هرچند ناگرانليك بعضيلر اوچون كوچسيزليك حسابلندي،اما بعضي ناگرانلر خرسندليك ده كيچيريب تقديرلريني اوزلري ايسته گن يول تمان آليب باريشگه قادر بولگن لر.

قلاغ عاجز بولگن زرغونه ناگران ايكني گه قره مي؛ قالين توقيش،گل تيكيش و قول صنعتي بويچه ييريك مهارتلرگه ايگه دير.

١٧ ياشده بولگن بوقيز درس و مكتب گه چوقير علاقه سي بارليگي دن تشقري سپورت گه هم قيزيقشيم كوپ ديدي.بو ياش كورستكن كه ناگرانليك چيكه لنيب قاليش ايمس. زرغونه جوزجان ولايتي مركزي شبرغان شهري يشوچي سي دير.او آدملر ضعيف ايكني ني ايشانمي من ديب تاكيدلشدي.او تورلي خيل محروميتلر قرشي سيده كورشكن و ايسته گه نرسه لرگه اوزيني يتكزيش گه موفق بولگن.

نشانه خبر آژانسي زرغونه بيلن سويدن دفتري اوقوتوچي سي حضوريده صحبت لشدي.بو صحبت چاغيده زرغونه ني آته سي هم قيزي نينگ كتته حمايتچي سي اوله راق حاضر ايدي.زرغونه آته سي، قيزي نينگ ايش و مهارتلريدن خرسند دير؛ چونكه زرغونه آته سي ني عايله روزغاريني تامينلشده ياردم بيره دي.

زرغونه اشاره تيلي بيلن سوزليدي و استادي اوني اشاره لريني سوزگه ايلنتيره دي.قلاغ دن عاجز بولگن بو قيز ديدي:” باله ليك دن درس اوقيش و ايشلش ني آرزو قيلرديم، نهايت ده بوندن اوچ ييل آلدين سويدن دفتري مني قلاغ دن عاجز بولگن كيشي لر اوچون ايجادبولگن كورس لرده شامل قيلدي و حاضر تورلي فن ني اورگنيش دن علاوه درس هم اوقيمن.” او حاضر توقيزينچي صنف ده درس اوقيدي و انده سنده دغدغه لريني نقاشليك بيلن نمايش ايتيره دي.

اشاره تيلي، قلاغ دن عاجز بولگن كيشي لرني باشقه لر بيلن علاقه قوريش اوچون يگانه وسيله سنله دي.تيل شناسلرگه كوره انسان لر بيرينچي دن اشاره تيلي بيلن اوز مقصدلريني باشقه لرگه يتكزرديلر و حاضر زرغونه هم شو طريقه دن فايده لنيب اوز گپلريني باشقه لرگه يتكزه دي.

زرغونه اشاره بيلن ديدي:”بير ايناغم هم قلاغ دن عاجز دير او دوكاندارليك قيله دي،بيز بيرگه ليكده ايشلي ميز،بيرييل آلدين ايناغم توي قيلدي و بيز قرضدار بولديك و ايندي بو قرضني تولش اوچون بيرگه ليكده ايشلي ميز.”زرغونه علاوه ايتي بيز قالين توقيش دن كسب ايتكن درآمددن اويي ميزده ايككي اتاق قوريشديك.

سويدن دفتري افغانستان ده ناگرانلرگه درس،فن و قرضه بيريش بويچه فعاليت قيلماقده.سويدن كميته سي نينگ بير دفتري حاضرچه جوزجان ولايتي ده فعال دير.بو دفتر اونلبچه ناگرانلرگه خدمت كورستماقده.

زرغونه بو دفتر تمانيدن حمايه بوله ياتگان ناگرانلردن بيري دير.

بو كميته گه مراجعه ايتكندن سونگ حياتي ده قنداي اوزگريش لر يوز بيرگني ني زرغونه دن سوره ديم؛ زرغونه بو سوالگه استادي ياردمي بيلن بونداي جواب بيردي:”بوندن آلدين هميشه خفه ايديم و تشويش قيلرديم، اما ايندي منه كوله من و درس اوقيشيم و اوز ايشلريم ني اوزيم بجره آليش دن خرسند من.”قلاغ دن عاجز بولگن بو ياش قيزني كوپراق خرسند قيلگن نرسه عايله سي بيلن اوني همكارليگي دير.او اشاره تيلي بيلن ديدي:” مين آتم ني همكاري من.”

زرغونه قالين توقيش و قولده تيكه ياتكان تيكيشلريني ساتيش دن هر آيي توقيزمينگ افغاني درآمدي كسب ايتماقده. او بو مبلغ دن كتته قسمي ني كونده ليك ضرورتلريني تامين لش اوچون آته سيگه بيره دي و بير مقداريني هم پس انداز قيله دي.

هرچند تيريكليك و حيات هيچ قچان آدملرني رغبت گه ايمس و هركيشي ني اوزيگه يرشه قيينتچليك و معماسي بار، زرغونه ني هم باشقه كيشي لر كبي اوزيگه خاص قيينتچيليكي بار، او بو حقده ديدي:”حاضرچه مين و ايناغم ايشلي ميز اما هلي هم اقتصادي قيينتچيليگي ميز برطرف ايتيلمگن؛ چون عايله ده ١١ كيشي ميز و قولگه كيريته ياتكان درآمدميز كفايه ايتمي دي.” بو قيز اوزيني كوچلي كورستيب ديدي:”مين ايشلش، درس اوقيش گه قادر من و دولت دن ايستي من كه بيزلرگه مخصوص ايشلر نظرده توتسين.”

زرغونه صحبتلري دواميده اولكه ده صلح و تينچليك تامين لنيشي اوچون يورگيده گي آرزولريدن سوزلشيب ديدي:”اوروش دن همه خسته بولگن و هر كيچه تلويزيون لردن پارتلش و انتهار خبرلريني كورگنده اميدسيز بوله من، ارزوم باركه تيزراق اوروش يكونلنسه و برچه وطنداشلريم بيلن يان مه يان تينچليك فضاده حيات كيچرسك.”

حاضر افغانستان ده صلح ني يوقالگن كليديني برچه افغانلر قيديرماقده لر. اما زرغونه ايشانچ و كوچ نينگ يقال نشانه سي دير ، او نه فقط ناگرانلر گه بلكه هربير انسان اوچون مناسب اورنك بوله آله دي. او بيرناگران شخص اوله راق اثباتلشكن كه اگر انسان لر اراده قيلسه لر اينگ بلند چوقيلرني فتح قيليب غلبه قازانه آلدير و حيات ني اوز رغبت لريگه اساسا” اوزگرتيريش لري ممكن ديدي.

زرغونه برچه ايشلري يانيده، جوزجان ولايتي نينگ قلاغ دن عاجز بولگن قيزلرنينگ فوتبال جماعه سي اعضاسي دير.او هر كون بيرساعت وقت ني فوتبال اوينشگه اجرتكن.