هرات شاه یوللری و سرک لری چکه سیده ماین جایلشتیریلشی، اهالی اولیمی گه سبب بولگنی دن علاوه بو ولایت ده سرک لردن محافظت قیلوچی اداره گه کاتته تشویش و خواتیر ایجاد ایتکن. بو وضعیت دوام ایتیب باریشی هرات شاه یول و سرک لریده قیینتچیلیک توغدیریب و اونی قیته قوریش اوچون کاتته کان خراجت لر طلب ایتماقده.

هرات ولایتی یول و سرک لردن محافظت قیلوچی اداره مسووللریگه کوره یول چکه سیده جایلشتیریلگن ماین لر پارتلشی بو ییل اوتکن ییل گه قرگنده اون برابر کوپیگن. بو اداره ریسی سیدعبدالله حمایت جاری ییل اولی دن حاضرگه قدر بو ولایت شاه یولریده یوز نقطه دن کوپراق محل ده ماین پارتلتیلگن دیب ایتی. حمایت جنابلری اوتکن ییلی بو رقم اون واقعه ایدی اما او جاری ییل نی هرات یوللری اوچون اینگ یمان ییل دیب اته گن.

هرات – اسلام قلعه شاه یولی، هرات – قندهار و هرات ـ تورغندی شاه یوللری سونگی آیی لرده کوپ ماین لر پارتلشی گه گواه بولگن. سرک لردن محافظت قیلوچی اداره معلوماتیگه کوره اوتکن آلتی آی جریانیده یالغیز هرات ـ تورغندی شاه یولیده بیش پارتلش یوز بیرگن و بو شاه یول و اونی نیچه کوبریگی گه جدی صدمه یتکزگن.

هرات ده یول چکه سیده جایلشتیریلگن ماین لرنینگ کوپراق پارتلشی هرات ـ اسلام قلعه و هرات ـ قندهار و هرات ـ تورغندی و خصوصا شیندند، ادرسکن و زواول تومنلری حدودیده یوز بیرگن. حمایت جنابلری بو شاه یوللر قیته قوریلیشی اینگ آز یوز میلیون افغانی تخمین بولگن دیدی.

عینی حالده هرات ولایت کینگاشی بو یوللر خراب بولیشی اساسی مسولیتی نی کشفی اداره لر دقت سیزلیگی گه تیگیشلی بولگنی نی تاکیدلیدی. هرات ولایت کینگاشی اعضاسی وکیل احمد کرخی دیدی کشفی اداره لرنی وظیفه سی بوندای واقعه لرنی آلدینی آلیش دیر.

اما هرات محلی رسمی لری، بو ولایت نینگ حربی کینگاشی یول چکه سیده اورتیله یاتکان ماین لر عامل لرینی تاپیب و قانون چنگالیگه تاپشیریلیشی دن وعده بیرگنی دن سوز یوروتگن.

هرات ولایت حاکمی سوزچی سی جیلانی فرهاد، بو ولایت امنیتی قوتلری شاه یوللر خوفسیزلیکی نی تامین لشده وظیفه لنتیرگن و آلدین دن کوره کوپراق بو ساحه اعتبار قرتیش گه بویریلگن دیب ایتی.

هرات ولایتی شاه یوللری جکه سیده ماین جایلشتیریش حاللری اون برابر کوپیگنی طالبان جنگچی لری نینگ اوروش تکنیک لری اوزگرگنی دن حکایت ایته دی. بو گروه جنگچی لری اوتکن ییلی شاه لرگه قرشی جدید تهدید حسابلنمس دی اما سونگی آی لرده شاه یوللرده حضورلری کوپیگن دن علاوه یول چکه سیده ماین لرنی اورنتیش ده کوپراق اعتبار قرتکن لر و اولرنینگ بو حرکتی عامه امکانیت لرگه جدی صدمه یتکزیش دن تشقری عادی اهالی تلفات رقمی نی هم آشیرگن.