غور ولايتي ده نيچه كوندن بيري ياغگن قلين قار، اينگ آز آلتي اولسوال ليك ني ولايت مركزي بيلن يول لريني ياپكن و محلي ملازملر طالبان ممانعتي سبب بو يول لرني آچيش گه قادر ايمس لر  و حاضرچه بو اولسوال ليك لرگه قول تاپيش اوچون هيچ بير يول يوق ديب ايتيشماقده لر.

طالبان يول لرني اچيليشي گه قرشي

غور ولايتي عامه منفعت لر اداره سيگه كوره حاضرچه بو ولايت نينگ جنوب غربيده جايلشكن آلتي اولسوال ليك ني ولايت مركزي بيلن باغلگن يول لري بوتكل ياپيلگن.

بو اداره ريسي عبدالمجيد صميم، عامه منفعت لر اداره سي خادملري آخرگي قار دن سونگ بيرقطار تومن يول لريني ترافيك يوزيده آچيديلر اما بو ولايت جنوبغربيده جايلشكن آلتي اولسوال ليك يول لريني آچيشي گه قوراللي طالبان ممانعت قيلماده ديب ايتي.

صميم جنابلريني ايتيشچه كورينيشي دن طالبان بو آلتي تومن يول لري اچيلگن تقديرده، امنيتي قوتلر بو محل لرده طالبان گه قرشي حربي عمليات يولگه قويليشي دن تشويش ده ديرلر.

غور عامه منفعت لر اداره سي ريسي بو موضوع، مركزي حكومت و محلي اداره بيلن اورته گه قويلگني دن خبر بيريب اما حاضرگه قدر بو معماگه بيران ايچيم يول و چاره تدبير قول اوستيگه آلينمگن ديدي.

 بو وضعيت منفي ١٥ درجه ساوغليك ده بو آلتي تومن يشوچي لريگه كتته قينتچليك لر توغديرگن، حاضرچه غور ولايتي نينگ فقط تورت اولسوال ليگي يولي ترافيك يوزيگه آچيق؛ اما ساغر، تولك، شهرك، پساوند، تيوره و دولينه اولسوال ليك لر يشوچي لري نينگ غور ولايت مركزي بيلن علاقه و باردي كيلدي سي كيسيليب قالگن.

آخركي كون لرده ياغگن قلين قار و يول لر ياپيلگني ياقيلغي ماده لر، داري وآذوقه كمچيليگي گه سبب بولگني ني غور يشوچي لري اورته گه قويب اگر يول لر آچيل مه سه انساني فاجعه يوزبيريشي دن آگاهلنتيره ديلر.

غور مركزيده اخبارات واسطه لريدن بيريده فعاليت قيلاتگان منصور خسرو ، بو اولسوال ليك لردن قولگه كيلگن معلومات لرگه كوره اهالي ني حاضرچه بشري ياردم لرگه احتياجي جدي ديب ايتماقده.

اونگه كوره بعضي تومن لرده مردم نينگ آذرقه سي توگه گن و اوي لريني ايسيتيش و آذوقه پيشريش اوچون ياقيلغي ماده لر تمام بولگن.

بو محلي خبرنگارني معلوماتي گه كوره يول لري ياپيلگن تومن لرده بيرقطار باله و چقلاق لر قيزه ماق كسل ليگي گه چاينگن و دارو درمان گه احتياج، يول لر ياپيلگني سبب جدي سيزيلماقده.

اهالي، مسول لرني تدبيرسيزليگيدن عذابگه

غور ولايتي محلي ملازم لري بو فاجعه اصلي سببي ني بير قطار اداره لرني تدبير سيزليگيدن اوزگه نرسه ايمس ديب ايتماقده لر.

غور ولايت حاكمي سوزلوچي سي، يول لرني آچيلمس ليگي گه اساسي توسيق يالغيز طالبان ايمس بلكه محل يشوچي لري هم كتته كان توسيق گه ايلنگن ديدي.

عبدالحي خطيبي گه كوره هر ييلي محلي اداره،بو يول لرني آچيش اوچون محل يشوچي لري بيلن كيلشيب ايشلشگن آدم لرگه پول بيرردي، اما جاري ييل ده ديمك بو شرطنامه باشقه بير كمپني بيلن امضالنگن.

 حاكم سوزلوچي سي هرچند بو شرطنامه ني بيكار قيليش اوچون حاضر بيران چاره يوق اما مذكور كمپني اهالي بيلن بيران مناسب كيليشو گه قول تاپيشي ني بيز هم كوتماقده ميز ديب تاكيد لشدي.

ليكن بو كيليشو قنچه مدتده حاصل بوليشي و بو مدت ده اهالي قندايين قيينتچليك لرگه غالب چيقيشي اساسي معما دير.

   غور افغانستان نينگ تاغليك و ساووق ولايتلري جمله سيدن دير و هرييلي ياغينگرچليك خصوصا قلين قار يغيشي گه گواه دير و  قيش موسومي ده قلين قار ياغيشي آي لرچه يول لرني ياپيب اهالي گه كوپ گينه قيينت چليك لر يرته دي.

هرچند محلي رسمي لر وضعيت ني كنترول قيليش اوچون آلدين دن تيارگرليك آلينگني ني اعلان ايتكنديلر، ليكن كورينيشي دن ريجه لنكن لايحه لر ناقص ايكني ني كوزتوچي لر اورغوليديلر.

 غور ولايتي جنوبغربيده جايلشكن آلتي اولسوال ليك يول لري تيزليكده آچيلمي قالگن تقديرده بو ولايت ده بيران انساني فاجعه يوز بيريشي دن تشويش لر هم ينگره ماقده.