هرات ولایتی امنیتی مسووللری، شهرمرکزیده پولیس نینگ بیر پوسته سیگه یوز بیرگن پارتلش نتیجه سیده اینگ آز اوچ کیشی اولدیریلیب و ایککی کیشی یاره لنگنی دن خبر بیرگن.

هرات پولیسی سوزچیسی عبدالاحد ولیزاده نشانه خبر آژانسی بیلن صحبت ده بو واقعه بو کون ایرته لب ( یکشنبه ۱۱ عقرب)ساعت آلتی ده هرات شهری اونیمچی ناحیه سی ده جایلشکن پایان آب منطقه سیده یوز بیرگن دیدی. ولیزاده جنابلری پولیس پوسته سی یانیده جایلشتیریلگن ماین پارتلیشی نتیجه سیده واقعه یوز بیرگنی نی ایتکن.

پولیس سوزچیسی بو واقعه ده اوچ پولیس اوزجان لرینی قولدن بیریب و بیر پولیس و عادی اهالی دن بیرکیشی هم یاره لنگن دیب ایتی.

عنی دمده هرات ولایتی عامه ساغلیک اداره سی مسووللری بو واقعه ده یاره لنگن لر ساغلیک وضعیتی نی قانعقرلی دیب ایتکن. بو اداره سوزچی سی محمد رفیق شیرزی بو واقعه ده یاره لنگن کیشی لر هرات مرکزی کسل خانه سیده انتقال بیریلیب دوالنماقده دیب ایتی.

باشقه تماندن حادثه گواه لری پارتلش یوز بیرگن محل عکس لرینی اجتماعی ترماق لرده نشر ایتیب پارتلش کوچلی بولگنی و پوسته یقینیده جایشکن اوی لرگه صدمه یتکزگنی نی ایتکن لر.حاضرگه قدر بو پارتلش مسوولیتی نی هیچ بیرگروه یا شخص اوز ضممه سیگه آلمگن.

بو پارتلش یوز بیرگنی دن سونگ هرات شهری سونگی کونلرده ناتینچ بولگنی سبب کوپلب تنقید لرنی توغدیرگن. بوندن آلدین هم بو شهرده جنایی جرم لر و طالبان هجوملری کوپیگنی دن سونگ محلی حکومت دن تنقیدلر کوپیگندی