كرونا ويروسي خطري/ بدخشان چيگره حدودلريده ٥ ساغليك ني سخلش گروه وظيفه لنتيريلگني
neshananews
05 February 2020كرونا ويروسي ترقلگني دن خلق ارا تشويشلر كوپيگني و ساغليك ني سخلش خلق ارا تشكيلاتي تمانيدن فوق العاده حالت اعلان ايتيلگني آرتيدن، افغانستان حكومتي مملكت نينگ تورلي منطقه لريده، كرونا ويروسي افغانستان ايچكري سيده انتقال تاپيشي آلديني آليش مقصدي بيلن وقايوي چاره تدبيرلر قول اوستيگه آلگن.
اينگ سونگي تدبير گه اساسا بدخشان عامه ساغليك اداره سي تاجيكستان بيلن چيگره داش بولگن حدودلرده بيش گروه ني، بو ويروس تاجيكستان و چين دن افغانستان گه انتقال تاپيشي آلديني آليش اوچون وظيفه لنتيرگن.
بدخشان عامه ساغليك اداره سي مسوللري گه كوره بو ولايت چين و تاجيكستان بيلن چيگره داش بولگني سبب كوپ خطر بيلن يوز مه يوز دير، شونينگ اوچون بو اداره صحي گروه لرني چيگره حدودلريده جايلشتيريب، چيگره منطقه لريده قتنه ياتگان كيشي لردن طبي سينو آليب شبهه لي شخصلرني تانيب ساغليك ني سخلش مراقبت لر آستيده النيشي ني ريجه لنتيرگن.
بدخشان ولايتي عامه ساغليك اداره سي ريسي شفاكار نور خاوري ني ايتيشيچه بو اداره بيش گروه ني بدخشان و تاجيكستان ارا جايلشكن چيگره لرده جايلشتيريب تاجيكستان دن افغانستان گه كيله ياتگان كيشي لرني تيكسيرو دن اوتكزماقده.
اوتكن ييل لرده بدخشان نينگ چيگره حدودلريده يشه ياتگان اهالي قيينتچليك لرني برطرف ايتيش مقصد ده بو منطقه لرده بيش كوبريك قوريلگن؛ ايندي بو كوبريك لر آرقلي اهالي نينگ باردي كيلدي سي بدخشان ساغليك ني سخلش مسوللريني كرونا ويروسي انتقال تاپشي اوچون تشويش گه سالگن.
اما بدخشان ساغليك ني سخلش اداره سي ريسي چيگره حدودلريده وظيفه لنتيريلگن گروه لر كرونا ويروسي گه چلينكن شخص لرني انيق لش اوچون طبي اسباب اسكونه لر كمچيليگي دچار دير و بو اداره افغانستان عامه ساغليك وزيرليگي دن بو توغريده همكارليك قيليش ني طلب ايتكن ديدي.
بدخشان عامه ساغليك ريسي گه كوره عامه ساغليك وزيرليگي بو كمچيليك لرني برطرف ايتيب كيرك بولگن طبي جهازلرني تيزليكده بو گروه لرگه يتكزيب بيريش ني وعده قيلگن.
خاوري جنابلري ديدي محل ده وظيفه لنتيرگن گروه لر بو ويروس نينگ مثبي واقعه لريني تاپكن تقدير ده اولرني اوشه محل ده قرنطين قيليب بو شخص لرني دوالنيشي اوچون فيض اباد مركزي كسلخانه سيده ايجاد ايتيلگن مخصوص مركزده امبولانس لر آرقلي انتقال بيريليشي نظرده آلينگن.
باشقه تماندن بدخشان ولايت حاكمي سوزلوچي سي نيك محمد نظري، محلي حكومت كرونا ويروسي انتقال تاپيشي آلديني آليش اوچون برچه امكانيتلريدن فايده لنيشي دن سوز بيرگن.
نظري جنابلريگه كوره چين و تاجيكستان بيلن چيگره داش بولگن برچه منطقه لرده ساغليك ني سخلش گروه لر وظيفه لنتيريلگن و ساغليك ني سخلش گروه لر بولمگن محل لرده چيگره قوريقچي قوتلرگه موجود امكانيتلردن فايده لنيب بو ويروس گه چلينگن شخص لرني انيق لشده سعي قيليش لري بويريلگن ديب ايتي.
نظري جناب لريني ايتيشيچه تاجيكستان و افغانستان چيگره سي ده گي افغان چيگره قوريقچي كوچلر، بدخشان محلي اداره سي بيلن علاقه ده بوليب و اهالي نينگ باردي كيلدي سي گه تيگيشلي بولگن هر بير اوزگريش دن بدخشان عامه ساغليك اداره سي گه راپور بيره ديلر.
تاجيكستان، چين مملكتي بيلن ٤٠٠ كيلومتر قوشمه چيگره گه ايگه دير و ايككي مملكت ارا چوقر اقتصادي و سودا علاقه موجود بوليب ايككي مملكت ارا باردي كيلدي هم كوپ دير.
اخبارات واسطه لر راپورلريگه اساسا، تاجيكستان حكومتي كرونا ويروسي انتقال تاپيشي دن تشويشي كوپيگني سبب بومملكت سوداگرلري و وطنداش لري باردي كيلدي سي ني منع ايتيب، تجارتي اشيالر انتقالي ني وقتينچه ليك توختتكن.
بدخشان عامه ساغليك اداره سي ريسي گه كوره بدخشان ولايتي تاجيكستان و چين نينگ سينكيانگ ولايتي بيلن اوزون چيگره گه ايگه بولگني سبب بدخشان ولايتي ني باشقه ولايت لردن كوره خطر بيلن يوز مه يوز قيلگن و بدخشان محلي اداره سي چيگره وي همكارليك لر ارقلي بو تشويش و خطرلرني برطرف ايتيش ده سعي و حركتلريني كوپيتيرگن.
بدخشان يشوچي لري هم عامه ساغليك اداره سي بو چاره تدبيري ني آلقيشلب بو سعي و حركتلر مثبي نتيجه بيريب كرونا ويروسي افغانستان گه انتقال تاپمس ليگي ني اميد قيلماقده لر.
شو حاضر چين ده تعليم اله ياتگان بير قطار بدخشان ليك طلبه لر، اوز اويلريگه لريگه قيتيب كيلگن و بير قنچه طلبه هم هلي چين ده كون كيچيرماقده لر.
بدخشان عامه ساغليك اداره سي ريسي ني معلوم قيليشيچه عامه ساغليك وزيرليك افغانستان ني چين ده گي ايلچي خانه سي بيلن تماس ده دير و بو طلبه لرني طبي تيكشيرو دن سونگ افغانستان گه انتقال بيريش اوچون سعي و حركتلري دوام ايتماقده.بدخشان محلي رسمي لري چيگره حدودلريده يولگه قويلگن چاره تدبيرلر جهان ساغليك تشكيلاتي و آغاخان دفتري همكارليگي بيلن عملي بوله ياتگاني ني ايتيب و بو ايككي ارگان چيگره حدودلريده وظيفه لنتيريلگن گروه لرني كيرك لي و زمانوي طبي اسباب اسكونه لر بيلن جهازلنتيريش ده سعي قيلماقده لرديب ايتي.
هرچند حاضرگه قدر افغانستان ده كرونا ويروسي دن هيچ بير مثبي واقعه رويخط ده آلينمگن اما عامه ساغليك وزيرليگي بو ويروس انتقال تاپيشي آلديني آليش مقصدي بيلن جدي چاره تدبير قول اوستيده آلگن.
