شبهه سيز محبس اوته دلگير جاي و اوني باشي اسمان گه يتكن چهارديوارلري، انفرادي تورمه لري و تيمير ميله لر بيلن اورب آلينگن اتاق لري، قصدا”يا سهوا” جرم و جنايت گه قول اورگن شخصلرني ييللرچه يشش محلي بولگن.اكثر محبوس لر بو آغير احوال و شرايط ني چيده آلمي مخدره ماده لرگه يوزكيلتيريش گه مجبور بوليب ويا هم بونداي احوال ده زوروانليك و جنجال قيليش دن هم ايه ميدير.

افغانستان حكومتي محبوسلر باشيني قيزيقتيريش اوچون محبس لرده كتابخوانليك مدنيتي ني رواجلنتيريش ده قرار آلدي، بو قراردن مقصد محبوسلر وقتي ني بوشليك دن قوتقريش و حبس دن قويب يوباريلگن دن سونگ حيات لريده جدي اوزگريشلر يوزگه كيليشي و نهايت ده اولكه ده بير مثبي و فايده لي آدم بوليشي دن عبارت دير.

جوزجان ولايتي قماقخانه سيده يقين كونلرده بير كتابخانه ايجاد بولگن و هر كون اونلب محبوس كتاب مطالعه سي بيلن وقتلريني كتاب مطالعه سي بيلن اوتكزه ديلر.

بو وضعيت ني يقين دن كوزتيش اوچون نشانه آژانسي خبرنگاري محبس ده باريب بو حقده قماقخانه مسولي و محبوس لر بيلن صحبتلشكن.

جوزجان ولايتي مركزي محبسي باشليغي سمنوال محمدنبي متين تورمه ده ايجاد بولگن كتب خانه حقيده ايتي:” بيز بيرينچي دن محبس ده تورت يوز توم كتاب بيلن كتب خانه ني ايجاد ايتديك و جوزجان قاره لوچي اداره سي هم٥٦٠ توم كتاب ني محبس كتب خانه سيگه ساوغه بيردي. حاصر بير يخشي كتب خانه گه ايگه بولگن ميز”.

متين جناب لري محبس ني تعليم جايي اتب ” هركوني قريب يوز محبوس كتاب ايزلب كيله دي و كتاب ني اوز اتاقلريگه آليب باريب مطالعه قيله ديلر” ديدي.

بوندن نيچه وقت آلدين افغانستان ايچكي ايشلر وزيرليگي محبسلرده كتابخوانليك لايحه سي تيارلنگني دن خبر بيريب اونگه اساسا” اگر بير محبوس يوز صحيفه لي بير كتاب ني اوقيب كتاب حقيده اون دقيقه معلومات بيره آلسه آلتي كون حبس مدتي دن كميه دي ديب اعلان قيلدي.

سمنوال متين گه كوره” محبس ده كتب خانه ايحاد بولگني و محبوسلرني كتابگه قيزيقيش لري كوپيگني دن سونگ محبس فضاسي بوتكل اوزگرگن و هر محبوس اوز ايشي بيلن بند و كون اوتيشي بيلن محبس ده مثبي اوزگريشلرگه گواه ميز”.

جوزجان محبسي كتب خانه سيده يوزلب توم تورلي خيل كتاب لر موجود. محبوس لر كتب خانه گه كيليب استه گن كتابلريني تاپيب اله دير.بير كتاب ني اوقيش اوچون تن آلگن محبوس بيلن صحبت لشماقچي ميز، او اوزيني بونداي تانيشتيردي:” عبدالرحمن قاسمي من، التي ييل دن بيري محبس ده من”. او كتب خانه حقيده ايتي:” اوتميش ده بو قماقخانه ده كتب خانه بوق ايدي و بيز انده سنده محبوس لر ارا جنجل لر و توقنشولرگه كواه ايديك، اما كتب خانه ايجاد بولگني و محبس ده باشقه تعليمي دوره لر يولگه قويليشي دن بويان برچه محبوس لر كتاب اوقيش و سواد اورگنيش گه قيزيقن لر”.

آلتي ييل الدين عبدالرحمن حبس بولگني ده سواد سيز ايدي اما محبس ده  ايسه سواد اورگنيب ايندي اون نيچي صنف ده هم درس اوقيدي. او ، محبس ده سواد اورگن گندن سونگ تورتينچي صنف گه كيرديم و حاضر اون نيچي صنف ده درس اوقيب هرقنداي كتاب ني مطالعه قيله آله من و كتاب مطالعه سيني باشله گنيم دن بيري ايام قنداي اوتيشي ني بيلمي من و حاضرچه ليك سواد اورگن گنيم دن جوده خرسند من ديدي عبدالرحمن.

بخت گه قرشي افغانستان ده كتاب اوقيش مدنيتي يخشي رواجلنمگن و فقط افغانستان نينگ كتته شهرلريده كتاب ساتوچي مركزلر بار و شونينگ ديك تازه ليكده چاپ و نشر بولگن كتاب لر باشقه شهرلرده تاپيلمي دي.

محمد يونس هم آلتي ييل دن بيري محبوس دير، اوحاضر” عدالت” ناملنگن كتاب ني اوقيماقده، او ،بو ايككي يوز صحيفه لي كتاب مطاله سيني بير هفته آلدين باشله گن. او هم نشانه خبر آژانسي گه ايتي:”بير آي دن بيري كتاب اوقيش گه قيزيقديم عدالت ناملي بو كتاب ني بيرينچي تومي ني اوقيب تمام قيلديم،و حاضر ايككنچي جلدي ني اوقيمن، محبس ده خياط ليك ني اورگنگن دن علاوه مطالعه هم قيله من”.

افغانستان محبس لريده كتابخوان ليك مدنيتي ني رواجلنتيريش ، اوزاق مدت لرده مبثي نتيجه بيره ياتگان ايشلر جمله سيدن دير كه افغانستان دولتي بوني عملي قيلماقده.كوزه توچيلر دولت نينگ بو تشبثي ني آلقيشلب محبس كتب خانه لريده قنداي كتب لر نظرده النيشي خصوصا محبوسلر فكر و انديشه لريني مثبي تمان اوزگرتيريش ده حصه قوشه ياتكان كتاب لر بوليشي ني مهم ديب اورغوليديلر.

جوزجان محبسي ده ٥٦٣ محبوس سخلنه دي ، بولردن ٢٩ كيشي سي عيال لر بولگن.