جوزجان ولایتی ده نیچه ییل دن بویان یلدا کیچه سی دن بیر مدنی عنعنه اوله راق نشان لنیب کیلماقده. شبرغان شهریده مدنیت خادملری، خبرنگارلر و مدنی فعاللر تورلی خیل احتفال و دستورلر بیلن بو عنعنه دن اوتکزیلشی دن میزبان لیک قیله دیلر. بو ولایت یشوچیلری یلدا کیچه سیده اناز و تربوز کبی میوه لر بیلن بو کیچه نی قیزیق نشانلب و یاشلر ایسه موسیقی و شعر و حکایه خوان لیک و حافظ دیوانی دن فال کوریب ییل نینگ اینگ اوزون کیچه سی بیلن خیر لشه دیلر.

رسانه فعالریدن بولگن نیلا صادق اوغلو شبرغان ده یلدا کیچه سی اوچون مخصوص بیر احتفال یولگه قویگن. او نشانه خبر آژانسی بیلن صحبت ده دیدی اون ییل آلدین گه چه بو شهر ده یلدا کیچه سی نی نشانلش اوچون هیچقندای احتفال و دستور یولگه قویلمسدی. عانم صادق اوغلو اوتکن بیش آلتی ییل دن بویان مدنیت خادملری، خبرنگارلر و مدنی فعاللر تمانیدن یلدا کیچه سی نی نشانلش اوچون تورلی خیل برنامه و احتفاللر اوتکزیلماقده دیدی.

نیلا صادق اوغلو شبرغان شهریده بیرقطار شاعرلر، یازوچی لر، مدنی فعاللر و خبرنگارلرنی بیر ییرگه دعوت ایتیب یلدا کیچه سی نی نشانلش اوچون طنطنه لی احتفال یولگه قویگن. خانم صادق اوغلوگه کوره جوزجان یشوچیلری یلدا کیچه سی نی بیر مدنی عنعنه اوله راق نشان لیدیلر دیب ایتی. بو احتفال موسیقی و شعر وشیرین قوشیق لر بیلن قیزیق اوتکزیلدی.

جوزجان لیک یاش و مدنی فعال عبدالمعروف آذر یلدا کیچه سیده اوچ احتفال ده اشتراک ایتکن. او بو احتفاللرده قتنشکنی دن خرسندلیک بیلدیریب بوندای احتفال لر یولگه قویلیشی مردم نی تینچلیک و بیردم و اتفاق گه اوندب تورلی قوم و قتلم لر ارا مهر و محبت نی قوللب قوتلشه دی دیدی. آذر جنابلری بو اوچ احتفال ده عیاللر و ایرکک لر هیچقندای جنسیتی تبعیض  کمستیش لرگه قره می بیربیرلریگه شعر اوقیب حکایه اوقیشدیلر دیب تاکیدلشدی.

باشقه تماندن جوزجان ولایتی خبرنگارلریدن بیری فریده امینی گه کوره یلدا کیچه سی در حقیقت حکایه ایتیش و حافظ خوانلیک کیچه سی دیر. او کیله سی ییل ده یلدا کیچه سی نی کتته راق احتفال آرقلی نشانلشده قرار آلگنی نی ایتی.

جاری ییلده یلدا کیچه سی هرات، بلخ و کابل کبی ولایت لرده اوتکن ییل لرگه قرگنده کتته راق وطنطنه لی راق اوتکزیلگنی ایتلگن. افغانستان خبر و مدنیت وزیرلیگی هم یلدا کیچه سی نی نشانلش اوچون مخصوص بیر احتفال اوتکزگن.

ییل نینگ اینگ اوزون کیجه سی یلدا دیر. بو کیچه دن سونگ قیش موسومی باشلنه دی. بو عنعنه افغانستان دن تشقری مرکزی اسیا مملکت لری، ایران، آذربایجان و ترکیه مملکت لریده هم کینگ نشان لنه دی. یلدا کیچه سی نوروز عنعنه سی کبی نیچه ملت لر مدنی میراثی حساب لنه دی.