عياللرگه قرشي زوروانليك ني منع ايتيش خلق ارا كوني بيلن عيني زمانده هرات ده عدلي و قضايي ارگانلر مسووللري، بو ولايت ده عياللرگه قرشي زوروانليكلر كميشي دن خبر بيرگن.

سونگي هفته لرده عياللر اداره سي، انسان حقلري كميسيوني و عدلي و قضايي ارگانلردن رقملرني توپلشكن مدافع وكيللر انجمني ريسي محمدرفيع نادري، عياللرگه قرشي زوروانليكلر ١٥ فايز كميگني دن خبر بيرگن.  نادري جنابلريگه كوره جاري شمسي ييل ده هرات ده عياللرگه قرشي ٦٧٢ زوروانليك قضيه لري رويخط ده آلينگن ديدي. او بو رقم اوتكن ييل ده ٨٠١ قضيه ايدي ديب ايتي.

باشقه تماندن هرات ولايتي عياللر اداره سي مسووللري مدافعه وكيللر انجمني تمانيدن نشر بولگن رقملرني تصديق لب عياللر بيلم لري كوتاريلگني، عياللر حقلريدن حمايه ايتوچي ارگانلرگه عياللرني قول تاپيشي و زوروانليكلر عامللريگه قرشي عدلي و قضايي ارگانلر تمانيدن جدي مناسبت كورستيليشي ني جاري ييل ده بو زوروانليك لر رقمي كميگني عاملي بولگن ديگن.

عياللر اداره سي مسولي اما كروناويروسي ييرلگني كونلرده مسوول ارگانلر فعال بولمگني و قشلاق و چكه حدودلرده يشوچي عياللرني عدلي و قضايي اداره لرگه قول تاپه  آلمسليكلري هم بو زوروانليكلر ميزاني كميشي گه دخلدار ايكني ني هم تصديق لشكن.

هرات ولايتي ني ناتينچ بولگن منطقه سي سنلميش شيندند تومني عياللر حقلريدن حمايه ايتيوچي فعالي شيرين اعلمي نه فقط شيندند ده؛ بلكه هرات ولايتي اكثر تومنلريده عدلي و قضايي اداره لر فعال ايمس ديدي. خانم اعلمي بو تومن ده عياللرگه قرشي زوروانليكلر ميزاني كوپ بولگني ني قيد ايتيب دولت عياللردن حمايت ايتمگني سبب زوروانليك قرباني بولگن عياللر حمايه ايتوچي ارگانلرگه شكايت قيليش ده جسارت قيله آلميديلر ديب تاكيدلشدي.خانم اعلمي گه كوره شيندند تومنيده حتا عياللر، تورموش اورتاقلريدن رخصت آلمي اويدن چيقيش ده حقلري يوق ديدي.

هرات محلي اداره سي مسوولري هم بو ولايت نينگ سكيز تومنيده عدلي و قضايي اداره لر فعال بولمگني ني تصديقلشكنلر. هرات حاكمي معاوني مونسه حسن زاده شيندند، زاول، زيركوه، پشت كوه، گلران و باشقه نيچه تومنده امنيتي معمالر سبب عدلي و قضايي اداره لر فعال ايمس و ايشلريني ولايت مركزيدن بجره ديلر ديب اما كيله سي آي لرده بو اداره لر مذكور تومنلرده فعال بوليشي ممكن ديدي.

حاضرچه جبري اويلنتيريش، كلتكلش، پس باشده تورموشگه چيقاريش، قيزلرني تعليم دن محروميتي، جنسي زوروانليكلر و قتل هرات ده عياللرگه قرشي اينگ رواجلنگن زوروانليك لر جمله سيدن دير.

جاري ميلادي ييل نينگ ٢٥ نوامبر كوني عياللرگه قرشي زوروانليك لرني منع ايتيش خلق ارا كوني دير. عياللر حقلري فعاللري و مدني جماعه ارگانلري هرييل بو خلق ارا كون ني نشان ليديلر.