هرات ولايتي نورم و استادارد اداره سي گه كوره اوتكن ايككي آي جريانيده بو ولايت ده اينگ آز ٥٠ تانكر صفت سيز ياقيلغي ماده لر و گاز وارداتي الدي آلينگن ديب اعلان قيلگن.

بو اداره شونينگ ديك ياقيلغي ماده لر واردقيلوچي ٢٠ شركت جوازنامه سي ني صفت سيز ماده لر وارد قيلگني سبب بيكار قيلينگني دن خبر بيرگن.

عيني حالده هرات يشوچي لري نفت و گاز وارداتي بويچه جدي نظارت بوليشي ني طلب ايتماقده لر.

اهاليگه كوره صفت سيز ياقيلغي ماده لر نقليه واسطه لريگه صدمه يتكزيش دن علاوه، مردم ساغليگي و اطراف محيط افلاس ليگي گه بيواسطه تاثير يتكزماقده ديب فكر بيلديرگن لر.

هرات ده هركوني٢٠٠ تانكر ياقيلغي ماده وارداتي

هرات، تركمنستان و ايران بيلن چيگره داش بولگني سبب، مملكت ده ياقيلغي ماده لر وارداتي اوچون اينگه ييريك بندر سنله دي.هرچند هر كوني اسلام قلعه و تورغندي بندرلري آرقلي يوزلب تانكرلر ياقيلغي ماده لر هرات گه تاشيدي و  بو موضوع افغانستان اهالي سي كونده ليك احتياجليك لريني تامين لنيشي و نرخ لر اوزگرمسليگي گه كتته تاثيري باردي اما انده سنده تقلبكار سوداگرلرگه صفت سيز ماده لرني مملكت گه وارد قيليش ده هم زمينه يرته آله دي.

اما حاضر هرات ولايتي نورم و استدرد اداره سي سوداگر ايندي بونداي فرصت لردن استفاده قيله آلميديلر ديب ايتكن.

بو اداره ريسي آصف عليزي گه كوره بو اداره تورت مينگ گه يقين استندرد نمونه لريگه ايگه بولگني گه قرگنده، برچه نفت ، گاز ، قوريليش ماده لر و تورلي خيل وارداتي اشيالر صفتي ني سينش و كنترول قيليش گه قادر بولگن.

اوني معلوم قيليشيچه يالغيز اوتكن ايككي آي جريانيده كيرك بولگن استندردگه ايگه بولمگن اينگ آز ياقيلغي ماده لر تاشوچي ٥٠ تانكرني صادر بولگن مملكت گه قيتريب يوبارگن ميز ديدي.

اهالي صفت سيز ياقيلغي ماده لر وارد بوليشي دن تشويش ده

نورم و استدرد اداره سي مسولي هرچند ٥٠ تانكرني قيتيريب يوباريلگني دولت عايداتي گه ٥٨ ميليون افغاني صدمه يتكزگن ديدي اما هنوز گه چه بو اداره اهالي ايشانچي ني بوتكل حاصل قيليش دن بير آز فاصله سي بار ديب ايتي.

هرات يشوچي لريني ايتيشيچه هلي همان صفتلي گاز و ياقيلغي ماده لرني بازاردن ساتيب آليش بير معما دير و بو صفت سيز ماده لر نقليه واسطه لريگه صدمه يتكزگن.

عزيزاحمد نوري گه كوره ياقيلغي ماده لر صفت سيز ايكني اوچون نيچه مراتبه موتري بوزيليب تيلي ني بوشتيشگه مجبور بولگن من ديدي.

هرات يشوچي لريدن ينه بيري فريد بهنام هم صفت سبز ياقيلغي ماده لر نقليه واسطه لرگه صدمه يتكزيش دن اوتر شهر هوا سي و اطراف محيط افلاس ليگي گه توللب بولمس ضربه يتكزگني ني تاكيدلشكن.

حاضرچه ليك هر كوني اينگ آز ٢٠٠ تانكر ياقيلغي ماده تركمنستان و ايران دن هرات گه كيلتيريله دي.

هرات ولايت حاكمي سوزلوچي سي جيلاني فرهادگه كوره محلي اداره ايككي مملكت چيگره لريده صفت سيز ماده لرني انيق لنتيروچي زمانوي اسباب اسكونه لرني اورنتيليشي دن خبر ببرگن.

هرات ولايتي نورم و استندرد اداره سي اختياريگه حاضرچه قوريليش، نفت و گاز، ييمليك اشيالر، دهقانچيليك محصولات و باشقه بير قطار اشيالردن قريب تورت مينگ استدرد باردير كه واردات و صادرات بوله ياتگان ماده و اشيالرني كنترول قيليش گه قادر دير.