جوزجان ولايتي محلي رسميلري، كروناويروسي بويچه مردم گه معلومات يتكزيش اوچون بيرقطار محلي رسانه لر محلي حكومت گه بيرگن وعده لريگه وفا قيلمگني تاكيدلشكن. رسميلرگه محلي حكومت، خبر و مدنيت اداره سي باشچيليگيده بولگن كروناگه قرشي كورش كميته سي و محلي رسانه لر ارا امضالنكن اوچ تمان له شرطنامه گه كوره بير قطار راديولر اوتكن بير آي مدتيده محلي حكومت، مدني فعاللر و دين عالم لري اشتراكي بيلن تورت دوره بحث لريني تيارلب نشرايتيش ني وعده قيلگنديلر اما بو رسانه لردن بيرقنچه سي بو شرطنامه گه مطابق عمل قيلمگن.

جوزجان ولايتي خبر و مدنيت اداره سي ريسي عظيم الله رحمانيار نشانه خبر آژانسي بيلن صحبت ده ديدي:” بير آي آلدين محلي حكومت خصوصا خبر و مدنيت اداره سي مردم گه كرونا ويروسي حقيده كوپراق معلومات يتكزيش اوچون ٩ راديو بيلن معلومات يتكزيش پياملر و تورت دوره ميز تيارلب نشر ايتيشي بويچه شرطنامه گه قول قويدي.” رحمانيار جنابلري بيرقطار راديو لر لو توغريده هيچقنداي دوره بحث نظر قيلمگن ديب حالانكه بو شرطنامه پولي بو رسانه لر بانكي حسابلريگه انتقال تاپكن ديدي.

هرچند بو شرطنامه گه كوره راديولر مسوللري تبليغاتي تيزرلرني نشر ايتيش دن سونگ كرونا گه قرشي كورش كميته گه بجرگن ايشلريدن راپور بيريش لري قيد ايتيلگندي اما جوزجان ولايتي خبر و مدنيت اداره سي ريسي ديدي بير آي ليك  قرارداد دن سونگ تورت راديو دن هيچقنداي راپور قولگه كيريتمگن ميز. حالانكه اونگه كوره بو رسانه لر مسوللري دوره صحبت و تبلغاتي تيزرلر قيسي ساعت ده نشر ايتيليشي دستوريني با اداره بيلن شريك قيليش لري شرط ايدي.رحمانيارجنابلري بو رسانه لر شرطنامه گه موافق عمل قيلمگنلريني تيگيشلي ارگانلر تمانيدن ايزلنيشي دن آگاهلنتيرگن.

عيني حالده جوزجان ولايت حاكمي سوزچيسي معروف آذر ديدي اوچ تمان له مه شرطنامه گه اساسا” بو تبليغاتي نشرات پولي ولايت خاكم ليگي تمانيدن بو رسانه لر حساب لريگه انتقال بيريلدي و رسانه لر مسوللري بجرگن ايشلري راپوريني ني ولايت حاكم ليگي تاپشيريش لري شرط اما حاضرگه قدر بو ايش ني قيلمگنلر.آذرجنابلري تاكيدلشدي مين مركزگه راپور بيره ياتكان مسول اوله راق حاضرگه قدر بيش راديو دن راپور قولگه كيريتكنيم يوق. او علاوه ايتي راديو لر امضالنگن شرطنامه وقتي اوچ كون آلدين تمام بولگن و بوموضوع ني نيچه بار ايزله گندن سونگ بيرقطار رسانه لر راپورلرني ولايت حاكيم ليگي يوبارگن.

اوني معلوم قيليشيچه راديو وتلويزيون لر بيلن توغريده امضالنگن شرطنامه مبلغي ٧ يوز و ٢٢ مينگ و ٥٠٠ افغاني ايدي كه بو اره دن ٦ راديو هيچقنداي دوره صحبت نشر ايتمگن.

باشقه تماندن بير محلي راديو مسولي فواد سرايش نشانه خبر آژانسي بيلن صحبت ده بو اوچ تمان له مه شرطنامه قنداي امضالنيشي حقيده ديدي:” شرطنامه گه مطابق، ٢٠ مينگ افغاني تبليغاتي تيزرلر نشري و ٢٢ مينگ افغاني هم تورت دوره صحبت نشري گه اجرتيلگندي.” او علاوه ايتي شرطنامه گه مطابق هر رسانه علاحيده دوره صحبتلرني تيارلب نشرايتيشي لازم ايدي اما رسانه لر خبر و مدنيت اداره سي بيلن كيليشيب استديولرده ادملر توپلنيشي آلدي آلينيشي اوچون بير تلويزيون و بير راديو بو دوره صحبت ني تيارلب وبرچه رسانه لر بو دوره صحبت ني نشر ايتسينلر. سرايش جنابلري بير دوره صحبت بيزني رسانه ميزده اوتكزيلدي و و باشقه رسانه لر تيارلشكن اوچ دوره صحبت ني نشر ايتكن ميزديدي.

عيني دمده بيرمحلي راديو باشليغي محبوب مهران ديدي رسانه لر ارا كيليشو گه مطابق بير دوره صحبت ني راديو لر مشترك طرزده نشر ايتيلر و اوني رسانه سي هم شو ايش ني بجرگن. مهران حنابلري علاوه ايتي مين تبيلغاتي تيزرلر و دروه صحبتلرني نشر ايتكن دن سونگ خبر ومدنيت اداره سيگه راپور يوباركن ايلك رسانه لر جمله سيدن ايديم. مهران جنابلريگه كوره خبر ومدنيت اداره سي بيلن كيليشوگه اساسا تورت دوره صحبت ني باشقه رسانه لردن آليب نشرايتكن.

اما شرطنامه دن ايري كيليشو موضوع سيني خبر و مدنيت اداره سي باشليغيرد ايتيب و بو ايش ني توشينموچيليك ديب ايتي. بو اداره ريسي ديدي كيله جكده شرطنامه گه موافق عمل قيلمگن رسانه لر بيلن شرطنامه لرني امضالشده باشقچه عمل قيله ميز ديدي.

جوزجان ولايتي ده ٧ يوز مينگ افغاني خراجت كوتارگن بو تبليغاتي ايشلر بولگني بيلن هلي هم جوزجان ولايتي يشوچيلرييغين لر و گوجوم مراسم و توي و تماشالر اوتكزيشي دن قول تارتمگن لر.