طالبان نينگ ١٨ جنگچي سي زابل و ارزگان ده اولديريلدي
neshananews
17 November 2020اتل٢٠٥ قول اردوسي، زابل و ارزگان ولايت لريده ملي اردونينگ يير و هوا هجوملريده طالبان نينگ اينگ آز ١٨ جنگچي اولديريلگني دن خبر بيرگن.
اتل قول اردو سي مطبوعات بوليمي بوكون ( سه شنبه ٢٧ عقرب) نشر ايتكن خبرنامه سيده طالبان نينگ بو جنگچيلري زابل ولايتي ني شملزي تومني و ارزگان ولايتي ني دهراود تومنيده ملي اردو قوتلري قرارگاه لريگه قرشي اويشتيرگن هجوملري جريانيده اولديريلگني ني تاكيدلشكن.
خبرنامه گه كوره طالبان نينگ ١٢ حنگچي سي اوتكن كيچه ملي اردو قوتلريني دهراود تومنيده گي بير پوسته گه قرشي اويشتيرگن هجومي دن سونگ ملي اردو اوچاق لري تمانيدن نشان گه توتيلگن. خبرنامه ده بو هجوم ده طالبان نينگ كوپ مقدار ده قورال يراق لري هم نابود بولگني تاكيدلنگن.
اتل قول اردوسي مطبوعات بوليمي شونينگ ديك زابل ولايتي شملزي تومنيده اردو قوتلري و طالبان جنگچيلري ارا اوتكن كيچه يوز بيرگن توقنشوده بو گروه ني آلتي جنگچي سي هلاك بوليب و اوچ قوراللي ياره لنگني دن خبر بيرگن.
سونگي ايككي آي جريانيده زابل، ارزگان، هلمند و قندهار ولايتلري امنيتي قوتلر و طالبان جنگچي لري ارا قتيغ توقنشولرگه صحنه بوليب كيلگن. ملي مدافعه وزيرليگي گه كوره بو گروه بو ولايتلر مركزلريني تصرف ايتيش ني قصد قيلگندي اما مملكت امنيتي و مدافعوي قوتلري قوشمه چاره تدبيرلي آرتيدن بو گروه گه آغير تلفاتلر يتكزيلگن. اما طالبان تماني دوحه مذاكره لري باشلنكني دن سونگ افغانستان حربي قوتلريگه قرشي هجوملريني كميتيرگني ني ادعا قيليب و يالغيز ملي اردو قوتلري، منطقه لرني طالبان دن تازه لش اوچون يولگه قويلگن عمليات لر آلديني آليش اوچون بو گروه جنگچي لري مدافعوي حركتلرني بحريشي ني ادعا قيلگن.
