دانش: دولت و طالبان نماینده‌لری ارا دوحه‌ده اوتکزیلگن سونگگی اوچره‌شوو انیق نتیجه‌گه ایرشمه‌دی
neshananews
19 July 2021جمهور رییس ایککینچی اۉرین‌باسری سرور دانش نینگ ایتیشیچه، افغانستان دولتی نماینده‌لری نینگ دوحه‌ده طالبان بیلن اوچره‌شووی انیق نتیجه بېرمه‌گن.
جناب دانش بوگون ( دوشنبه ۲۸ سرطان) قربان هییتی مناسبتی بیلن یۉلله‌گن پیامیده اوشبو اوچره‌شوو بعضی مملکتلر نینگ واسطه‌چیلیگی بیلن اۉتکزیلگنی، اما انیق نتیجه‌گه بیر‌مه‌گنی و توشونرسیز و بی‌معنا بیانات بیلن یکونلنگنینی یازگن.
جناب دانش طالبان و گروه طرفدارلری نینگ ایکّی یوزله‌مه و قره‌مه-قرشی سیاستلری‌نی، تینچلیک مذاکره‌لری نینگ موفقیتسیزلیگی سببی اته‌گن. اونگه کۉره، طالبلر تینچلیک جریانیده هېچ بیر تعهدی‌نی بجرمه‌گن.
جمهور رئیس‌ایککینچی اۉرین‌باسری خلق‌ارا هم‌جمعیت و طالبلرنی قۉللب-قوّتلاوچی مملکتلرنی بو گروه‌نی مضمونلی تینچلیک مذاکره‌لریگه مجبورلشگه چقیره‌دی.
شنبه و یکشنبه کونلری افغانستان دولتی نینگ یوقاری درجه‌ده‌گی هیاتی، ملي یره‌شیش کېنگاشی رییسی عبدالله عبدالله باشچیلیگیده دوحه‌گه یۉل آلدی و طالبان گروهی نینگ سیاسي معاونی ملاعبدالغنی برادر باشچیلیگیده‌گی هیاتی بیلن اوچره‌شدی.
اوچره‌شوو کېچه یکونلندی و ایکّی کونلیک اوچره‌شوو نینگ یکوني بیاناتیده، تمانلر اۉرته‌سیده تینچلیک مذاکره‌لرینی تېزلشتیریش کېرکلیگی تاکیدلنگن.
افغانستان دولتی‌هیاتی، طالبان نماینده‌لری بیلن مهم مسأله‌لر، جمله‌دن آتش‌کیسیم اۉرنه‌تیش، افغانستان حکومتی قماقخانه‌لریدن طالبان محبوسلرنی آزاد قیلیش و تینچلیک جریانیده‌گی مهم مسأله‌لرنی محاکمه قیلیشی کېرک اېدی. اوچره‌شوو نینگ یکوني بیاناتیده، اوشبو مهم مسأله‌لر نینگ هېچ بیری حقیده سۉز یوریتیلمه‌گن.
