شبرغان شهریده کرونا ویروسی نی یوقتیرگن بیرشفاکارنینگ عالم دن اوتکنی دن سونگ، جوزجان ولایتی مرکزی کسلخانه سی یوقمه کسل لیک لربولیمی مسولی اوزینی قرنطینه قیلدی. بوکسلخانه نینگ یوقمه کسل لیک لربولیمی مسولی، جوزجان ولایتی مرکزی کسلخانه سی نینگ عالم دن اوتکن جراح سی بیلن توغریدن توغری تماس ده بولگنی نی ایتکن.

اوزینی قرنطینه قیلگن جوزجان مرکزی کسلخانه سی یوقمه کسل لیک لربولیمی مسولی محمدقادرخالص نشانه خبرآژانسی بیلن صحبت ده دیدی داکترپویا عزیز بیلن وفات ایتکنی دن ایککی کون آلدین ملاقات قیلگندیم، اما بوندن سونگ بو شفاکار کرونا ویروسی نی یوقتیرگن انیقلندی. خالص جنابلری علاوه ایتی:« داکتر پویا عزیزنینگ نمونه سی مزارشریف ده‌ کووید ۱۹ شفاخانه سی تمانیدن منفی دیب خبر قیلنگندی و مین اوحوالی نی سورش اوچون اونی ملاقاتی گه باردیم و اونی بیلن یادگارلیک عکس آلدیم.»

جوزجان مرکزی کسلخانه سی یوقمه کسل لیک لر بولیمی مسولی شوسبب دن اوزینی قرنطینه قیلگن. خالص جنابلری نمونه سی نتیجه سی اعلان بولمگونچه قرنطینه گه قالیشیم ضرور دیب ایتی.

 عینی حالده جوزجان مرکزی کسلخانه سی جراح سی داکتر پویاعزیز ثورآیی بیرینچی کونی شام چاغیده شبرغان شهریده عالم دن اوتی. بو شفاکارنینگ کرونا ویروسی نمونه سی وفاتی دن تورت کون آلدین مزارشریف شهری ده‌گی لابراتوار تمانیدن منفی دیب اعلان ایتیلگندی.بو جراح شفاکار ساغلیک وضعیتی آغیربولگنی دن سونگ جوزجان عامه ساغلیک اداره سی قیته اوندن نمونه آلیب مزارشریف گه جونتکندی. اما بو نتیجه بوگل مثبت ایکنی اعلان بولدی.

 بوجراح شفاکارنی عالم دن اوتکنی بو ولایت ده کرونا ویروسی نی یوقتیرگن شخصلر نمونه لری انیق لنیشی بویچه کوپگینه تنقیدلرگه سبب بولگن. جوزجان یشوچیلری مملکت عامه ساغلیک وزیرلیگی دن شبرغان شهریده بو ویروس نینگ انیق لنتیروچی لابراتواری ایجاد ایتیلیشی نی طلب ایتماقده لر.چونکه اهالی گه کوره بلخ ولایتی ده‌گی مرکز باشقه ولایت لردن کیله یاتکان شبهه لی نمونه لرگه اونچه لیک دقت واعتبار قرتمیدی.

کرونا ویروسی سبب داکترپویاعزیز نینگ عالم دن اوتکنی دن سونگ جوزجان ولایتی مرکزی کسلخانه سی برچه شفاکار و خادم لری قرنطینه بولگن. جوزجان مرکزی کسلخانه سی ریسی فریدعزیزی دیدی:شفاخانه نینگ جراحلیک بولیمی ده داکتر عزیز بیلن تماس ده بولگن برچه کیشی لرقرنطینه حالت دیرلرو کرونا ویروسی علامه لری کورینگ تقدیرده اولردن نمونه آلینه دی.»

حاضرچه جوزجان ولایتی مرکزی شبرغان شهری نینگ کووید۱۹ شفاخانه سیده بو ویروس نی یوقتیرگن بیر مثبت شخص و ۷ شبهه لی کیشی سخلنماقده. شبرغان شهریده هم ایککی هفته دن بیری قرنطینه حالتی جاری بولگن و فقط آذوقه ساتوچی دوکان لرآچیق و فعالیت قیلماقده.