طالبان اوچ كون هيت ده آتش كيسيم اعلان ايتيلر
neshananews
10 May 2021طالبان گروهي كيله سي اوچ كون هيت اوچون آتش كيسيم اعلان ايتيلر. بو گروه رهبريتي اوز جنگچي لريگه هيت كونلريده هرقنداي هجوم دن قول تارتيش لريني حكم قيلگن.
طالبان نينگ قطرده گي سياسي دفتري سوزچيسي محمد نعيم وردك بوكون ( دوشنبه ٢٠ ثور) بير خبرنامه نشر ايتيب طالبان رهبري ملا هبت الله آخوندزاده دن نقل قيليب هيت نينگ اوچ كونيده آتش كيسيم اعلان ايتكني دن خبر بيرگن.
وردك جنابلريگه كوره بو گروه رهبري بويروغيگه اساسا طالبان نينگ برچه منطقه لرده گي جنگچيلري هجوملريني توختتيش لري كيرك. طالبان خبرنامه سيده اگر بوگروه جنگچي لري ملي اردو قوتلري تمانيدن هجوم آستيده آلينسه لر اوزلريدن مدافعه قيليش ده حركت قيليش لري لازم ديب ايتكن.
بو اعلاميه ده شونينگ ديك طالبان رهبري بويروغيگه مطابق طالبان نينگ هيچ بير جنگچي سي دولت حاكميتي آستيده بولگن منطقه لرده بارمي و دولت قوتلريني هم اوز منطقه لريگه كيليش گه رخصت بيرمسليك لريني تاكيد لشكن.
طالبان بو اعلاميه سيده هيت نينگ اوچ كونيده مملكت اهالي سيگه ايشانچلي تينچ فضا ايجاد ايتيليشي اوچون بو آتش كيسيم ني اعلان ايتكني ني ايتكن. بوندن آلدين افغانستان حكومتي و جهان جماعه سي طالبان دن آتش كيسيم تامين لنيشي ني باربار طلب ايتكندي اما بو گروه بو طلب لرگه رد جواب بيرگنديلر.
