ملي مدافعه وزيرليگي ني اعلان قيليشيچه طالبان نينگ ايككي محلي قومانداني داخل اون جنگچي سي هلمند ولايتي ناوه تومنيده اولديريلگن.

بو وزيرليك بوكون( چهارشنبه ٢١ عقرب) بير خبرنامه نشر ايتيب بو جنگچي لر اوتكن كيچه ملي اردو اوچاقلري عملياتي نتيجه سيده ناوه تومني ني “ژرصاحب” قشلاقيده نشان گه توتيلگن.

خبرنامه گه كوره طالبان نينگ بو ايككي قومانداني ” ملا رفيع الله و فريدجانان” بولگن. عيني دمده بو عمليات ده طالبان نينگ اوچ جنگچي سي هم باره لنگن.

ملي مدافعه وزيرليگي طالبان نينگ بو جنگچي لريگه قرشي هجوم اونداي بير حالده اويشتيريلدي كه طالبان ملي اردونينگ بير قرارگاه سيگه قرشي هجوم اوچون تيارگرليك كورردي. طالبان گروهي حاضرگه قدر بو باره ده بيران نرسه ايتمگن.

طالبان جنگچي لري سونگي هفته لرده هلمند ولايتي بير قطار تومنلري و مركزي لشكرگاه شهريگه قرشي هجوملريني شدت بيريل كوپيتيرگن. بو ولايت ده طالبان هجوملري شدت آلگندن سونگ هلمند ولايتي نينگ ٤٠ مينگ دن كوپراق اهالي سي اوز اوي جايلريدن آواره بولديلر.