طالبان گروهی نی بغلان ولایتی دهگی استخبارات معاونی توتقین ده آلیندی
بغلان ولایتی امنیتی مسووللریگه کوره طالبان گروهی نی استخبارات اداره سی معاونی قاری صلاح الدین تورت یولداشی بیلن بیرگه مرکزی بغلان اولسوال لیگی نی « شهر کهنه » منطقه سیده توتقین ده آلینگن.
بغلان پولیسی سوزچیسی احمدجاوید بشارت رسانه لر بیلن صحبت ده دیدی قاری صلاح الدین اوتکن کونی ( جمعه ۲۵ میزان) بیش میل قورال بیلن بیرگه توتقین ده آلینگن.بشارت جنابلرینی معلوم قیلیشیچه قاری صلاح الدین یولداش لری بیلن کندز ـ بغلان شاه یولیگه قرشی هجوم اویشتیریش نی قصد قیلگن ایکن. او، طالبان گروهی استخبارات معاونی یوک تاشوچی نقلیه واسطه لردن باج آلیش ده هم دخلدار ایکنی نی تاکیدلشدی.بشارت جنابلری بو شخص بغلان ـ کندز شاه یولیده تروریستی هجوم لرنی اویشتیریش ده قولی بارلیگی نی هم ایتکن.
بغلان ولایتی مملکت مرکزی نی شمال و شمالشرق ولایت لری بیلن باغله یاتکان ولایت دیر. بو ولایت دولت مخالف گروه لری دقتی نی اوزیگه جلب ایتکن ولایت دیر و دایم ناقرارلیک لرگه گواه دیر. طالبان حاضرگه قدر بو باره ده بیران نرسه ایتمگن.