جوزجان ده ٩٦ سبزوات خانه لري ايجاد بولگن
neshananews
23 August 2020جوزجان ولايتي زراعت و چاروادارليك اداره سي، اوتكن اوچ ييل جريانيده بو ولايت نينگ اوچ تومني و اونبيش قشلاقيده عيال و ايركك دهقان لرگه ٩٦ گرين هاوس يا سبزوات اوستيريش خانه لري ايجاد بولگني دن خبر بيرگن. مسووللر بو خانه لر اهالي ني اطراف محيط و اقليم اوزگريشي اوچون موافق لشتيريش مقصديده ايجاد ايتيلگني ني اورغولشكن. جوزجان ولايتي زراعت اداره سي مسوولريگه كوره خواجه دوكوه، فيض آباد و خانقا تومنلري ” اقليم اوزگريشي خطرلرني كميتيريش” دستوري ريجه سيده كيريتيلگن ديب ايتكن.
اقليم اوزگريشي سبب خطرلرني كميتيريش دستوري مسولي محمد حليم دانش يار نشانه خبر آژانسي بيلن صحبت ده ديدي بو دستور (UNDP)، اطراف محيط ني سقلش خلق ارا تشكيلاتي و زراعت و چاروادارليك وزيرليگي همكارليگي بيلن تطبيق ايتيلماقده. دانش يار جنابلريگه كوره اقليم اوزگريشي خطرلريني كميتيريش دستوري ١٣٩٦ نچي ييل دن باشلنيب ١٤٠٠ شمسي ييل اورته لريگه چه دوام تاپه دي.
محمد حليم دانش يار علاوه ايتي بو دستور آرقلي ٤٦ عيال دهقان گه ٦٠ متر مربع و ٥٠ ايركك دهقانلرگه حاضرگه قدر ٣٠١ مترمربع گرين هاوس تيارلنگن. اوني معلوماتيگه كوره بو سبزخانه دهقانچيليك اوچون سو كمچيليگي بولگن منطقه لرده ايجاد بوليب و حاضرگه چه يخشي نتيجه بيرگن.دانش يار جنابلري، دهقان لر تورلي موسوملرده تورلي سبزوات ني بو يشيل خانه لرده اوستيريب حاصل آله ديلر ديدي. پمه دور، كاهو، بادرنگ و الويرا بو سبزخانه ارده يتيشتيريله ياتكان سبزوات و اوسيمليك لردن عبارت دير.
عيني حالده خانقا تومن حاكمي محب الله، بو تومنده زراعت و چاروادارليك اداره سي تمانيدن عيال دهقان لرگه ٤٠ سبزخانه ايجاد بولگني دن خبر بيريب اوزاق توشكن قشلاقلرده بو خانه لر ايجاد ايتيلگني عيال دهقانلر درآمديني كوتارگن ديدي.
جوزجان ولايتي خانقا تومني دهقانلريدن بيري گلالي رحيمي، نشانه خبر آژانسي بيلن صحبت ده ديدي:” گرين هاوس يخشي ليگي شونده كه بيز هر موسوم نينگ سبزواتي ني هر موسوم ده ايكيب حاصل آله بيله ميز.” بو عيال دهقان علاوه ايتي دهقان سو كم چيليگي بيلن بو يشيل خانه لرده تورلي خيل سبزوات ايكيب يخيشي حاصل قولگه كيلتيره آله ديلر.
هرچند جوزجان ولايتي آمو دريا قرغاغيده جايلشكن اما بو ولايت دهقانلري دايم سو كمچيليگي دن شكايت ايتماقده لر. دهقان سونگي ييل لرده بو توغريده نيچه بار محلي رسميلرگه بو درك دن شكايت تاپشيرگنلر اما حاضرگه قزر آمو دريا دن سو كانال لريني ايجاد ايتيش دستوري عمل گه آشمي قالكن.
نيچه وقت آلدين جوزجان ولايت حاكمي اورين باسري عبدالقادر ماليه ولايت اهالي سيگه يقبن كيله جكده امودريا دن جوزجان ولايتي ايكنزارلري تمان سو كانال لري تارتيليشي دن سوز بيرگندي ليكن حاضرگه قدر بو دستور عمل گه آشمگن.
