جوزجان ولایتی عالی اوقویورتی مسووللریگه کوره جاری شمسی ییل کانکور سیناویده بو ولایت ده سیناوده قتنشکنلردن ۵۱ فایزی قیزلر بولگن. رسمیلر معلومات لرگه کوره جاری ییل کانکور سیناویده التی مینگ دن کوپراق طلبه لر اشتراک ایتکندی.
جوزجان ولایتی عالی اوقویورتی ریسی مسعود حق بین بوکون ( نشانه خبرآژانسی بیلن صحبت ده دیدی جوزجان ولایتی مملکت بویلب کانکور سیناویده قیزلر کوپ اشتراک ایتکن ولایت دیر.
بوییل کانکورسیناوی اوتکن ییل لر دیک جوزجان ولایتی عالی اوقویورتی صحنیده اوتکزیلدی. بو سیناودن نظارت قلیش اوچون عالی اوقویورتی وزیرلیگی دن ۲۹ کیشی لیک هیات اشتراک ایتکندی.
جوزجان ولایتی عالی اقویورتی مسووللری دیدی حاضرچه بو عالی اوقویورتیده بوتون افغانستان دن یتی مینگ طلبه درس اوقیدی. موجود معلومات لرگه کوره جوزجان ولایتی عالی اوقویورتی طلبه لریدن ۴۰ فایزی قیزلردیر. جاری شمسی ییل ده جوزجان عالی اوقویورتی ایککی مینگ و ۵۰۰ طلبه نی جذب ایتیش قابلیتی گه ایگه دیر.
جوزجان ولایتی عالی اوقویورتی معلوماتیکه گه اساسا” ۱۳۹۴ ییل ده حاضرگه قدر جوزجان ده هر ییل اوتیشی بیلن کانکور اشتراکچی لری کوپیب بارماقده. اوتکن ییلی قریب تورت مینگ و ۶۰۰ طلبه جوزجان ده کانکور سیناویگه اشتراک ایتکندی..
جوزجان ولایتی ده آلتی مینگ طلبه اوندای بیر حالده یخشی کیله جک امیدی بیلن کانکور سیناویده قتنشکن که هرییلی مملکت عالی اوقویورتی دن فارغ بولگن یاش لر وظیفه تاپمسلیگی دن قینلماقده لر. دولت حاضرگه قدر ایشسیزلیک معماسینی توله برطرف ایتیش ده هم موفق بوله آلمگن.