قول صناعت محصولاتی نمایش ایتیریلگن. جوزجان ولایتی « پیروزی همکارلیک و کوچلنتیریش» مرکزی مسوولی سمیرا ملک‌یار دیدی بیرقطار ناگران قیزلر ایشلب چیقارگن قول صناعتلری محصولاتی نی بو بازارده نمایشگه قویلگن لر.اونی معلوم قیلشیچه ناگران قیزلرهم باشقه قیزلردیک قول صنعتی بویچه یخشی مهارت لرگه ایگه دیرلر.خانم ملک‌یار بو بازارچه نی یولگه قویگن موسسه لردن اینگ آز آیی بیر مراتبه بوندای بازارچه بو ولایت ده یولگه قویلیشی نی طلب ایتی.

عینی حالده بو بازارچه ده شاگردلری ایشلب چیقارگن محصولاتی نی نمایش گه قویگن بکس تیکیش استادی خانم سهیلا دیدی جوزجان ده کوپلب قیزلر باله لر و مکتب بکس لرینی تیکیش نی اورگنیب آلگنلر. اونی معلوم قیلیشیچه اونی شاگردلری توقیزآی لیک تعلیمات دن سونگ بکس تیکیش نی اورگنه دیلر. خانم سهیلا علاوه ایتی بیز مکتب بکس لرینی ایشلب چیقاریش ده جوزجان ولایتی ایچکی ضرورتی نی قاندریش ده قابلیت و امکانیت میز بار. اما جوزجان ولایتی ده ایچکی محصولات گه اهالی دقت اعتباری آز لیگی سبب صنعتکار عیاللر بیرقطار معما و قیینتچلیک لرگه دچار دیر لر.

عیاللر قول صنعتی بازارچه سیده اینگ آز ۲۰ سوداگر عیال نینگ محصولات لری نمایش گه قویلگن. بوندای بازارچه لر کیله سی کونلرده هم شبرغان شهری نینگ باشقه بیرقطار منطقه لریدن یولگه قویلماقچی.