هرات ده اوتكن ايگرمه ييل ليك اوروش دن صدمه كورگن قريب يوز عيال ايلك بار جاري تينچليك مذاكره لردن خواتير و تشويشلريني اظهار ايتيلر.
بو عياللر بوكون( شنبه ١٠ عقرب) بير خبري يغين ده جاري صلح مذاكره لريده عياللر حضور آز بولگني گه قرشي اعتراض بيلديرديلر و اوروش تمانلريدن عياللرني اوتكن ايگرمه ييل مدتيده حاصل قيلكن يوتوق لريگه حرمت قويشلريني طلب ايتيلر.
ايككي ييل آلدين تاغه سيني طالبان قوراللي لري شيندند تومنيده تيرباران قيلگن زهرا فاضل، مملكت ده عادي اهالي ني اولديريليشي اصلا قبول قيلينرلي ايمس ديب ايتي. او اوروش تمانلريدن جاري زوروانليك لرني توختتيش ني طلب ايتيب و هيچ بير باله آته سيني قولدن بيريش قيغوسيگه چوميليش گه اجازت بيريلمسين ديب تاكيدلشكن.
عيني حالده اوچ ييل آلدين هلمند ولايتي ده طالبان ايناغه سي باشي ني كيسگن نازبي بي حيدري هم، كاتته اكم ني قولدن بيرگندن سونگ عايله ام بوتكل نابود بولدي ديب ايتي.نازبي بي كاتته اكم اولديريلگندن سونگ آتم خانه نشين بولدي و آنم هم هيچ وقت خرسندليك ني تجربه قيله آلمدي ديدي. اوروش قرباني بولگن بو عيال، بو تقدير بو مملكت نينگ باشقه يشوچيلريگه تكرار بوليشي ني ايسته مي من ديب تاكيدلشيب هرقنچه تيزراق اوروش تمام بوليشي ني ايستي من ديدي.

اوروش قرباني بولگن بو عياللر اما اوتكن ايگرمه ييل جريانيده عياللر حاصل قيلگن يوتوقلر سقلنيشي ده تاكيدلب اوروش تمانلريدن عياللر طلب لريگه حرمت قويليشي ني ايستشكنلر. بو يغين ده اشتراك ايتكن عياللر صلح مذاكره لريده عياللر حق لري اياغ استيگه قاليشي دن خواتير بيلديريب و افغانستان دولتي بو مذاكره لرده عياللر حقلريدن قوت بيلن حمايه ايتيش ني اورغولشديلر.
باشقه تماندن هرات محلي رسميلري بو تياللرني برچه طلب و خواتيرلريني مركز و افغانستان دولتي نينگ قطرده گي مذاكره قيلوچي هياتي اعضالري بيلن شريك قيليش دن سوز بيرگن. هرات ولايت حاكمي معاوني مونسه حسن زاده، افغانستان دولتي تينچليك مذاكره لرده عياللر حق لري تامين لنيشي دن جدي مدافعه ايتيب و طالبان گروهي هم بو موضوع گه اعتبار قرتيشلري شرط ديب ايتكن.
صلح مذاكره لريده عياللر حقلري و يوتوقلري سقلنيشي اوچون بو طلب لر اونداي بيرحالده اورته گه قويلماقده كه افغانستان دولتي و طالبان گروهي هياتلري قطرده بير يريم آي دن بيري بو مذاكره ار ايش دستوري لايحه سيني يكونلنتيريش اوچون بحث قيليب كيلماقده لر اما ايككي تمان حاضرگه قدر بو توغريده كيليشه آلمگن لر.