حج و اوقاف وزیری نینگ مولوی انصاري نینگ سۉزلریگه مناسبتی؛ دشمن بیلن همکارلیک قیلهدیگن عالمنی محبسده تشلش کېرهک
حج و اوقاف وزیری محمد قاسم حلیمي مولوی مجیبالرحمان انصاری نینگ هراتده ایتگن سۉزلریگه مناسبت بیلدیریب اېتکن، طالبان فایدهسیگه وعظ قیلهیاتگن دیني علمالرنی قماققه آلینیشی کېرهک.
جناب حلیمي بوگون ( شنبه ۹ اسد) کابلدهگی مطبوعات انجمنیده مولوی انصاري نینگ سۉزلریگه مناسبت بیلدیردی. هرات کازرگاه مسجدی امام-خطیبی مولوی مجیبالرحمان انصاري کېچه جمعه نمازیده وعظ قیلگنیده ایتکن، طالبلر اگر برحق دیر هرات شهرینی اۉز نظارتی آستیگه آلیشلری کېرهک. اوّلراق، او هراتدهگی باشقه بیر قطار دین عالملری بیلن کېلیشگن حالده “جمعیت اسلامي” حزبی نینگ نفوذلی رهبری امیر محمد اسماعیلخاننی طالبانگه قرشی کورهشدن تيیلیشگه چقیرگن اېدی.
جناب حلیمی بو سۉزلرگه جوابن، مولوی انصارينی یاللنووچی و چېت اېلّیکلر نینگ قلی اتب و طالباندن قۉرقیب بو گروه منفعتی گه ترغیب قیله باشلهگنینی ایتکن. اونینگ تأکیدلشیچه، خوفسیزلیک ادارهلری طالبان منفعتیگه ترغیبات قیلگن هر بیر دین عالمیني قماقه سالیشی کېرهک.
حج و اوقاف وزیری، مملکتدهگی حاضرگی اوروشنی افغان خلقیگه قرشی پاکستان تمانیدن باشقریلهیاتگان اوروش دېب اتهگن. شونینگدېک، او پاکستان دین عالِملری دن، پاکستان حکومتی نینگ افغانستان خلقیگه قرشی اوروشنی دوام اېتتیریشینی تاختهتیشگه چقیرگن.
آخرگی اوچ آی ایچیده طالبان مملکت نینگ اکثریت ولایتلریده هجوملرینی کوچهیتیریب، مملکت شِمالی و غربیدهگی اۉنلب تومنلرنی اېگهللب آلدی. گروه هجوملری نینگ کوچهییشیگه جوابن، مملکت نینگ تورلی حدودلریده خلق مقاومتی شکللندی و جهادی رهبرلر، خوفسیزلیک کوچلرینی قۉللب -قوّتلشینی اعلان قیلیشدی.