سرپل ولایتی بلدیه سی بیرقطار ملازم لری، بو ولایت بلند رتبه لی مقامی تمانیدن کلتکلنگن و اهانت بولگنلری سبب ایشتشلش گه قول اوردی لر. بلدیه ایشچی لریگه کوره سرپل ولایت حاکمی اجتماعی اورین باسری صلاح الدین چریک، اولرنی حاجتمند کیشی لرگه نان ترقتیش چاغیده کلتکلب اهانت قیلگن.

سرپل ولایتی بلدیه سی انجنیری سیدفتاح سادات بوکون ( سه شنبه ۳۰ ثور) نشانه خبر آژانسی بیلن صحبت ده دیدی:«بیزشهردارلیک اداره سی تمانیدن نان ترقتیش پروسه سینی نظارت قلیش ده وظیفه دار میز و بیرنان پزلیک نی نظارت قلیش و مردم دن کیم لرینی سورش پیتیده ولایت حاکمی اورین باسری بیزنی سوکیب حقارت قیلیب کلتکلشدی.» سادات جنابلری علاوه ایتی سرپل یشوچی لریدن بیر قنچه سی تذکره سیز نان پزلیک لردن نان آلیش اوچون توپلنگندیلر و ایش اصولی گه مطابق یالغیزتذکره سی بولگن کیشی لرگه نان ترقتیش قراری آلینگن. سادات جنابلری اما نمه اوچون ولایت اورین باسری اونی کلتکلشگنی حقیده کوپراق ایضاح بیرمه دی.

 بلدیه ایشچیلریدن بیر قنچه سی کلتکلنگنی ارتیدن ، بلدیه ملازم لری اوز همکسب لریدن حمایت ایتیش اوچون ایشتشلش گه قول اورگن لر. سرپل بلدیه سی ملازم لریدن بیری نعمت الله هم نان ترقتیش جریانیدن نظارت قیلوچی هیات دن بیری دیر اودیدی:« اوتکن بیر هفته جریانیده سرپل ولایت حاکمی اجتماعی اورین باسری بلدیه اداره سی نینگ اوچ ملازمی نی پولیس حوزه سیگه تانیشتیرگن.»  نعمت الله علاوه ایتی اگر جرم بولگن بولسه بیرینچی دن سرپل شهرداری دن سورلیشی لازم و اوندن سونگ بلدیه ملازم لرگه نسبتاٌ مناسب کورستیلیشی کیرک.

 ایشتشلش گه قول اورگن بو ملازم لر بو موضوع عدلی وقضایی اداره لرتمانیدن تیکشیریلشی نی طلب ایتکن لر. اولرگه کوره سرپل ولایت حاکمی اورین باسری بلدیه ملازم لری گه نسبتاٌ قومی مناسبت کورستماقده.

سرپل ولایت حاکمی اورین باسری صلاح الدین چریک اما بلدیه ملازملرینی کلتکلش گنی نی رد ایتیب سرپل شهرداری نی مالی فسادگه عیب لب نشانه خبرآژانسی بیلن صحبت ده دیدی:« سرپل ده بیرقطار خیالی نان پزلیک لر بار و شهردارتمانیدن ثبت بولگن. شونی اوچون بلدیه اداره سی نی ایریم ملازم لرنی پولیس حوزه لرگه تانیشتیردیم.» چریک جنابلری علاوه ایتی نان ترقتیش جریانیده بعضی شخص لرایککی و اوچ یوز کارت بیلن مراجعه ایته دی و بو خصوص ده سند و حجت موجود دیر. اونگه کوره ایریم قوم باشلیغ لری قانون گه اعتنا قیلمی شهردارلیک ملازم لری قانون بوزرلیک لرینی یاشیرماقده لر.

باشقه تماندن سرپل بلدیه سی مسوللری بو موضوع تیزلیک ده حل ایتیلگنی دن خبربیرگن لر. سرپل بلدیه سی اورین باسری حاجی عنایت الله دیدی:«ولایت حاکمی اورین باسری و شهردارلیک ملازم لری ارا یوزبیرگن بو جنجال ولایت حاکم لیگی گه جونتیلگن و تشویش لنرلی ایمس.»

  سرپل ولایتی محلی رسمی لری ۵ مینگ و ۸۹۹ عایله نی حاجتمند ایکنی نی رویخط ده آلیب وبو عایله لرگه هرکونی ۵۳ نان وپزلیک ارقلی قوروق نان ترقتیله دی. کرونا ویروسی ییرلیشی ارتیدن دولت آچلیک گه قرشی کورش اوچون اهالی گه نان ترقتیش دستوری نی قول اوستیده آلدی. بو دستور حاضرچه ۳۴ ولایت ده تطبیق ایتلماقده.