“كرونايي وضعيت ده شاشلينچ جوابگرليك” عنواني بيلن قشلاق لرني رواجلنتيريش اداره سي تمانيدن ميثاق شهروندي برنامه سي دايره سيده حاجتمند كيشي لرگه نقد پول و ييمليك اشياترقتيليش دستوري بوكون جوزجان ولايتي ده باشلندي. قشلاقلرتي رواجلنتيريش اداره سي مسوللريگه كوره شبرغان شهري نينگ ١٣٤قشلاقي و فيض إباد تومني نينگ ٦٨ قشلاقيده بيرقطار حاجتمند عايله لر بو ياردملرني قولگه كيرته ديلر.

جوزجان ولايتي قشلاقلرني رواجلنتيريش اداره سي ريسي محمديوسف سعيد اوتكن كوني( يك شنبه ٢٨ جوزا) نشانه خبر آژانسي بيلن صحبت ده ديدي جوزجان ولايتي ده كرونايي وضعيت ده شاشيلينچ جوابگرليك دستوري باشلنگن و بيرينچي باسقيچ ده جوزجان نينگ ايككي قشلاقيده ٤٩ عايله گه ٣٠٦٠ افغاني گه تينگ ييمليك اشيا و ٢٥٩ عايله گه نقد پول ترقتيلدي.

سعيد جنابلري علاوه ايتي بو ياردملر ميثاق شهروندي دستوري بودجه سيدن اهالي گه ترقتيلگن. اونگه كوره بو دستور آرقلي ٤٠ مينگ عايله گه شو ياردملر ترقتيليشي نظرده آلينگن.نقدي ياردم قولگه كيريته ياتكان عايله لر  دولت حمايتي ني فايده لي و ضروري ديب ايتماقده لر. شبرغان يشوچي سي شير محمد بو ياردم لرني قول تاپكن بير كمبغل عايله سرپرستي دير. او ديدي “قرنطينه وضعيتي برچه ني خانه نشين قيلگن و حتي مردم گه يوز افغاني هم ياردم بولسه دقت گه سزاور دير.” او كارخانه لر ايشي توختتيلگني و ماركيت لر تعطيل بولگني مردم اقتصاديكه سل بي تاثير قالديرگن و حاضر مردم اوز كونده ليك روزغارلريني اوتكزيش ده كوپ قينلماقده لر ديدي.

ياردم لرني ترقتيش وقتيده كرونا ويروسي ييرليشي دن تشويش لر هم كوپيگن.اكثرحال لرده اجتماعي مسافه نظرده توتيلمي دي و ساغليك ني سقلش توصيه لر عملي بولميدي. جوزجان عامه ساغليك اداره سي بو ياردملر ترقليشي وقتيده اجتماعي مسافه ني نظر توتيش و نقاب دن فايده لنيش رعايه ايتيليشي ني تاكيدليدي.جوزجانه عامه ساغليك اداره سي سرپرستي الوغ بيك ديدي:” جمهورريس ايككنچي اورين باسرليگي قراريگه مطابق و عامه ساغليك وزيرليگي توصيه لريگه اساسا بيو يغين ده اون كيشي دن كوپ راق اشتراك ايتمس ليگي لازم.” او علاوه ايتي جوزجان عامه ساغليك اداره سي بو ولايت يشوچيلري ني كرونا ويروسي خطرلريدن آگاهلنتيرگن.

عيني حالده جوزجان ولايتي قشلاقلرني رواجلنتيريش اداره سي مسوللري بو ياردم لرني ترقتيش زمانيده ساغليك ني سقلش توصيه لر رعايه ايتيليشي دن ايشانچ بيلديرگن.جوزجان ولايتي قشلاق لرني رواجلنتيريش اداره سي تمانيدن كمبغل اهالي گه ياردملر ترقليشي اونداي بير حال ده باشلنگن كه شهرلر قرنطينه سي كيله سي اوچ آي گه چه اوزيتيريلگن.

جمهورريس ايككنچي اورين باسرليگي مطبوعات دفتري ” كرونا اوجي ده كسب و كار انتظامي لايحه سي” اوتكن كوني دن برچه شهرلرده باشلندي. بو لايحه گه اساسا”دوكانلر، اداره لر و نادولت صنف لر جاري بولگن قيودات لرگه مطابق فعاليت قيليشه ده حقلي ديرلر، اما جاري بولگن قيودات بازار سابق حالت ده قيتيش معناسيده ايمس.