هرات ولايتي پشتون زرغون تومنيده امنيتي قوتلر و طالبان جنگچي لري ارا توقنشولر ايككينچي كونيده طالبان جنگچي لريدن اينگ آز ١١ كيشي اولديريلگن.

مملكت غربيده ظفر ٢٠٧ قول اردوسي مطبوعات بوليمي نشر ايتكن خبرنامه سيده طالبان جنگچي لريدن بير گروه اوتكن كيچه( يك شنبه ٢٥ عقرب) پشتون زرغون تومني ني ” ده شيخ ” منطقه سيده جايلشكن ملي اردوني پوسته سيگه هجوم اويشتيرگن و بو هجوم امنيتي و مدافعوي قوتلر تمانيدن دفع ايتيلگن و بو توقنشوده طالبان جنگچي لريدن ١١ كيشي هلاك بوليب و آلتي جنگچي هم ياره لنگني تاكيد لنگن.

خبرنامه گه كوره بو توقنشو جريانيده طالبان نينگ بير مقدار قورال يراقي هم بين دن كيتكن. اما طالبان تماني حاضرگه قدر بو باره ده بيران نرسه ايتمگن.

اوتكن ايككي كون جريانيده بو ايككينچي بار دير كه هرات ولايتي پشتون زرغون تومني ده طالبان گروهي و ملي اردو قوتلري ارا توقنشو يوزبيرماقده. اوتكن كون يوز بيرگن توقنشوده هم طالبان نينگ آلتي جنگچي سي اولديريليب و اوچ جنگچي سي ياره لنگندي.