هرات ده زعفران گلي آلتينچي كورگزمه سي يولگه قويليشي بيلن عيني زمانده، محلي رسميلر بو ولايت قيزيل آلتين محصولاتي كوپيشي دن خبر بيرگن.

هرات ولايت حاكمي سيدوحيد قتالي بوكون ( پنجشنبه ٢٢ عقرب) هرات زعفران كورگزمه سيده، بو ولايت زعفران ايكينچي لري جاري ييل ده ايگرمه تن دن كوپراق محصول آليشي لري كوتيلماقده ديدي. هرات حاكمي شو حاضر بو ولايت ده سكسن مينگ هكتار ييرده زعفران ايكيلگني ني ايتيب و بو اوسيمليك محصولي ييل اوتيشي بيلن كوپيب بارماقده ديدي.

عيني حالده بو كورگزمه ده اوز محصولات لري نمونه لريني نمايش گه قويگن هرات ولايتي زعفران ايكينچيلري زعفران نرخي كوزگه كورنرلي درجه پسگه توشكني و قوشني مملكتلردن افغانستان گه زعفران كيلتيريليشي دن خواتير اظهار ايتيلر.

هراتليك زعفرانكار حاجي ابراهيم عادل، زعفران محصولاتي ني چيت ده صادر قيليش، ايران دن افغانستان گه زعفران كيلتيريليشي و كرونا ويروسي قيينتچليكلري سبب مملكت ده زعفران نرخي پسگه توشكني خواتيرلنتروچي دير ديب ايتي. او مسوول ارگانلردن دنياني تورلي مملكتلريگه كوپراق زعفران صادر ايتيليشي زمينه سي ني مساعد ايتيشلريني طلب ايتي.

اما هرات ولايتي زراعت اداره سي مسووللري  بو ولايت ده زعفران نرخي پسگه توشكني ني وقتينچه ليك اتب و دنيا مملكتلري چيگره لري آچيليشي و بو محصول ني چيت مملكت لرگه صادراتي باشلنيشي بيلن زعفران نرخي كوتاريليشي ممكن ديديلر. زراعت اداره سي ايكينچي ليك بوليمي باشليغي بشير احمدي شو حاضر زعفران هرات ده قريب ايگرمه مينگ عايله گه ايش زمينه سيني مساعد ايتكن و زعفران صادراتي باشلنيشي بيلن بو رقم كوزگه كورنرليچه كوپيشي ممكن ديدي.

بو آره ده هرات تجارت و سرمايه ياتقيزيش اداره سي مملكت دن چيت ده زعفران محصولي صادراتي باشلنيشي دن اميد بيلديره دي. بو اداره معاوني سعيد عظيميان يالغيز اوتكن ١١ آي ده افغانستان دن ٢٦ تن زعفران چيت مملكت لرگه صادر بولگن ديدي. او صادر بولگن محصولات بهاسيني ١٩ ميليون دالر ديب ايتي.

حاضرچه مملكت ده ايشلب چيقاريله ياتكان زعفران دن ٩٠ فايزي هرات دن قولگه كيله دي و بو ولايت مملكت بويلب زعفران نينگ ايكيش و ايشلب چيقاريش مركزي سنله دي. اما بو ولايت زعفرانكارلري بو محصول نرخي كوزگه كورنرلي درجه ده پسگه توشكني دن جدي اقتصادي معمالرگه دچار ديرلر. حاضرچه مملكت بازارلريده بير كيلو خالص زعفران نرخي ٢٥ مينگ دن ٣٠ مينگ افغاني گه چه ساتيله دي.حالانكه اوتكن ييل لرده بير كيلو خالص زعفران يوزمينگ افغاني گه چه ساتيلردي.