ميمنه مدني فعاللري اعتراضي؛ حكومت فارياب گه اعتبار بيرميدي
neshananews
15 April 2020فارياب ولايتي مدني فعاللري بير خبري يغين ده كرونا وسروسي گه قرشي كورش ده دولت اعتبارسيزليگي دن تشويش لرني اعلان ايتيلر.
كرونا ويروسي ني انيق لنتيريش مخصوص مركزي ايجاد ايتيليشي و قشاق عايله لرگه ييمليك اشيا ترقليشي بو مدني فعاللرني دولت دن اساسي طلب لري بولگن.
فارياب ولايتي مدني جماعه ارگانلري ريسي زين الدين عابدي نشانه خبرآژانسي بيلن صحبت ده ديدي:”بيزنينگ معلوماتي ميزگه كوره حاضرگه قدر ١٨ مينگ كيشي دن كوپراق شخص ايران دن فارياب گه قيتيب كيلگن و اولرني ساغليك وضعيتي و كرونا ويروسي گه چلينگن مي يا يوق حاضرگه قدر معلوم ايمس.”عابدي جنابلري عامه ساغليك وزيرليگي دن جهان جماعتچيليگي افغانستان گه كورستگن ياردم لري برچه ولايت لرگه عدالتلي روشده ترقليشي ني طلب ايتكن.
او عيني دمده بو وزيرليك دن، ميمنه شهريده كرونا ويروسي ني انيق لنتيروچي مركزي ايجاد ايتيليشي ني هم طلب ايتي.
عامه ساغليك وزيرليگي اوتكن هفته، مملكت شماليده كرونا ويروسي ني انيق لنتيريش اوچون بلخ ولايتي ده بير مخصوص مركز ايجاد قيلگندي. شمالي ولايت لرنينگ شبهه لي نمونه لري انيق لنيشي اوچون شو مركز گه جونتيله دي.
فارياب ولايتي مدني فعاللري ديديلر فارياب بيرينچي شاه يولي ده گي خوفسيزليك، شبهه لي نمونه لر تيزليكده مزارشريف ده يتيب بارمسليگي گه سبب بولگن ديب تاكيدلشكنلر.بو فعاللر عيني دمده بوندن آلدين هر هفته فارياب هوا قونالغي دن كابل گه طياره اوچيشي بارليگي ني اورته گه قويب اما ايندي كرونا ويروسي ترقليشي سبب بو اوچيش لر توختتيلگن ديديلر.
فارياب مدني جماعه سي ريسي اگر ميمنه ده كرونا ويروسي ني انيق لنتيروچي مركز ايجاد بولمسه شبهه لي واقعه لر كوپيشي بيلن بو ولايت دن انساني فاجعه يوزبيريشي ممكن ليگي دن اگاهلنتيرگن.
بونگه علاوه فارياب ولايتي نينگ قشاق و حاجتمند عايله لريگه دولت نينگ دقتسيزليگي دن هم مدني فعاللر شكايت ايتكن لر. مدني فعاللردن بيري آمنه مخلص زاده، كرونا ويروسي ييرليشي و ميمنه شهري قرنطينه بوليشي، بو ولايت يشوچيلري اقتصاديگه سلبي تاثير قالديرگن ديدي. او قرنطينه ده كون كيچيره ياتكان قشاق و حاجتمند عايله لرگه كيرك لي ييمليك اشيا ياردم يتكزليشي ني دولت دن طلب ايتي.
بوندن آلدين، فارياب محلي رسميلري مركزي دولت نينگ بو ولايت گه اعتبار قرتمگني دن تنقيدلشكندي.
فارياب ولايت حاكمي نقيب الله فايق اوتكن كوني( دوشنبه ٢٥ حمل) رسانه لر بيلن صحبت ده ايتكندي؛ اگر عامه ساغليك وزيرليگي كرونا ويروسي گه قرشي كورش ده ولايت يشوچيلري طلب لريگه قانعقرلي جواب بيرمسه بو ولايت ده مدني اعتراض لر اوج آليشي ممكن.
نشر بولگن معلوماتلرگه كوره حاضرگه قدر فارياب ولايتي ده كرونا ويروسي ني يوقتيرگن اوچ مثبت واقعه رويخط ده آلينگن.
فارياب عامه ساغليك اداره سي مسوللري حاضرچه ميمنه شهري كوويد١٩ شفاخانه سيده كرونا ويروسي ني يوقتيريش گه شبهه لي ١٨ كيشي قرنطينه گه سخلنماقده.فارياب عامه ساغليك ريسي ني ايتيشيچه حاضرگه قدر بو شبهه لي شخص لر نمونه لري معلوم بولمگن.
