افغانستان شمال و شمال شرقي ولايتلريده طالبان هجوملري كوپيگني آرتيدن، ببر قطار دين عالملري، مدني فعاللر و ولايت كينگاشي اعضالري، بو هجوملر كوپيگني دن تنقيدلب طالبان گروهي ني صلح بيتمي ماده لريني آشكارا اياغ آستيده قويشگه عيبلب طالبان گروهي نينگ بو عملي دوام ايتيشي ني افغانستان ده تينچليك تامين لنيشي بويجه بو گروه ني وعده گه وفا قيلمس ليگي دن درك بيرر ديب اعلان ايتكن لر.

 طالبان گروهي اوچ كون دن بيري نيچه ولايت تومنلريده هجوملريني آرتيريب شدت بيرگن، بو وضعيت افغانستان اهالي سي ني صلح و تينچليك گه ايريشيس اميدلريني چيپك گه چيقريب و طالبان نينگ زوروانليك لرني كميتيريش وعده لريگه نسبتا اهالي ني ايشانچسيز لنتيرگن.

 طالبان و امريكا ارا امضالنگن كيليشو بيتيم اساسيده طالبان، زوروانليك لرني كميتيريش و افغانلر ارا سوزلشو و مذاكره باشلنيشي اوچون امريكا تمانيگه ايريم ضمانت لرني بيريب و اوني اورنيده افغانستان حكومتي هم طالبان نينگ محبس ده گي بيش مينگ محبوسلريني قويب يوباريليشي گه وعده قيلگندي.

 هرچند افغانستان حكومتي طالبان محبوسلريني قويب يوباريليشي اوچون ايجابي آديم لرني كوتارگن اما بو گروه افغانستان حكومتي ني تينچليك طلبانه حركتلريگه اعتنا قيلمي اوز هجوملريني كوپيتيرماقده.

 دين عالملريگه كوره صلح اوچون بيريلگن وعده لرگه عمل قيليش اسلام مقدس ديني نقطه نظردن قبول قيلينرلي عمل دير و طالبان گروهي نينگ بو حركتي دين حكملري گه اشكارا قرشي ليك كورستيش دلالت بيره دي.

 بدخشان ولايتي دين عالملريدن بيري مولوي محب الله شريفي اسرا سوره سي ٣٤ نچي آيتي گه اشاره قيليب ديدي؛ عهد گه وفا قيليش هربير مسلمان نينگ ديني مسوليتي دير و بو مسوليت ني اياغ آستيده قويش، دين بويروغلريگه ضديت كورستيش ني انگلته دي.

 اوني ايتيشيچه طالبان صلح كيليشو گه بنا” زورانليك لرني كميتيريش لري كيرك و افغان لر ارا تينچليك مذاكره لر باشلنيشي بيلن افغانستان ده ييللرچه دوام ايتكن بو قانلي اوروش گه نقطه قويش لري لازم.

 اما بو گروه جنگچي لري نينگ هجوملري كوپيگني، طالبان بيرگن وعده لريدن هيچ بيريگه وفا قيلمس ليك لريدن دلالت بيره دي.

جوزجان ولايت كينگاشي اعضالريدن بيري مولوي حميد هم طالبان گروهي هجوملري كوپيگني ني قاره لب ديدي؛ ديني اعتقادلرگه اساسا” مسلمان اوز وعده سيگه خطا قيلمسليكي لازم اما طالبان گروهي بو عملي بيلن برچه اخلاقي، انساني و اسلامي قدريت لر اوستيگه اياغ قويماقده. جوزجان ولايت كينگاشي نينگ بو اعضاسيگه كوره زوروانليك، اوروش پرورليك و صلح ستيزليك اسلامي تعليمات گه ضد دير و طالبان گروهي اسلام مقدس ديني اصول و بويروغ لري اساسي ده صلح گه اولويت ببريب افغانستان ده قان توكيليش و زروانليك بساطي ني يغيش لري كيرك.

مولوي حميد جنابلري تاكيد ليدي؛ طالبان گروهي و افغانستان حكومتي صلح اوچون تاپيلگن فرصت دن توغري استفاده قيليب بو اوزاق مدتلي اوروش ني يكونلنتيريشي لازم.

 عيني دمده بدخشان مدني فعاللريدن بيري عبدالبصير وثيق ديدي؛ طالبان گروهي هجوملريني كوپيتيريش بيلن كوپراق امتياز آليش آرتيدن چيققن و بو ايش بيلن صلح و تينچليك مذاكره لري جريانيده اوز اصلي مقصدلريگه ايريشيش ني نيت قيلگن.

 وثيق جنابلري مملكت ده كين كولم ده سياسي اجماع بولمگني و سياسي تارتيشولر سبب طالبان اورته گه چيققن فرصت دن اوز منفعت لري اوچون استفاده قيليب و افغانستان سياستچي لري بو وضعيت گه دقت اعتبار قرتمسه لر طالبان تمانيدن يولگه قويلگن هجوملر افغانستان حكومتي ني كتته كان معما لرگه دجار قيليشي ممكن ديدي.

 شونينگ ديك تخار ولايتي دين عالمي مولوي مخلص تالقاني امنيتي قوت لرگه قرشي طالبان هجوم لري كوپيگني، صلح پروسيگه زيان يتكزيب و مردم نينكگ طالبان گه نسبتا ايشانچ لري ميزاني ني كميتيره دي ديب تاكيد لشكن.

بو دين عالمي بيرطرف دن افغانستان حكومتي بير سياسي اجماع ني ايجاد ايتيش بيلن حكومت اورني ني صلح مذاكره لريده قوللب قوتلشي كيرك و باشقه تماندن طالبان دين اصول و بيروغ لريگه اساسا” تينچليك ني تامين لنيشي اوچون وعده لريگه وفا قيليشي لازم ديدي.

 هرچند افغانستان حكومتي صلح بيتيمي حرمتي ده امنيتي قوتلرني مدافعوي حالت ده سخلگن اما طالبان جنگچيلري هجوملري كوپيشي بيلن بو قوتلرني بو حالت دن چيقريب فعال مدافعوي حالت گه بوبروغ بيرگن.

 هرچند طالبان و امريكا ارا امضالنگن بيتيم گه اساسا”بو گروه افغانلر ارا مذاكره لر باشلنيشي اوچون هجوملريني كميتيرش ده قرار آلگندي اما بو گروه امضالگن كيليشونامه گه ضد افغان امنيتي قوتلرگه قرشي هجوملريني كوپيتيرگن.

ليكن افغان امنيتي قوتلر صلح كيليشو نامه سي حرمتي اوچون فعال مدافعوي حالت ني اختيار قيلگن.