مملکت ده اون‌بیش کونلیک آتش کیسیم اورنتیلیشی توغریسیده مصلحتلر
neshananews
15 July 2021افغانستان حکومتی و طالبان رهبرلری ۱۵ کونلیک آتش‌کیسیم رېجه‌سینی کۉریب چیقماقده‌لر. اوشبو رېجه امریکا و قطر حکومتلری تامانیدن افغانستانده‌گی اوروش نینگ ایکّله تامانگه هم تکلیف قیلینگن.
بوگون (پنجشنبه ۲۴ سرطان) ملي یره‌شیش عالي کېنگاشیده‌گی منبعلر، افغانستان حکومتی و طالبان ارا ۱۵ کونلیک آتش کیسیم اورنتیلیشی بویچه بحثلر باشله‌گنی دن خبربیرگن. منبع‌گه کۉره، اگر ایکّی تمان کېلیشگن تقدیرده، وقتینچه‌لیک آتش‌کیسیم قربان هییتی کونلریدن کېین اۉرنه‌تیله‌دی.
اسمینی آشکار اېتیشنی ایسته‌مه‌گن منبعلر مصلحتلر بو باره‌ده دوام اېته‌یاتگنی و یکوني کېلیشووگه اېریشیلمه‌گنلیگینی قۉشیمچه قیلیشدی.
اوشبو منبعلرگه کۉره، امریکا نینگ افغانستان بۉییچه مخصوص وکیلی زلمی خلیل‌زاد و قطر نینگ افغانستان بۉییچه مخصوص نماینده‌سي دوکتور مطلق‌ماجد‌القحطانی، رېجه‌نی عملگه آشیریش اوچون ایکّی تامان اۉرته‌سیده واسطه‌چیلیک قیلماقده.
عینِ پیتده افغانستان حکومتی مذاکره‌لر گروهی اعضاسی نادر نادری، طالبان، حکومت نینگ مذاکره قیلووچی گروهی اعضالری گه اوچ آیلیک آتش کیسیم لایحه‌سینی تکلیف قیلگنی ني تصدیقله‌دی. اونینگ سۉزلریگه کۉره، طالبان حکومت قماقخانه‌لریده‌گی ۷۰۰۰ محبوسنی آزاد قیلیشنی و اوچ آیلیک آتش‌کیسیم عوضیگه گروه رهبرلرینی بیرلشکن‌ملتللر‌تشکیلاتی نینگ قاره رۉیخطیدن چیقریلیشینی طلب قیلگن.
عینی‌حالده، ملي یره‌شیش عالي کېنگاشی رئیسی عبدالله عبدالله باشچیلیگیده‌گی سیاسي رهبرلردن عبارت یوقاری درجه‌ده‌گی حکومت هیاتی اېرته‌گه قطرگه باریب و طالبان بیلن جدّي تینچلیک مذاکره‌لرینی باشله‌ماقچی.
