جوزجان ولايتي مركزي شبرغان شهري نينگ ١٥ كيلومتردن عبارت بولگن حلقوي سركي آسفالت ايشي بوكون محلي رسمي لر و ولايت حاكمي اورين باسري اشتراكي بيلن باشلندي.

معلومات لرگه كوره بيرينچي دن بو سرك ني ايككي كيلومتري آسفالت بوليب و سونگره قالگن قسمي قوريله دي.

بو لايحه بوتكل عملي بوليشي بيلن شبرغان شهري ترانسپورت خذمت لريگه عايد قيينتچليك لر بوتكل برطرف ايتيله دي.

جوزجان ولايتي يوللري دن محافظت قيلوچي اداره باشليغي انجنيرعطالله كارگر، شبرغان شهري حلقوي سركي پروژه سي تورت ييل آلدين ترانسپورت وزيرليگي و بير خصوصي شركت ارا امضالنگني ني ايتيب اما بير قطار قيينتچليك لر سبب بوكون اوني ايشگه توشيريشي گه موفق بولديك و جاري ييل آخريگه چه بو پروژه دن بيش كيلومتري قوريليشي ريجه لنگن ديدي.

تورت ييل آلدين ترانسپىورت وزيرليگي ١،٣ ميليارد افغاني خراجت بيلن شبرغان شهري حلقوي سركي ايشي ني باشلدي اما اقتصادي معمالر سبب بو پروژه بيرقطار معمالرگه دچار بولدي.

كارگر جنابلريگه كوره ” شبرغان شهري،فارياب ولايتي ،آقينه بندري ، بلخ و سرپل ولايت لري يولي اوستيده جايلشكني سبب مملكت شمالي ده اينگ مهم ترانزيتي يول حساب لندي و بو پروژه عملي بوليشي بيلن نه فقط شبرغان شهري نينگ ترافيك بويچه معمالري برطرف ايتيله دي بلكه قوشني ولايتلرني ترانسپورتي قيينتچليك لري هم حل ايتيله دي”.

باشقه تماندن شبرغان شهري يشوچي لري بو پروژه ايشگه توشيريلگني ني القيشلب اما دولت نينگ مسول ارگانلري و قرادادي شركت ايشي استه سكين بولگني دن شكايت ايتكن لر.

اويي حلقوي سرك يانيده جايلشكن شبرغان شهري يشوچي سي حيت مراد يولداش،كوپ قيينتچليك لردن سونگ بو پروژه ايشي قيته باشلنگني دن خرسندليك بيلديريب هرقنچه تيزراق ايش تمام بوليشي ني آرزو قيله دي.

شبرغان حلقوي سركي اطرافيده اون مينگ دن كوپراق اوي جايلشكن، عيني دمده بيرقطار اهالي يشش اوي و ايكنزارلريني بو يول قوريليشي اوچون قولدن بيرگن لر، اما تورت ييل دن بيري بو پروژه هلي هم يكونلنمگنيدن تنفيدليديلر.

شبرغان شهري “عيدمحله” قشلاقي اربابي عبدالمجيد بو تورت ييل مدتيده اهالي قيينتچليك لري حقيده ايتي:”عيدمحله قشلاقي ده قريب ١٦ مينگ كيشي يشي دي و ايككي مكتبي بار، اميدكه بو پروژه تيزراق يكونلنسه، چونكه اوتكن ييللر قيش موسوميده ياغينگرچليك دن و اسيغ آي لرده هم چنگ و توپراق دن كوپ عذاب چيك ديك اما ايندي باشلنگن ايش تيزراق نهايه گه ايتيشي ني اميد قيله ميز”.

شبرغان شهري حلقوي سركي پروژه سي بو ولايت ده اينگ جنجال لي پروژه دير كه تورت ييل دن بيري يكونلنمي قالگن.

ايتيليشيچه اوتكن تورت ييل جريانيده اقتصادي و سياسي معمالر بو پروژه عملي بوليشي كه توسيق بوليب تورگندي.