ماریا اکبری اون تورت ییل دن بیری بدخشان ده امنیتی قوتلر دایره سیده فعالیت قیلیب کیلماقده. او بو مدت ده امنیتی اداره لرنی باشقریش دن توتیب و طالبان گه قرشی کورش سنگرلریده هم اشتراک ایتکن. بو بدخشان لیک بانو حربی تعلیمات نی اوتکزیش دن علاوه، قضا و قاره لوچی لیک بولیمی ده هم عالی تعلیمات نی بدخشان عالی اوقویورتی حقوق فاکولته سیده بیتیرگن و حاضر بدخشان ولایتی امنیه قوماندانلیگی ده انسان حقلری، عیاللر و باله لر مدیری اوله راق اولکه سیگه خذمت کورستماقده.

بانو اکبری اون ییل بدخشان امنیه قوماندانلیگی ده عایلوی جنجاللرنی تیکشیریش بولیمی باشلغی صفتیده ایشله گن. او کوپلب عیال و عایله لر معما و جنجال لرینی حل ایتیب بو توغریده کورشیب کیلگن.  خانم اکبری، عیاللرگه قرشی زورانلیک لرگه قرشی کورش و اونی کمیتیریش ده اونی فعال قتنشکنی ثمره لی ایکنی نی تاکیدلیدی.

امریکا و طالبان ارا کیلیشو امضالنگنی و بو گروه و افغانستان دولتی ارا یوزمه یوز مذاکره لر باشلنگنی دن سونگ، بو آقیمده یوزگه چیققن سیاسی توسیق لر و طالبانی امارت قیته یوزگه کیلیشی دن خواتیر لر آرتیب باریشی ، عیاللر فعالیت لریگه چیکلولر یرتیلیشی دن خواتیرلر اهالی و خصوصن عیاللر آره سیده کوپیگن. ماریا اکبری اما، اوزی نینگ اساسی آزادلیک دن محافظت قیلیش اوچون حتی اوز جانی نی فدا قیلیش گه حاضر من و عیاللر گه تعلق لی بولگن قدریت لر و دموکراتیک جماعه اصوللری سقلنیشی دن هیچ بیر سعی و حرکت دن ایه می من دیدی.

بانو اکبری علاوه ایتی: « اگر امنیتی قوتلر دایره سیده ایشلش دن قول تارتیش اوچون طالبان منی تهدید قیلسه لر بو ایش دن قول تارتمی من و هیچ صورت ده بو تهدید لر تن له گن یولیم دن منی قیتیرمی دی.» ماریا اکبری امنیتی قوتلر اعضاسی ایکنیم دن فخرلنه من دیب امنیتی قوتلر صفیده ایشلش ده هیچ قندای معما و قیینت چیلیکم یوق دیدی ؛ چونکه امنیتی قوتلر صفیده بارلیگی بیلن کوپلب عیاللرگه یاردم بیریب و اوز مسولیتیم نی عیاللر برابریده بجرگن من دیب تاکیدلشدی.

بدخشان ولایتی امنیه قوماندان لیگی ده ماریا اکبری بیلن بیرگه اونلب باشقه عیاللر هم عسکر و ضابط صفتیده وظیفه بجره دیلر و ایرکک لر بیلن یان مه یان امنیتی وظیفه لرنی اجرا ایته دیلر. بدخشان پولیسی انسان حقلری و عیاللر و باله لر ایشلری بولیمی مسوولی، مردم منی فعالیت لریم دن راضی دیرلر دیب و مین بجره یاتکان ایش نی عموما بدخشان ولایتی اکثر اهالی سی تقدیرلشکن و بیر امنیتی اداره ده ایشلشیم ده هیچ کیم مخالف ایمس دیدی.

خانم اکبری امنیتی قوتلر صفیده ایشلشیم دن عایله ام حمایت ایته دی دیب و شو حمایت سبب لی اوز ایشیم ده موفق من دیب تاکیدلشدی.

عینی حالده بدخشان امنیه قوماندان لیگی ده خانم اکبری یگانه عیال پولیس دیر که بوندای بیرمهم دولتی منصب ده وظیفه بجره دی. اونی آرزو سی شو که بدخشان ده عیاللر عمومی وضعیتی کون اوتیشی بیلن یخشراق بولیشی دیر. خانم اکبری دیدی ۱۳۸۶ ییل دن بیری عیال پولیس لرنی جذب ایتیش، عیاللرگه قرشی زوروان لیک لر، جنایی جرم لرگه قرشی کورش و حاضر انسان حق لری بولیمی باشلیغی صفتیده ایشلب کیلگن. او بو مدت ده امنیه قوماندان لیگی ده تاپشیریلگن اداری وظیفه لرنی بجریش دن تشقری، کشم، درایم، جرم، بهارک و وردوج اولسوال لیک لریده هم یولگه قویلگن حربی عملیات لرده هم قتنشکن.

بو پولیس، مملکت جاری وضعیتی دن توله باخبر ایکنی نی اورته گه قویب امنیتی قوتلر صفیده ایشلش اسان ایمس دیدی؛ اما حاضر کوپیب باره یاتکان امنیتی تهدیدلر سبب بو ایش دن قول تارتمی من دیب ایتی. خانم اکبری مردم خوفسیزلیگی تامین لش و عیاللر اساسی حقلریدن محافظت قیلیش اوچون هر بیر عملیات ده اشتراک ایتیش ده تیارمن و اگر حربی عملیات لرده اشتراک ایتیشیم لازم بولسه هر بیر اوروش ده حصه قوشیش ده تیار من دیب ایتی. ماریا اکبری پولیس قوتلری صفیده عیاللر حضوری اوته مهم بولگنی ایتیب او عیال و قیزلردن اوز وطنداشلریگه خذمت کورستیش اوچون امنیتی قوتلر صفیگه قوشیلیش لرینی طلب ایتیب و هر قندای ترتیب سیزلیک لر و تهدید لرگه قرشی کورشلرینی ایستی دی.

حاضرکی مرکب احوال ده اوی دن تشقریده عیاللرنی ایشلشی خصوصن امنیتی قوتلر صفیده خذمت کورستیش آسان ایمس؛ اما ماریا اکبری کبی کوپلب عیاللر بارکه بو خطر و تهدید لرنی قبول قیلیب اوز وطنداشلری خوفسیزلیکی نی تامین لشده ایرکک لر بیلن یان مه یان بیل باغله گن لر.