طالبان گروهي رهبري ملا هبت الله اخوندزاده رمضان هيتي مناسبتي بيلن نشر ايتكن پياميده خارجي قوتلرني چيقيشي دن سونگ افغانستان ده بير هرتمان له مه اسلامي تيزيم تشكيل ايته ميز ديب ايتكن.
طالبان رسمي سايتي بوكون ( يكشنبه ١٩ ثور) ملاهبت الله اخوندزاده ني رمضان هيتي مناسبتي بيلن پيامي ني نشر ايتكن. اخوندزاده جنابلري بو پياميده تاكيدلشكن طالبان صلح مذاكره لريگه جدي اعتبار قرتماقده و شو سبب دن بير صلاحيتلي هيات ني افغانستان دولتي بيلن صحبت لش اوچون تعين لشكن.
ملاهبت الله علاوه ايتكن خارجي قوتلرني افغانستان دن چيقيشي دن سونگ طالبان مملكت ده بير هرتمان له مه اسلامي تيزيم تشكيل ايتيش ده تيارگرليك الگن.او استانبول يغيني توغريسيده ايتكن كه طالبان افغانستان جاري اوروشي نينگ بيرتماني دير و افغانستان تينچليگي اوچون قوريله جك هر بير يغين نينگ تفصيلاتي طالبان بيلن شريك بوليشي لازم.
طالبان رهبري اما بو گروه نماينده لري استانبول يغينيده اشتراك ايتيشي يا ايتمسليگي حقيده ايضاح بيرمگن. آخوندزاده ينه بيربار امريكا دن دوحه كيليشوي اساسيده حربي قوتلريني افغانستان دن عملي قيليشي ني طلب ايتكن. اونگه كوره بو كيليشونامه افغانستان ده اوروشني يكونلنتيريش اوچون مناسب زمينه دير.
طالبان رهبري عيني دمده بو گروه جنگچيلريگه عادي اهالي قتلي دن قول تارتيش لريني تاكيدلشكن اما هيت كونلريده آتش كيسيم تامين لنيشي باره سيده بيران نرسه ايتمگن.
افغانستان ايچكي ايشلروزيرليگي معلوماتيگه كوره يالغيز جاري رمضان آيي ده توقنشولر، لارتلشلر و طالبان تمانيدن آتيلگن هاوان لر جريانيده عادي اهالي دن تورت يوز كيشي اولديريلگن.