سرپل ولايت كينگاشي اعضالري، بيرهفته دن بيري طالبان جنگچي لري سرپل- جوزجان شاه يوليده حركتلريني كوپيتيرگني دن خبربيرگن. اولرگه كوره طالبان جنگچيلري هركوني بوشاه يول نينگ نيچه محليده چك پاينت لر ايجاد ايتيب يولوچيلرني تيكشيريب تلاشي قيله دي و شونينگ اوچون بو يوليده قتنه ياكان يولوچي لر امنيت حس قيلميديلر.سرپل ولايت كينگاشي اعضالري محلي حكومت ده گي ترتيب سيزليك لرني بو شاه يول ناتينچ بولگني اساسي عاملي ديب ايتكنلر.

سرپل ولايت كينگاشي اورين باسري و سرپرستي سيداسدالله دانش لوكون ( يكشنبه ٢٢ سرطان) نشانه خبرآژانسي بيلن صحبتده ديدي: ” بير هفته دن بريان دولت ايشچي لري سرپل – جوزجان شاه يوليده قتنه آلميديلر.” دانش جنابلريگه كوره، طالبان گروهي برچه مسافرتاشوچي نقليه واسطه لرني تيكشيره ديلر. او بو شاه يولده قتنه ياتكانلردن اكثري عادي اهالي بولگني قيد ايتيب طالبان گروهي قورقوي دن بو وضعيت گه نسبتا” اعتراض قيله آلميديلر ديدي.

سرپل ولايت كينگاشي سرپرستي، طالبان جنگچي لري بو شاه يولده قتنه ياتكان يولوچي لردن باج آليشلري ممكن ديدي.دانش جنابلري سرپل محلي اداره سيده گه ترتيب سيزليك و ايككي آدرس دن ايككي حاكم بولگني سبب بو ولايت خوفسيزليك وضعيتي ني هر زمان دن كوره ناتينچ راق قيلگن ديب فكربيلديردي. شونينگ ديك سرپل ولايتي خبرنگارلريدن بيري اتيلانوري سونگي بير آي جريانيده سرپل بلديه سي مهندسلريدن بيري جوزجان – سرپل شاه يوليده اولديريلگني ني ايتيب دولت نينگ قوراللي مخالف لري هرزمان ايسته سه لر بو شاه يول نينگ هر منطقه سيده چك پاينت ايجاد ايته آله ديلر ديدي.

باشقه تماندن شاهين بول اردوسي سوزچيسي محمدحنيف رضايي ديدي: ” سونگي وقتلرده طالبان گروهي نينگ حركتلري نه فقط سرپل شاه يوليده بلكه بو بول اردو مسوليتي آستيده گي برچه منطقه لرده كوپيگن ديدي.” او، امنيتي قوتلر تيارحالت ده ايكني ني تاكيدلب و طالبان گروهي هم هيچقنداي يوتوق گه ايريشمگن ديب ايتي.

فارياب، جوزجان، سرپل،بلخ و سمنگان ولايتلري خوفسيزليگي ني تامين لش شاهين قول اردوسي مسوليتي دير. سرپل- جوزجان شاه يولي خوفسيزليگي بوزيلگني حقيده سرپل ولايتي محلي رسميلريني نظري ني آليش اوچون رسميلر به تكرار تماسلريميزگه جواب بيرمه ديلر.