مدني فعاللر: مولوي انصاري دن بازخواست بوليشي كيرك
neshananews
21 January 2020هرات ده گي مولوي مجيب الرحمن انصاري نينگ ماجرالري دوامي ده، بيرقطارمدني فعاللرني دادخواه ليك گه اوندب حكومت دن اوني اظهارات لري حقيده تحقيق قليشي ني طلب ايتكن لر.
اشبو مقصدده مملكت باش قاره لوچي سيگه يوللنيشي اوچون ” بيش مينگ امضا” عنواني بيلن دادخواه ليك حركت اجتماعي ترماق لرده يولگه قويلگن.
بو حركت شوحاضر دادخواه سايتي ده موجود و امضا يغيشتيرماقده. بو داده خواه ليك بيش مينگ امضا يغيشي دن سونگ بو طلب ني جمهور ريس اشرف غني، باش قاره لوچي فريد حميدي و عدليه وزيري عبدالبصير انور گه جونتيليشي ريجه لنگن.
مردم آلقيشي
بو حركت ني يولگه قويگن مدني فعاللر، بو حركت دن فايده لنيب هرات گازرگاه جامع مسجدي خطيبي محيب الرحمن انصاري ني توتقين ده آلينيشي و اوندن تحقيق بوليشي گه شرايط مساعد ايتيلشي گه اميدلري بار.
هرچند حقوق متخصص لري بو حركت دن آرتيق مملكت باش قاره لوچي سي انصاري جناب لريدن بازخواست قيله آليشي ني تاكيدليديلر.
بو دادخواه ليك ني يولگه قويگن رامين انوري، اجتماعي ترماقلر اشتراكچي لريني بو حركت دن آلقيش لريني اميدلنتيروچي ديب ايتكن.
انوري جنابلري بو دادخواه آرقلي مردم عكس العمل لريني حجت گه كيلتيريب قانوني زمينه لرني مساعد ايتماقچي ميز ديب ايتي.
اونگه كوره حاضرگه قدر اوچ مينگ كيشي بو كمپاين گه قوشيلگن.
اوتكن هفته جريانيده هرات گازرگاه جامع مسجدي خطيبي مجيب الرحمن انصاري بير قطار عليحيده حركت لر آرقلي اونگه كوره گازرگاه منطقه سيده اخلاقي اصول لرني رعايه ايتمه ياتگان كيشي لرگه قرشي شرعي حدودني جاري ايتماقچي ايكني ني تاكيدلشكندي.
او حتي بير خبري يغينده بيرقطار آدملر شو عيبلولر سبب شلاق اوريلگني دن خبر بيردي.
اشبو دادخواه ليك نشر بولگن ويب صحيفه ده مولوي انصاري عملي افغانستان اساسي قانوني ني ٢٧ ماده سيگه قرشي بولگن تاكيدلنگن.
بو ماده گه اساسا آدم لرني تعقيب، توتقين ده آلينيشي و جزا لنتيريليشي فقط يالغيز عدلي و قضايي ارگانلر صلاحيتي دن دير. بو ماده گه بنا” هيچ بير شخص و يا ارگان اوز باش عمل قيله آلمس ايگي هم قيد ايتيلگن.
اشبو دادخواه ليك ني امضالشگن اجتماعي ترماقلر فعاللريگه كوره، انصاري جنابلري دين دن باشقچه برداشت ني نشر ايتيش بيلن قانون دن يوقاري عمل قيلگن و اونگه قرشي جدي مناسبت كورستيليشي لازم بولگني ني تاكيدلشكن لر.
ذبيح الله بهجت ني ايتيشيچه دين دن بونداي روايت لرني رواجلنتيريش عيال لرني برچه مدني و اجتماعي ازادليك لريني اوز تاثيري آستيده قالديره دي.
اوندن علاوه بو دادخواه ليك گه قوشيلكن رسول عبدي هم بو دادخواه ليك افغانستان حكومتي رهبريتي دن علاوه انسان حق لري تشكيلاتي گه يوباريليشي شرط ديب فكر بيلديرگن.
بو دادخواه ليك ني ايجابي ضمانتي بارمي؟
بو دادخواه ليك يولگه قويلگني دن اوچ كون اوتر اوچ مينگ گه يقين كيشي اوني امضالشكن.
اما امضالشكن كيشي لر نزديده توغيلگن سوال شوكه حكومت بو دادخواه ليك گه دقت اورنتيش اوچون بيران ضمانت بارمي؟
نصير احمد صالحي هرات حقوق فاكولته سي استاديگه كوره جزايي دعوا لر اوچون امضا توپلش قنداي بير حقوقي اورين گه ايگه ايمس اما مسول لرگه قرشي بير باسيم بوله آله دي.
جزاقانوني نينگ ٢٥٦ ماده سيگه كوره “بير شخص اگر باشقه بير كيشي ني تبعيض يا مذهبي ، قومي ، تيل و منطقوي تفرقه گه دعوت ايتيب تورتكي بولسه اورته چه حبس گه جزالنتيريله دي” ديب يازيلگن.
بو دادخواه ليك ني ينه قسميده يازيليشيچه مجيب الرحمن انصاري اوز طرفدار و ايزداشلريني عملا عياللرگه قرشي زوروانليك گه ترغيب ايتيب شيعه لرني افغانستان حذف بوليشي ني ايستب و اولكه نفرت ني رواجلنتيريش بيلن يشوچيلر خوفسيزليگي ني خطربيلن يوزمه يوز قيلگن.
انصاري جناب لري سوزلريگه نسبتا اول دن حاضرگه چه تورلي خيل مناسبت لر كورستيلگن. اوتكن كوني هم افغانستان جمهورريسي ايككنچي اورين باسري سرور دانش، انصاري جنابلري عملي دن تنقيدلشكندي.
