قندهار ولايتي امنيتي مسوللري، طالبان نينگ ٤٠ گه يقين جنگچي لري بو ولايت ده اردو و پوليس قوتلري نينگ مدافعوي عملياتلري نتيجه سيده اولديريلگني ني اعلان ايتكن.

قندهار پوليسي بوكون ( چهار شنبه ٢١ عقرب) نشر ايتكن خبرنامه سيده بو جنگچي لر اوتكن ٢٤ ساعت دواميده  ژري، ميوند و پنجوايي تومنلريده اولديريلگني دن خبر بيرگن. خبرنامه گه كوره طالبان نينگ اينگ آز اون سكيز جنگچي سي هم بو عمليات لرده ياره لنگن.

قندهار پوليسي خبرنامه سي ده بو جنگچي لر اردو و پوليس قوتلري پوسته لريگه قرشي اويشتيرگن هجوم و امنيتي بوتلر مدافعوي عمليات لري جريانيده اولديريلگني تاكيد لنگن. بو توقنشولر جريانيده شونينگ ديك طالبان نينگ اونلب آغير و ينگيل قوراللري و تورت نقليه واسطه سي هم نابود بولگني خبرنامه ده قيد ايتيلگن.

طالبان گروهي حاضرگه قدر بو باره بيران نرسه ايتمگن.

قندهار ولايتي ده سونگي كونلرده طالبان ورامنيتي قوتلر ارا توقنشولر شدت آلگن. ملي مدافعه وزيرليگي اوتكن ايككي هفته جريانيده طالبان جنگچي لريدن اينگ آز ٥٠٠ كيشي اولديريلگني ني ايتكن.

قندهار ولايتي ده توقنشولر اونداي بير حالده شدت آلگن كه افغانستان دولتي و طالبان گروهي نينگ مذاكره قيلوچي هيات لري ارا تينچليك بويچه صحبت لر بوندن ايككي آي آلدين قطرده باشلندي. بو مذاكره لر باشلنگني و دوام ايتيشي مملكت ايچكري سيده توقنشولرني كمتيريش ده تاثير يتكزه آلمدي.