افغانستان انسان حقلري مستقل كميسيوني ريسي شهزاد اكبر، مملكت ده عادي اهالي اولديريليشي دوام ايتيب باريش مسووليتي طالبان گروهي بوينيگه دير ديب ايتكن.
خانم اكبر بوكون( سه شنبه ١٤ ثور) تويتر صحيفه سيده مملكت ده عادي اهالي قتل ايتيليشي و مينگ لب عايله اواره بوليشي دن تنقيدلشكن. او هلمند ولايتي ده مينگ لب عايله آواره بولگني گه اشاره قيليب بو وضعيت دوام ايتيشي مملكت ده انسان حقلري كين قمرو ده اياغ آستي قاليش زمينه سيني يرتكن ديب يازگن.
خانم اكبرني ايتيشيچه مملكت ده تينچليك تامين لنيشي اوچون سعي و حركت لرگه قره مي عادي اهالي قتل دوام ايتماقده و بو قان توكليش دوام ايتيب باريشي مسووليتي عموما” طالبان ضمه سيگه دير.
شهزاد اكبر خانم گه كوره طالبان گروهي صلح مذاكره لريده افغانستان دولتي بيلن جدي سوزلشولردن واز كيچيش بيلن مملكت ده اوروش و قان توكيليش گه زمينه يرتماقده.
انسان حقلري مستقل كميسيوني ريسي طالبان گروهي دن تارتيشولردن قول تارتيش لريني طلب ايتيب افغانستان دولتي بيلن تينچليك تامين لنيشي اوچون جدي مذاكره لرني دوام ايتيريشي لازم دير ديب ايتكن.
سونگي كونلرده طالبان جنگچي لري و ملي اردو قوتلري ارا قتيغ جنگ لر مملكت ده دوام ايتماقده. بو جنگ لر دوام ايتيشي بيلن عيني زمان ده عادي اهالي تلفات ساني هم مملكت ده كوپيگن.