هرات صراف لري آدم اوغيرلش كوپيگني گه اعتراض بيلديرب ايشتشلش گه قول اورديلر
neshananews
13 October 2020هرات ده بير تنيقلي صراف اوغيرلنگني آرتيدن، بو ولايت صرافلر اويشمه سي ايش دن قول تارتيب صرافليك بازاريده گي برچه ايشلرني توختديلر.
بو صرافلر اونداي بيرحالده ايشدن قول تارتيشكنلر كه اوتكن كيچه( دوشنبه ٢١ ميزان) تورت تانيلمگن قوراللي كيشيلر بيرصراف اوييده كيريب اوني مال و بايليكلريدن بير قسميني اوغيرلب و صراف ني هم نامعلوم جاي گه انتقال بيرگنلر.
بو واقعه هرات شهري مركزيده يوزبيرگن.
بو واقعه گه قرشي هرات صرافلري اعتراض بيلديريب ايشتشلش باشلب امنيتي قوتلر مردم خوفسيزليكي ني تامين لشده كوچسيز ديب ايتماقده لر. هرات صرافلر اويشمه سي ريسي بهاالدين رحيمي، بوندن سونگ هرات ده صرافلرني تهديد و اوغيرلنيشي آقيمي دوام ايتيب باريشي قبول قيلينرلي ايمس ديدي.
رحيمي جنابلريگه كوره جاري شمسي ييل اولي دن حاضرگه قدر اينگ آز سكيز صراف تانيلمگن قوراللي لر تمانيدن اوغيرلنيب و اونلبچه صرافلر تهديدلي پياملر قولگه كيريتكنلر. هرات ولايتي صرافلر اويشمه سي ريسي اگر هرات ده گي جاري خوفسيزليك وضعيت دوام تاپسه هرات ده گي باشقه صنفي اويشمه لر هم بو ناراضليك گه قوشيلديلر ديب آگاهلنتيردي.
هرات پوليسي هم اوتكن كيچه يوز بيرگن بو واقعه ني تصديق لشكن. هرات ولايتي امنيه قوماندانليگي سلطان داود سلطان بو واقعه عيبلوي بيلن نيچه كيشي توتقين ده آلينگن ديب ايتي.
سلطان جنابلري، هرات پوليسي بو آدم اوغيرلش عامللري و حتي اولرني نابود ايتيش ده هيچ بير سعي و حركت دن ايه ميدي ديب ايتي.
اوتكن هفته هم هرات ولايتي ينگي پوليس باشليغي ايش باشله گني مراسميده برچه قوراللي اوغريلر و اختطافچي لرني نشان گه توتيب آتيب اولديريشي دن سوز يورتكندي. هرات ولايتي تورلي منطقه لريده ناقرارليك و ناتينچليك لر كوپيگني بيلن عيني زمانده، قوراللي اوغيرليك و آدم اوغيرلش واقعه لر هم آرتيب بارگن.بو خوفسيزليك واقعه لر اهالي حياتي و آسايشته ليگي ني برهم بيريب و سرمايه چيلرني مملكت دن چيقيب كيتيشيگه سبب بولگن.
