عياللرني ايركين و مستقل هويت اوله راق هر بير دايره ده تعريفلش ممكن، حتي تينچليك و اوروش دايره سيده. تاريخ كوپلب قيز و عياللرنينگ جسارت و جانفداليگي گه گواه دير. عياللر قتيغ جنگ لرده ايركك لر بيلن يان مه يان توختتب اورشكني هيچ كيم گه سر ايمس.ايككنچي جهان اوروشيده عياللر بير علاحيده هويت اوله راق اوروش نينگ ايسغ سنگرلريده ايركك لر بيلن يان مه يان كورشكنی گه تاریخ گواه دیر، بيزنينگ اولكه ميزده هم عياللر جسارتي و جانفداليگي دن كوپلب حكايت و روايت لر تاریخی حجت لرده قید ایتلگن.

افغانستان نينگ عنعنوي جماعه سيده عياللر جايي آشخانه لرده بولگن فكر و نظر عموما ايركك لر تمانيدن اورغولنرايكن؛ بوتفكر، عيال و ايركك لر تينگ حق گه ايگه ايكن ليك نظرگه قرشي دير. اما بونگه قره مسدن اولكه ده بو ناتوغري و افراطي نقطه نظرگه قرشي كورشيب و سزاوار بولگن يوتوق و اورينلرگه قول تاپکن کوپلب جسور وقهرمان عیاللر هم بار.

مريم همدرد مخصوص پولیس قوتلريدن بيري ديرو اوته مركب حربي عمليات لرده قتنشكن. خانم همدرد عموما كيچه تمانيدن يولگه قويلاتكان اكثر حربي عمليات لرده اشتراك ايتيب، بار بار اوليم بيلن توغريدن توغري كورشكن. او اويلرني تيكشيريش بوليميده كوزگه كورنرلي مهارت گه ايگه و پلنگي پوش كوچلر بيلن بيرگه یان مه یان كورشيب كيلماقده. اوني آرزوسي وزيرليك مقاميگه ايرشيش دير و بو آرزو سيگه ايرشيش اوچون هیچقندای سعی وحرکت دن وازکیچمگن .مريم همدرد ديدي استه سكين ايچكي ايشلر وزيرليگي مقاميگه قول تاپيش اوچون حركت قيله من و بير كون بو آرزوم گه ايرشه من.

پوليس نينگ مخصوص كوچلري صفيده خذمت قيله ياتكان بو عسكر سرپل ولايتي ده توغيلگن اما باله ليك و مكتب دوراني ني شبرغان شهريده اوتكزگن.خانم همدرد پوليس خاص قطعه سيده مسلكي تعليم كورگن و شونينگ ديك تورلي خيل قورال اسلحه ني ايشلتيش ده مهارت حاصل قيلگن.

خانم همدرد نشانه خبر آژانسي بيلن صحبت ده بيرينچي دن باله ليك دوراني حقيده ديدي:«باشقه قيزلرديك باله ليك دن “نظام” گه رغبتيم بارايدي، بو رغبت قيسي زمانده منگه تاپيلگني انيق ايسيم گه ايمس اما حياتيم ني اينگ يخشي خاطره سي شوكه پوليس قوتلري نينگ اينگ مهم بوليمي يعني مخصوص قوتلر صفيده قوشيلگنیم دیر.»

بو پوليس حاضر كابل شهريده خذمت كورستماقده اما بوندن آلدين بيرقطار ولايت لرده وظيفه بجرگني ني ايتي.ايشي دن راضي كورينه دي و همكسب لريني اونگه نسبتا” مناسبلريني مختوگه سزاور بيليب ديدي:« پوليس نينگ مخصوص قوتلري بوليمي، حربي ايشلرگه قيزيققن عيال و قيزلر اوچون اوته مناسب جاي دير، بو قوتلر مسوللريني حرمت و احترام بيلن كورسته ياتكان مناسبت لري سبب، بو ساحه ده خذمت قيليش ده كون اوتيشي بيلن رغبت و اشتياقم ني آشيرماقده.»

پولیس مخصوص قوتلری یوقاری مسوللری هم بو قوتلر صفیده عیال وقیزلر حضورینی خصوصا شبهه لی اویلرنی تیکشیریش پیتیده اوته مهم بولگنی اورغولیدلر؛ چونکه بو قوتلرقرشی سیده تورگن معمالردن بیری، حربی عملیات لر پیتیده دولت مخالف لری اوروش میدانی دن قاچگندن سونگ اهالی اویلریگه پناه الیش لری دیر، بو مخالفلر اوزلرینی امنیتی قوتلر کوزیدن یاشیریش اوچون عموماٌعیاللر کیملرینی کییدبلر .اما اویلرنی تیکشیریش ده مخصوص تعلیمات کورگن مریم همدرد بوحقده دیدی:«  کوپ وقت لر طالبان اوروش میدانی دن قاچکنده اوزلرینی عیاللر چادری آستیده یا عیاللر کیمی نی کیب یاشینه دیلر، شو سبب دن پولیس صفیده عیال خذمتچی لرحضوری مهم و ضرور دیر.»

 خانم همدرد هرچند اوروش میدانی گه باریش دن قورقمیدی اما او اولکه ده تینچلیک و آسایشته لیک تامین لنیشی نی ایستی دی. او، مردم یالغیز صلح وتینچلیک  و برقرارلیک ده آسایشته حیات کیچیره آله دیلردیب دیدی.

کوپلب حربی مشق لرنی باشدن کیچیرگن مریم همدرد، اگر عیاللر اراده قیلسه لر حیات نینگ هربیر ساحه سیده موفقیت گه ایرشیب آرزولرینی تامینلشه آلیش لریگه ایشانچیم کامل دیدی. امنتی قوتلر کوچ وقابلیتی دن باخبر بولگن مریم دیدی دولت نینگ قوراللی مخالف لری دولت یانیده توریش دن باشقه چاره لری یوق. اونگه کوره اولر اوروش نی دوام ایتیرگن تقدیرده نابود بوله دیلر.

مریم همدرد اولکه نینگ فعال عیاللریدن بیری دیرکه باله لیک رویا لریگه قول تاپکن، اما کوپلب عایله لر قیزلریگه تعلیم و تحصیل قیلیش ده رخصت بیرمیدیلر. مریم همدرد هربیرعیال موفقیتی نی،عایله سی حمایتی گه باغلیق اتب عایله لردن،  قیزلری اوز آرزولریگه ایرشیش اوچون رخصت بیریشلرینی ایستیدی.

خانم همدرد بو صحبت یکونیده ینه بیر بار بیرکون اوزیم وزارت کرسی سیگه ایرشیش گه ایشانچیم کامل دیب تاکیدلشدی.