دولت عالي كينگاشي و تينچليك آقيمي ده سياسي اجماع و بيرليك ضرورتي
neshananews
25 May 2021دولت عالي كينگاشيني تشكيل ايتيليشي ١٣٩٩ ييلي ثور آيي ٢٨ كونيده اوتكزيلگن جنجاللي سيلاو آرتيدن غني و عبدالله جنابلري ارا امضالنگن كيلشونينگ آلتي بوليمي دن بيري دير كه اونگه اساسن سياسي رهبرلر و تاثيرلی ملي سيمالردن عبارت بولگن بو كينگاش اولكه ده ملي بيرليك و اجماع ايجاد قيليش اوني مهم غايه و مقصدي دير.
اوشه زماندن حاضرگه قدر كه دولت عالي كينگاشي اعضالريني سايلش موضوع سي قيزيق راق بولگن؛ حكومت دايم ملي يرشيش عالي كينكاشي تمانيدن كيليشوگه عمل قيلمسليك گه عيبلنيب تنقيد آستيده آلينگن.حكومت اما سونگي وقتلرده نيچه يغين دن سونگ دولت عالي كينگاشي ني ايجاد ايتيش اوچون بيرقطار مصلحت و اوچرشولرني باشلب و رسانه لرگه يتيب كيلگن معلوماتلرگه اساسن بو كينگاشي نينگ ايلك يغيني ني ينگي اعضالري اشتراكي بيلن اوتكزماقچي بولگن.
رسانه لر قول تاپكن معلوماتلرگه كوره بو كينگاش اعضالري تركيبي ده سياسي تاثيرلي سيمالر بارليگي تصديق لنگن اما حكومت حاضرگه قدر بو كينگاش اعضالري رويخطي يكوني ايمس ديب ايتكن.
بو معلوماتلرگه اساسن جمهوررييس غني، امرالله صالح، سرور دانش، عبدالرب رسول سياف، گلبدين حكمتيار، حامدكرزي، كريم خليلي، محمد محقق، عبدالرشيد دوستم، صلاح الدين رباني، عطامحمد نور، مير رحمان رحماني، فضل هادي مسلميار، فاطمه گيلاني، حسينه صافي، فوزيه كوفي و حبيبه سرابي اسملري دولت عالي كينگاشي رويخطي ده كيريتلگن.
دولت عالي كينگاشي اوريني و اوني صلاحيتي دايره سی قنچه ليك كينگ دير؟
هرچند حكومت ني ايتيشيچه بو كينگاش جمهوررييس گه مملكت ملي و كاتته مساله لري بويچه مصلحت بيره دي، اما بير قطار سياسي حزب لر بو كينگاش نينگ مصلحت بيريش صلاحيتي ييترلي ايمس و بو كينگاش قرار آليش ده هم صلاحيتلي بوليشي لازم ديب تاكيدلشكنلر.
اساسي قانون جمهوررييس ني ييريك ملي موضوع لر بويچه صلاحيتلري نی انيق لشكن، اما سياسي شرحلوچي لرگه كوره دولت عالي كينگاشي گه قرار آليش صلاحيتي ني بيريليشي در حقيقت جمهوررييس صلاحيتلري دايره سيني قيسقرتيره آله دي.
حكومت نينگ مخالف سياسي حزبلري، مملكت نينگ سياسي قدرتي ارگ قوليده چيكلنيب تمركز تاپكن و بو قدرت مركزي فقط نيچه كيشي قولده بولگني كوپلب سياسي و اجتماعي آفتلرني توغديرگن ديب ايتماقده لر.
اولرگه كوره بو كينگاش تمانيدن قدرت انحصاريني سيندريشي درحقيقت مملكت ده ملي بيرليك و اجماع شكللنيشي گه زمينه برتيب و افغانستان تينچليك پروسه سيني نی تيزلشتيريليشي گه سبب بوله آله دي.
اسلامي حزب اعضاسي همايون جرير افغانستان نينگ بير خصوصي تلويزيوني بيلن صحبت ده، ارگ ده حد دن تشقري سياسي قدرت مركزلشگني سبب سياسي و اجتماعي معمالردن علاوه تينچليك پروسه سيدن حمايت ايتيش اوچون ملي اجماع و بيرلیك شكللنيشي آقيمي ني جدي معما و قيينتچيليك لرگه دچار قيلگن ديدي.
جريرجنابلريگه كوره ملي و سياسي موضوع لر بويچه انيق صلاحيت لر بيلن دولت عالي كينگاشي ني ايجاد ايتيليشي قدرت انحصاري و تماميت خواهليك ني آلديني آليب و سياسي مشاركت اوچون مناسب زمينه ني مساعد ايته آله دي.
جمهوررييس ليك سرايي حاضرگه قدر بو كينگاش صلاحيتلري دايره سي حقيده به تفصيل ايضاح بيرمگن، اما دايم بو كينگاش مصلحت بيره ياتكان كينگاش ايكني دن سوز يورتكن. بو بحث اسلامي حزب و جمعيت اسلامي حزبلرگه اوخشه گن ييريك سياسي جريانلر مخالفتي گه دوچ كيلگن.
جمهوررييس غني نينگ مصلحتچي لريدن بيري محمداكرم خپلواك حكومت بو كينگاش ني ايجاد ايتيش بيلن ييريك ملي مساله لر بويچه قرار آليش آقيميده برچه سياسي گروه لرگه حصه بيريب و سياسي بيرليك و اجماع ني ايجاد ايتيش ني مقصد قيلگن ديدي.
اوني معلوم قيليشيچه بو كينگاش مملكت ملي مساله لري بوبچه جمهوررييس گه بيره ياتكان مصلحت لري جمهوررييس تمانيدن تطبيق ايتيليب عملي بوله دي.
حاضرگي حكومت ايجاد ايتيليشي و ملي يرشيش عالي كينگاشي شكللنيشي گه سبب بولگن محمداشرف غني و عبدالله عبدالله ارا امضالنگن كيليشوگه اساسن، بو كينگاش نينگ ييريك ملي مساله لر مديريتي بويچه صلاحيتي دايره سي تينچليك پروسه سي گه تيگيش لي موضوع لرگه عايد تعريف لنگن.
كورينيشي دن دولت عالي كينگاشي در حقيقت ملي يرشيش عالي كينگاشي گه قرشي ايكني آشكار دير و بو كينگاش نينگ ماموريتي اوشنداي كه سياسي جريانلر تاكيدليديلر تينچليك آقيمي دن حمايت ايتيش اوچون سياسي اجماع و اتفاق ني ايجاد ايتيش و بو توغريده جدي قرارلرني صادر قيليش دير.
اما جمهورريس ليك سرايي گه كوره دولت عالي كينگاشي نينيگ دقتي مملكت نينگ ييريك مساله لريگه قرتيلگن و ملي يرشيش عالي كينگاشي افغانستان تينچليك آقيمي ني باشقره دي.
حاضرگه قدر دولت عالي كينگاشي رويخطي ده كيريتيلگن ١٨ سياسي سيمالردن گلبدين حكمتيار رهبرليگ قيله ياتكان اسلامي حزب و صلاح الدين رباني باشچيليگيده بولگن جمعيت اسلامي حزبي اوز عضويت لريني قطعي تصديقلشمگن.
كورينيشي دن بو كينگاش گه قرار آليش صلاحيتي بيريلمگن و اوني صلاحيتلري دايره سيني قيسقرتريش بيلن اسلامي حزب، جمعيت اسلامي و شونينگ ديك باشقه تاثيرلي سيمالر بو كينگاش ده اشتراك ايتيش دن وازكيچيشلري ممكن .
بو كينگاش ايجاد ايتيلمگني تينچليك آقيميده سياسي اجماع شكللن مس ليگي گه سبب بوليشي ممكن و صلح مذاكره لري ثمره لي نتيجه بيرگن تقديرده، صلح دن كينگي حكومت هم نظارتي باسيم دن بوش حالت بيلن يوز مه يوز بوليشي ممكن.
حاضرگه قدر رسمن ايجاد بولمگن دولت عالي كينگاشي تركيبي قرشی مخالفت لرگه قره مي جمهوررييس ليك سرايي اوتكن ييل دن بويان بيرآز كيچيك راق تركيب بيلن ايككي يغيين ني اوتكزدي كه بو يغيين لر عبدالله عبدالله و حامدكرزي مخالفتي بيلن يوز مه يوز بولدي.
بو مخالفت لر سببي عمومن جمهوررييس گه يقين شخصلرني بو كينگاش ده عضويتي اوچون ايدي و مخالفلر اوني ناقص كينگاش ديب بهالشيب اوني تركيبي ده تاثيرلي سياسي جريانلر و سيما نظرده آلينمگن دیدیلر، اما تازه ليك ده ارگ بو كينگاش ايجاد ايتيليشي اوچون سعي و حركتلرني شدت بيرگن و اينگ تازه حركت ده ارگ، حامد كرزي واسطه چيليگي بيلن گلبدين حكمتيار و صلاح الدين رباني بيلن صحبتلشكن.
كورينيشي دن بو ايككي حزب تمانيدن اورته گه قويلگن شرط و شرايط لرگه قرگنده بو كينگاش نينگ شكللنيشي بيرقطار قيينت چيليك لر بيلن يوز مه يوز بوليشي ممكن.
بوكينگاش اعضالري نينگ تركيبي، همده اوني صلاحيتلري دايره سي هلي هم حكومت و سياسي جريان لر ارا اختلاف يرتكن موضوع دير و بو ايككي موضوع ني برطرف ايتيش اوچون حكومت و سياسي جريانلر ارا كيليشو حاصل بولمسه بو كينگاش شكللنيشي داستاني چيگلشیب قيينت شرايط يوزه گه كيليشي ممكن.
اسلامي حزب، ارگ، اوزقدرتي و تماميت خواهليگي ني دوام ايتيريشي ني ادعا قيلب بو نمايشي و صلاحيت سيز كينگاشني ايجاد ايتيش بيلن صلح آقيمي دن اوز گه منفعتي فايده لنيشي ني تاكيدلشكن.
باشقه تماندن بو حزب دولت عالي كينگاشي رويخطي بيلن قرشي ايكني ني بيلديريب و بو كينگاش اعضالري تركيبي سكيز كيشي دن كوپراق بولمگني ني طلب ايتكن.
بو حزب گه كوره دولت عالي كينگاشي اعضالري كوپ بوليشي، ملي اجماع و اتفاق كه توسيق بوليب و بوحزب بو كينگاش اعضالري تاثيرلي و تانيلگن سيمالردن تن لنيش بيلن سياسي اتفاق و اجماع شكللنيشي ني ساده راق قيليش ني تاكيدلشكن.
هرچندحاضرگه قدر اسلامي جمعيت حزبي بو كينگاشي ايجاد ايتيليشي بويچه يارقين فكر و ملاحظه سيني اعلان ايتمگن اما ملي جنبش و اسلامي حزب ايتكنلر كه اگر بو كينگاش نينگ اجرايي صلاحتي نظرده توتيلمسه بو كينكاش عضويتي و اوني يغيينلريده اشتراك ايتيش دن وازكيجيش لريني اعلان ايتكنلر.
دولت عالي كينگاشي اعضالري نينگ نشر بولگن رويخطي، اما سياسي و ضيايي جريانلرني تورلي مناسبت لريگه هم سبب بولگن.
مناسبتلرگه كوره افغانستان منازعه سيگه دخلدار بولگن سيمالردن عبارت دولت عالي كينگاشي ني ايجاد ايتيليشي اولكه ده گي بحران ني كينگيتيريب دايمي تينچليك گه زمينه يرته آلميدي.
دولت عالي كينگاشي ايجاد ايتيليشي ضرورتي
امريكا و طالبان ارا صلح مذاكره لري باشلنگني دن كه قريب ايككي ييل اوتماقده، افغانستان حكومتي حاضرگه قدر تینچليك آقيميدن حمايت ايتيش اوچون سياسي و ملي اتفاق و اجماع ني شكللنتيريشده قادر بولمگن.
هرچند افغانستان تينجليك پروسه سيدن جهاني اجماع و اتفاق شكللنگن و بير اندازه گه چه منطقه اي اتفاق هم ايجاد بولگن اما افغانستان ايچكري سيده بير ييريك ملي و سياسي اجماع و اتفاق شكللنمگني صلح پروسه سيني جدي معما و توسيق لرگه دچار قيلگن.
افغانستان ايچكري سيده گي بو قره مه قرشي ليك لر سبب بو مملكت نينگ اوروش و تينچليك آقيمي كورينيشي طالبان منفعتي گه ايلگن و بو وضعيت، كوپراق امتياز آليش اوچون بو گروه گه زمينه ني مساعد ايتكن.
حاضر كه جهان جماعه سي سعي و حركتي بيلن افغانستان تينچليك مذاكره لري تيزلشتيريلگن، دولت عالي كينگاشي هرتمان له مه و عادلانه تركيبي بيلن سياسي اتفاق ايجاد ايتيليشي يوليده اورته گه چيققن توسيق ني كوتاريب بو آقيم دن حمايت ايتيش اوچون بير كوچلي قوت ني شكللنتيريشي كوتيلماقده.
حاضر افغانستان حكومتي افغانستان نينگ قومي، مدني، تيل و مذهبي تورلريني انابت گه آليش بيلن دولت عالي كينگاشي تركيبي ده برچه سياسي، اجتماعي و مذهبي گروه لر نماينده لريني كيرتيش بيلن صلح پروسه سيدن حمايت ايتيش اوچون ملي و سياسي اجماع و اتفاق گه قولي زمينه و فرصت يرتيشي لازم دير.
اگر حكومت اوتميش كبي تماميت خواهليك و يكه تازليك ني دوام ايتيريب و مملكت ييريك ملي مساله لري توغري سيده قرار آليش اوچون زمينه ني باشقه سياسي، قومي و مذهبي گروه لرگه مساعد ايتمسه نه فقط بو آقيم بيران ايجابي نتيجه گه ايرشه آلميدي بلكه سياسي اختلاف و كيليشموچيليك لر شدت آليشي بيلن افغانستان ده ينه بير بار قومي منازعه لر باشلنيشي امكان دن اوزاق ايمس.
حاضرچه فارياب و باشقه ولايت لرده دوام ايته ياتكان اعتراضلر و مخالفتلر، ارگ نينگ بيرتمان له مه قرارلري و يكه تازليك لريدن دلالت بيره دي.
حكومت جمهوريت قدريتلريگه اساسن مردم طلب لريگه تمكين و اعتنا قيليشي لازم و اوشنداي كه اوز مشروعيتب ني مردم دن آلگني ني ادعا ايتماقده، مردم نينگ مشروع طلب و اراده سيني اوز اجرااتيده عكس ايتيرشي لازم.
صلح مذاكره لري نينگ جاري آقيمي، حاضر بو فرصت ني مساعد ايتكن كه حكومت، دولت عالي كينگاشي ني برچه سياسي ومذهبي گروه لر عضويتي بيلن ايجاد ايتيب امارت روايتي گه قرشي جمهوريت روايت ني شكللنتيريب تا بو روايت ايسه افغانستان مردمي نينگ سياسي اجماع و اتفاقي دن دلالت بيرسه.
هرحالده اونملي موضوع بوكه جاري صلح مذاكره لري، ناقرارليك و زوروانليك لرني كون اوتيشي بيلن شدت آليشي گه قرگنده مملكت ده سياسي و ملي اجماع و اتفاق شكللنيشي اوته ضرور دير و مساعد بولگن فرصت دن فايده لنيب مملكت ده اوروش اوتي ني جهان جماعه سي همكارليگي بيلن اوچيريش لازم دير.
اگر سياسي جريانلر و حكومت شنداي بير اجماع ايجاد ايتيشي ده ناكام قالسه لر
اولكه ده زوروانليك لر شدت آليب و تورلي قوم و مذهب ار ارا كيليشموچيليك كوپيشي دن باشقه نرسه ني كوتيش ممكن ايمس، چونكه جهان جماعه سي باسيم لری سبب هر قنداي كيليشو امضالنيشي، صلح دن كينگي تيزيم ني نابود ايتيش ده ییریک تاثیر قالدیدریشی ممكن كورينه دي.
