کرونا ویروسی علامه سی کورینگن بیر ۳۲ یاشده بولگن شخص اوتکن کونی بدخشان مرکزی کسلخانه سیده خودکش لیک قیلگن. تازه لیکده ایران دن قیتیب کیلگن بویاش بدخشان ولایتی شفاخانه سیده قرنطینه ده سخلنردی. اونی عایله اعضاسی نی ایتیشیچه فرزندلری نجیب الله بدخشان عامه ساغلیک اداره سی مسوللری دقت سیزلیگی سبب خودکش لیک قیلگن.اما بدخشان عامه ساغلیک اداره سی رسمیلری بو ادعانی رد ایتیب کروناویروسی نی یوقتیرگن بو شخص مخدره ماده گه معتاد ایکنی نی ایتیب شفاخانه ده مخدره ماده گه قول تاپه آلمگنی سبب خودکش لیک قیلگن دیب ایتکنلر.

نجیب الله آته سی غلام حسین نشانه خبرآژانسی بیلن صحبت ده، فرزندی یقین کونلرده ایران قیتیب کیلگنی نی ایتیب بدخشان ساغلیک نی سخلش ملازملری اونگه کرونا ویروسی عللامه سی کورینگنی سبب کرونا ویروسی نی یوقتیرگن کیشی لرگه اجرتیلگن شفاخانه ده قرنطینه گه آلگندیلردیب ایتی. غلام حسین نی ادعا قیلیشیچه بوکسلخانه ده وظیفه لنیریلگن شفاکارلر دقت سیزلیگی باعث فرزندیم خودکش لیک قیلگن. اونی علاوه قیلیشیچه اوغیلی کرونا ویروسی نی یوقتیرگن شخص لر سخلنه یاتکان شفاخانه ملازملری اعتبارسیزلیگی باعث باشینی آکسیجن کپسولی گه اوریب بیهوش بولگن.

 غلام حسین بو شفاخانه ده کیرکلی امکانیت بولمگنی دن شکایت ایتیب دیدی:« بو دولتی کسلخانه ده بیهوش بولگن فرزندم نی هوش گه کیلتیریش اوچون حتی آکسیجن هم یوق ایدی». اونگه کوره شوسبب دن فرزندی بیهوش بولگن دن سونگ، شفاکارلر دقت سیزلیگی باعث عالم دن اوتی.

 بدخشان عامه ساغلیک اداره سی مسوللری اما بو۳۲ یاشلی شخص خودکش لیک سببی نی مخدره ماده گه چیلنگنی دیب ایتکنلر. رسمیلرگه شونینگ دیک بو یاش اوی ده قرنطین ایکنی نی قید ایتیب و بیهوش حالت ده شفاخانه گه کیلتیریلگنی هم اورغولشکن .بدخشان عامه ساغلیک اداره سی ریسی نورخاوری دیدی:« بو شبهه لی شخص دن نمونه آلینگن دن سونگ عایله سی طلبی گه اساساٌ عایله سی اونی اوی گه آلیب کیتی اما بیهوش بولگن حالت ده ینه شفاخانه گه انتقال بیردیلر، البته بوندای آغیرحالت ده شفاکارلر قولیدن هیچ ایش کیلمه دی.» خاوری جنابلری بوشخص نینگ نمونه سی کابل گه جونتیلگن و حاضرگه قدر نتیجه سی بدخشان گه کیلمگنی نی هم ایتی.

نجیب الله عایله اعضالری کرونا ویروسی نی یوقتیرگن کیشی لرگه اجرتیلگن شفاخانه ایشی دن تنقیدلب اوچ کون آلدین نجیب الله دن نمونه آلینیب اما حاضرگه قدر اونی نتیجه سی معلوم ایمس دیب ایتیشماقده لر. نجیب الله قرینداشلریدن بیری لینا شیرزاد دیدی: بیز نجیب الله جسدی نی دفن قیلماقچی ایدک اما بدخشان عامه ساغلیک اداره سی مسوللری اونی نتیجه سی کابل دن یتیب کیلمگنی سبب جسد نی دفن قیلیش ده رخصت بیرمگنلر».

 عینی حالده بدخشان عامه ساغلیک ادراه سی ریسی بوشبهه لی شخص نتیجه نی کوتگنی اورته قویب   اگر اونی نتیجه سی مثبت بولسه بوشخص جسدی عامه ساغلیک وزیرلیگی بویرگن طریقه ده دفن ایتیله دی و اما اگر نتیجه منفی بولسه جسد نی عایله سیگه تاپشیره میزدیدی.

 بونگه علاوه بدخشان یشوچی لری بوولایت عامه ساغلیک اداره سی مسوللری کرونا ویروسی نی یوقتیرن شبهه لی شخص لرنی سخلش طرزیدن تنقیدلب رسمیلر، شبهه لی شخصلرگه اولکه ده حضورتاپیش ده رخصت بیرمسلیگی کیرک ایدی دیدیلر.

عالم دن اوتکن بو شبهه لی شخص قوشنی سی بولگن اجمل درویش  نشانه خبرآژانسی بیلن صحبت ده دیدی:« بو شبهه لی شخص دن بدخشان شفاخانه سی مسوللری نمونه آلگن دن سونگ اونی قیته اویی گه جونتدیلرو نیچه کون دن سونگ اونی وضعیتی خراب بولدی». او، اویی ده بولگن وقت لرده نجیب الله عایله  اعضالری و باشقه کوپ شخص لربیلن تماس ده بولیب توغریدن توغری اوچرشکنی دن خواتیر بیلدیریب اگر اونی نتیجه سی مثبت بولسه احتمال کوپ شخص لر بویروس نی یوقتیرگن بولسه لر دیدی.

 اما بدخشان عامه ساغلیک اداره سی مسوللری، بو شبهه لی شخص عایله سی باسیم لری آرتیدن اونگه اویی گه باریش گه رخصت بیریش گه مجبور بولگنی لرنی ایتیشماقده. بدخشان عامه ساغلیک اداره سی ریسی نورخاوری بو شخص عایله سی ادعالرینی رد ایتیب بدخشان مرکزی کسلخانه سی ملازم لری بو واقعه ده تقصیرلری یوق دیب بو کسلخانه کیرک بولگن اسباب اسکونه لربیلن جهازلنگنی وشبهه لی یا کرونا ویروسی نی یوقتیرگن کیشی لرنی سخلش و دوالش اوچون توله تیارگرلیک گه ایگه ایکنی نی تاکیدلشدی.

عینی حالده، حاضرگه قدر نجیب الله نی خودکش لیگ عاملی، شفاخانه ملازملری دقت سیزلیگی ویا مخدره ماده گه اعتیادی گه دخلدار ایکنی معلوم ایمس. اما کرونا ویروسی نی یوقتیرگن لرنمونه لرینی انیق لنتیریش اوچون بدخشان و مملکت شمالی ده جایلشکن ولایتلر ده مخصوص لابراتوار بولمگنی  بو منظقه یشوچی لریگه جدی تشویش توغدیرگن.حاضرچه بدخشان و باشقه بیرقطار شمالی ولایت لرده کرونا ویروسی نی یوقتیرگن شبهه لی شخص لر نمونه لری کابل گه جونتیله دی. بدخشان رسمیلری ایسه بو نمونه لرنی پایتخت کابل گه جونتیش و اونی نتیجه سی معلوم بولیشی اوچون اینگ آز اون کون وقت کیرک بولگنی نی تاکیدلیدیلر.

هرچند دولت کرونا ویروسی نمونه لرینی انیتق لنتیریش اوچون مرکز، شرق و غرب حوزه لریده مخصوص لابراتوارلرنی فعال قیلگن اما بوندن ایککی کون آلدین بلخ ولایتی مرکزی مزارشریف شهریده هم بیر لابراتوار ایجاد ایتیلگنی خبرقیلیندی. بوندن آلدین کابل دن علاوه، هرات و ننگرهار ولایت لریده کرونا ویروسی نینگ مخصوص لابراتوارلر ایجاد بولگندی.