هرات ولايتي عامه ساغليك اداره سي كيله سي ايككي آي دن سونگ هرات ده بيرينچي يورك تيشيگي جراح ليگي اوتكزيليشي دن خبر بيردي.

بو اداره مسول لري بو زمينه مساعد ايتيليشي بيلن يورك تيشيگي سبب عالم دن اوته ياتگان باله لرنينگ قيغولي اوليمي گه نقطه قويليشي دن اميد بيلديرگن لر.

افغانستان قيزيل آي جمعيتي حساباتيگه كوره هر كوني مملكت ده اوچ دن بيش باله گه چه يورك تيشيگي كسل ليكي باعث عالم دن اوتماقده.

حاضرچه ليك يورك لري تيشيلگن باله لر، دوالنيش اوچون هند و چين مملكت لريگه جونتيليب آز سانده باله لر هم كابل ده جراحليك بوله ديلر.

يورك تيشيگي ني دوالش كوپ خرجتلي دير

قيزيل آي جمعيتي حساباتيگه كوره حاضرچه يورك لريگه تيشيگي بولگن بيش مينگ باله رويخط ده آلينگن و جراحليك بوليش اچون نوبت لريني كوتماقده لر و بونگه قوشيمچه اسم لري رويخط ده آلينگن بو باله لردن قريب ٣٠ فايزي هرييلي نوبت لري يتيشيش دن آلدين دنيا دن اوته ديلر، اما بير قطار باله لر قيزيل آي اداره سي همكارليكي بيلن بو خطرلي كسل دن قوتقريله ديلر.

زينب بو بخت لي باله لردن ببري دير، او ايككي ييل آلدين هرات قيزيل آي اداره سي همكارليگي بيلن ساغلدي.

زينب آته سي قيزيل آي اداره سي ياردم بيرمگن تقدير ده من قيزيم ني دوالش ده قربيم يتمس ايدي ديب ايتي.

يورك تيشيگي دن عذاب چيكه ياتكان هربير باله نينگ دوالش خراجتي ٢٥٠٠ دالر دن كوپراق دير و بو مبلغ ني هر بير عايله تامين لي آلميدي.

هرات ده يورك تشيگي جراح ليك مركزي آچيليشي

بو كسل ليك ني دوالنيشي حاضرچه پايتخت كابل و قيزيل آي جمعيتي ياردمي بيلن هند و چين مملكت لريده مساعد دير.

اما هرات عامه ساغليك اداره سي ريسي شفاكار عبدالحكيم تمنا نيچه آي آلدين بير تعليمي دوره ني اوتكزيش اوچون ايران نينگ مشهد شهريگه جونتيلگن بيرقطار شفاكار قيتيب كيلگني دن خبر بيردي.

اوني ايتيشيچه بو كسل ليك ني دوالش اوچون بير علحيده بنا هم قوريلگن و ايككي آي دن سونگ بيز بيرينچي جراحليك گه گواه بوله ميز.

قيزيل آي جمعيتي همكارليگي دن علاوه، افغانستان عامه ساغليك وزير ليگي و امام جواد ناملي بير خيريه موسسه ارا امضالنگن كيليشو گه اساسا هر هفته ايككي بيمار باله يورك تيشيگي جراحليگي اوچون مسهد شهريگه هم جونتيله دي.

فيزيل آي جمعيتي ني افغانستان غربيده گي مسولي احمدالله افضلي جاري ييل ده ١٤٠ باله درمان بولگني دن خبر بيريب يقين ليكده قيزيل آي مسول لري يورگ تيشيگي گه مبتلا بولگن باله لرني مشهد گه تيكين انتقال بيريشي اوچون كام اير هوا يول لر كمپني سي بيلن كيليشو نامه امضا ايتيلگن ديب ايتي.

افغانستان قيزيل آي جمعيتي ني بو ساحه ده فعاليت باشله گني دن حاضرگه قدر يورك تيشيگي گه مبتلا بولگن١٧مينگ باله رويخط ده آلينگن و بوندن ١٤ مينگ كيشي سي درمان بولگن.

دايمي سينه بغل، خسته ليك، قيسغه تنفس، يورك آغيريق، قسغه مدتلي هوش سيزليك، اياغلرني شيشي و باله جسم ني اوسمگني يورك تيشيگي كسل ليگي نشانه لريدن دير.