طالبان حكومتي آغدريلگن دن سونگ ايگرمه ييل ليك حكومت تجربه سي ميداني ده هيچ بير ميدان امنيتي قوتلر تمانيدن تروريسيم گه قرشي كورش، مملكت يير حدودي و ملي ناموسي دن مدافعه ايتيش ميداني چه ايسيغ ايمس ايكن.افغانستان سياست ميداني ده اوين لر قاعده سي هرچند ملي بيرليك و اتفاق اوچون سعي و حركت بولگن اما بخت گه قرشي سياسي معامله لر دايم قوم دايره سيده شكللنيب و سياست اربابلري ملي بيرليك پايه لريني مستحكم لش اورنيده، ملي بيرليك معماسيني قوم، تيل و مذهب آرقلي حل قيليش ده اورينگن لر،
افغانستان ملي اردو قوتلري قومي چيگره لرگه ضد عموما افغانستان ملي منفعتي پايه سيگه شكللنگن و اردو قوتلري قوم، تيل، جغرافيا و محل وابسته ليك لريگه قره مي بوتون افغانستان ده يعني هلمند و قندهار دشت لريدن بدخشان تاغلريگه چه بير قوشمه مقصد بيلن خلق ارا تروريسم گه قرشي كورشيب گيلگنلر و مملكت حدوديدن مدافعه ايتكنلر.
افغانستان ده هيچ بير قوم بوق كه اوزيني ملي اردو آيينه سيگه كورمسه و بير تينچ و برقرار افغانستان گه تعلق حسي بولمسه. شو سبب دن اوروش ميدانلريده كوپلب قربانليك لر بيرگن ملي اردو قوتلري صفي هلي هم بوش قالمگن و هركوني ملي اردو قوتلري صفي مقدس اولكه دن مدافعه ايتيش اوچون كوچلي راق بوليب تويغولي ياشلر حضوري بيلن بو صف قوللب قوتلنماقده.
امنيتي و مدافعوي قوتلر افغانستان نينگ برچه مردمي گه تعلق لي دير ؛ چونكه بو قوتلر بوتون مملكت ده افغانستان خلقي دن نماينده ليك قيليب و افغانستان ملي منفعتي و تينچليك و آسايشته ليگي اوچون برچه قيينتچيليك و كمچيليك لرني چيدب سنگرلرده كورشه ديلر. افغانستان امنيتي و مدافعوي قوتلري نينگ مهم خصوصيت لريدن بيري شو كه بو قوتلر افغانستان منازعه سيگه دخلدار بولگن هيچ بير گروه و قوم گه تيگيشلي ايمس، بلكه بو قوتلر افغانستان خلقي نينگ ملي منفعتي و قدريت لريگه اساسن شكللنگن و ملي اتفاق، آزادليك و افغانستان ملتي عزتي اوچون عمل قيله ديلر.
بو قوتلر اوتكن ايگرمه ييل دواميده جهان دولت لري حمايت لري گه اساسن كيركلي تعليمات لر و مهارتلرني كسب ايتيب و بو مهارتلردن فايده لنيب اهالي خوفسيزليگي ني تامين لش بويچه اوز مسوليت لريني ادا قيلب كيلماقده لر.
افغانستان امنيتي قوتلري خلق ارا حمايت لرگه مطابق معياري تعليمات لرني كسب ايتيش و زمانوي امكانيت لر بيلن جهازلنگن حالده هر قنداي تهديد لرگه قرشي كورشيب و اوز ملت لريدن بيگانه لر هجوملري مقابليده مدافعه ايتماقده لر. افغانستان امنيتي قوتلري، خارجي قوتلر افغانستان ني ترك ابتكن دن سونگ مستقل طرزده مدافعه ايتيش و حربي عملياتلرني يولگه قويش، طالبان هجوملريني دفع ايتيش و عصيانگر گروه لرني سركوب ايتيشلري، طالبان تصرف ايتكن منطقه لرني قيته آليش، امنيتي قوتلرني سونگي ييلرده گي ييريك يوتوقلريني دير كه خارجي قوتلردن حربي مسوليت لرني آليش دن سونگ اونگه قول تاپكنلر.
امنيتي قوتلردن حمايت و ارقه داشليك كورستيش در حقيقت افغانستان ملتي نينگ ملي منفعت و اتفاق لريدن حمايت ايتيش دير كه بو حمايت لر سايه سي ده بو قوتلر مملكت ده ملي بيرليك و اتفاقني شكللنتيريش ده و شونينگ ديك مملكت ده ييللرچه دوام ايتكن نزاغ و توقنشوني يكونلنتيريش ده ايشانچلي آديم لر كوتاره آله ديلر و سياسي معامله لرده كه ملي اردو اورنيگه صدمه اوره ياتكان توطعيه لرني بيكار قيليش ده امكانيت تاپيش لري ممكن.
افغانستان تاريخي ده امنيتي و مدافعوي قوتلر و خصوصن ملي اردوني بايكوت قيليش تجربه سي كورستكن كه مردم بو ايش اوچون آغير تاوان در توله گن و مملكت قانلي ايچكي اوروشلر چنگاليده توشيش دن باشقه فايده قولگه كيريته آلمگنلر.
افغانستان مدافعوي و امنيتي قوتلري طالبان گه قرشي ايگرمه ييل ليك اوروش و كورش دواميده و صلح مذاكره لري بير آز يوتوق حاصل بولگني بيلن عيني زمانده حاضرگه قدر طالبان گه قرشي هيچقنداي هجوم و عمليات لرني اجرا ايتمگنلر. اما عكسينچه طالبان اوز هجوملريني شدت بيرگنلر.
حاضركه افغانستان تينچليگي اوچون استانبول يغني اوتكزيليشي اوچون مصلحت لر و حركت لر دوام ايتماقده و بو يغين افغانستان دولتي، طالبان گروهي و مملكت سياسي جريانلري اشتراكي بيلن بيرلشكن ملتلر تشكيلاتي نينگ بيواسطه نظارتي آستيده تركيه ده اوتكزيلماقچي، افغانستان حكومتي تمانيدن و يغين ده قتنشه ياتكان هيات مملكت مدافعوي و امنيتي قوتلردن حمايت ايتيب اولكه دايمي تينچليك تامين لنيشي و ايچكي اوروش يوزبيريشي آلديني آليش اوچون اميد لر كوپيگن.
بوكونلر كه افغانستان مدافعوي و امنيتي قوتلري تروريسم گه قرشي كورش ني دوام ايتيرماقده لر شبهه سسز بو كورش كتته كان خراجت طلب قيله دي و اگر صلح اوون سعي و حركتلر نتيجه بيرسه و مملكت امنيتي قوتلري اوروش ميدانلريده مصروف بولمسه لر بو قوتلر فعاليت لري دايره سي اوروش ميدانلريدن ترقيات پروژه لر خوفسيزليگي تامين لش ايشيگه اوزگريشي ممكن.
صلح دن سونگي حكومت ده امنيتي و مدافعوي قوتلر اوزوش ميدانلريگه حضور تاپيش اورنيده ترقيات پروژه لر خوفسيزليگي ني تامينلشده مصروف بوليب بو وضعيت نتيجه سبده مملكت ده اقتصادي، اجتماعي، مدني و سياسي ساحه لرده ييريك يوتوقلرگه گواه بوليشي ميز ممكن.