عبدالحكيم عسكر : جماعه بير كتته عايله دير
neshananews
04 February 2020بير بولوتلي و ياغمير ياغه ياتگان كون ده دوهم سارن عبدالحكيم بيلن اوروش ميدانيده تانيشديم.شدتلي اوروش دوام ايتيب تورت تمانميزني اوق و اوت الگن پيتده اوني بيلن همصحبت بولديم. او تازه جوزجان ده پوليس صفي گه قوشيلگن و شونينگ اوچون اوروش و جاري وضعيت حقيده اوني حكايه و قصه سي فرقلي دير.
عبدالحكيم باشقه عسكرلرديك وطن اوچون كورشيب اوق و اوت مقابليده سينه ني قلقان قيلكن. او شو خطرني سيزيب امنيتي قوتلر صفي گه قوشيليب اولكه و مردمي اوچون اوروشماقده.
عبدالحكيم تورت آي آلدين جوزجان ولايتي فيض آبادتومني امنيه قوماندان ليگي ده خذمت قيله باشله گن.
اوروش شدت بيلن دوام ايتيش چاغيده، عبدالحكيم بيلن همصحبت بولديم. احتمال جاري وضعيت عبدالحكيم و سنگرداشلريني اوچون اونچه ليك فرقلي بولمه سه چونكه بو منطقه هر كون اوروش و توقنشوگه گواه دير.
فرصت آز، حربي عمليات دوام ايتماقده، يقين و اوزاق دن اوق سيسي ايشيتيله دي. عبدالحكيم باشقه همكسب لري بيلن سنگرده، بيرينچي سواليم ني اوندن بونداي سوره ديم؛ نيگه پوليس بوليش ني تن آلگن؟
عبدالحكيم بير لحظه هم اويله مي درحال آچيغ قباغ و توله ايشانچ بيلن جواب بيردي:” باله ليك دن عسكر بوليش ني سيور ايديم و پوليس صفي گه قوشيليش ني آرزو قيلرديم، اما حيات بو فرصت ني مهيا قيلمه دي، كوپ سعي و حركت و تورت آي ليك مسلكي تعليمات ني اوتكزگندن سونگ بو اولكه نينگ بير جانفدا عسكري اوله راق خذمت ني باشله ديم”.
افغانستان ده عموما اهالي دن نيگه بو ايش ني تن لگني سورلگنده، اكثريت ني جوابي باله ليك دن بوايشگه رغبتم باردي ديب ايته ديلر و بو موضوع بير عنعنه و كليشه بوليب قالگن، اما حربي ايشلر بيلن شغللنه ياتگان كيشي لر موضوع سي فرقلي دير، چونكه اولكه گه چين دل دن خذمت قيليش اوچون رغبت بولمه سه، هيچ كيمسه آسان ليك بيلن حربي ايشلرني قيينت تعليمات و مشق لريده موفقيت قازانه الميدي.
اوز اولكه سي قدريتلريدن مدافعه ايتيش اوچون وظيفه بجره ياتگان عبدالحكيم ديدي:” مين بوتوپراق و موجود دولت دن محافظت قيليش و افغانستان ملي منفعتي اوچون پوليس صفي گه قوشيليب اولكه ام ني ياولريگه ايتماقچي من كه هيچ قچان بو ملك بيرليك و اتفاقي و انتظامي ني برهم بيره آلمي سيزلر”.
دوهم سارن عبدالحكيم اوچ فرزند آته سي دير .عايله سي قنچه ليك پوليس صفي گه خذمت قيليش دن راضي مي ديب سواليم گه بونداي جواب قيتردي:” عايلم وطنم ميزگه خذمت قيليشم دن منگه فخرلنديلر. وطن و مردم گه خذمت قيليش در حقيقت فرزندلريم و تورموش اورتاقم گه خذمت قيليش دير، اگر مين اولكه ام و مردمم ني امنيتي ني تامين لي آلسم اصل ده اوز عايله ام خوفسيزليگي ني تامين لشگن بوله من”.
عبدالحكيم بير عسكر اوله راق جماعه ني بير عايله ديك بيله دي، اوني بو سوزي سعدي ني مشهور بيتي ني ايسلته دي ” بني آدم بيربيري نينگ اعضا سي دير”
اوزاق لردن آغير قورال لر سيسي كيله دي اما عبدالحكيم اوز سوزلريني دوام ايتيريب آرزو لريدن گپ لشه دي:” اميد باركه دولت مخالف لري اوزگه لردن الدنمي، وطن ميز اوز اياغي اوستيگه توختش گه قادر بوليشي اوچون باله و ياشلرگه درس اوقيش و تينچليك بيلن مكتب باريش گه رخصت بيرسين لر”.
افغانستان دولتي نينگ حربي قوتلري، پوليس صفي گه بولسه مي يا اردو يا ملي امنيت صفي گه هر كون اوروش ميداني گه حاضرديرلر.اولر دايم دولت نينگ قوراللي مخالف لريگه قرشي كورش ده تيارديرلر و بو وطن ني هر بير قريش توپراق دن مدافعه ايتيش دن ايه ميديلر. عبدالحكيم ني ايتيشيچه مين و مملكت ني برچه امنيتي قوتلري ياولر مقابلي ده كورشيش دن هيچقنداي خوف و تشويش ميز يوق.يوقاري روحيه و تيارگرليك گه ايگه ميز و كورگن تعليمات لرگه اساسا هر بير شرايط ده اولكه ميزنينگ قسم ايچكن ياولريگه قرشي كورش ده تيارميز ديدي.
او دولت مخالف لريگه قويدگيچه پيامي ني غرور و صلابت بيلن بونداي بيان ايته دي:” دولت قوراللي مخالف لري قوراللريني ييرگه قويب افغانستان خلقي بيلن صلح قيليش لري لازم، اگر بوايش ني قيلمه سه لر بيز سونگي نفس و سونگي اوق ميز گه چه اولر مقابلي گه توختب اولكه ميز، توپراق ميز و ننگ و ناموس ميزدن مدافعه ايته ميز”.
اوروش استه سكين شدت الدي و امنيتي قوتلر دشمن گه قرشي كتته راق عمليات ني باشلش لري لازم ، شوني اوچون عبدالحكيم بيلن بوندن كوپراق صحبتلشده فرصت قالمدي.او تنلگن وظيفه سيگه بنا” اوروش ميداني گه باريشي شرط.عبدالحكيم بيلن خيرلشديم او غلبه دن توله تبسم بيلن قوليم ني قوليگه توتيب ” يشه سين افغانستان خلقي” ديب سنگرداشلري صفي گه قوشيليب كيتي.
