ايران پولي “ريال” قربي خارجي پول لرگه نسبتا” كيسكين پس گه توشكني، بومملكت ني خارجي پوللر خصوصا” دالر قاچاقي مقصديگه ايلنتيرگن. امريكا ني ايران گه قرشي چيكلولري، بو مملكت ده قيينت اقتصادي احوال و خارجي معامله لردن بو مملكت سوداگر لري قولي اوزيلگني سبب بيرقطار هراتليك قاچاقچيلر كوپراق منفعت حاصل قيليش اوچون  ايران گه  دالر قاچاقي گه يوز توتكنلر.

هرات صرافلر اويشمه سي بو وضعيت دوام ايتيب باريشي افغانستان اقتصادي و خارجي پوللر بازاريگه سلبي تاثير قالديريش دن تشويش اظهار ايتكن. هرات ولايتي صرافلر اويشمه سي رييسي بهالدين رحيمي، شو حاضر هركوني اينگ آز بير ميليون دالر تورلي طريقه لر آرقلي ايران گه قاچاق بولماقده ديب ايتكن. رحيمي جنابلري بو وضعيت دوام ايتيب باريشي، مملكت ده دالرگه نسبتا” طلب ني كوپيتيريب و برچه اشيالر نرخي ده هم سلبي تاثير قالديريشي ممكن ديدي.

صرافلرگه كوره قاچاقچي لر هركوني هرات بازاريده موجود بولگن نقد دالرني ترانزيتي و مسافر تاشوچي موترلر ارقلي ايران گه انتقال بيره ديلر؛ بو وضعيت باعث هرات ولايتي صرافليك اويشمه سي بازار وضعيتي وقاچاق الدي الينيشي اچون امنيتي ارگانلر نظارت و كنترولي كوپيشي ني طلب ايتيش گه مجبور قيلگن.

امريكانينگ دالري مملكت بازاريده اشيالر نرخي و خصوصا افغاني قربي كوتاريليشي و پس گه توشيشيده بيواسطه دخلدار بولگن پول دير. هرات ولايتي ايريم صرافلري بو وضعيت دوام ايتيب باريشي دن تشويش اظهار ايتكنلر. هرات صرافلريدن بيري گل احمد عزيزي، هرات دن ايران گه دالر انتقال بيريليشي و اورنيده ريال مملكت ده كيلتيريليشي هرات اقتصادي و كسب و كاريگه جدي صدمه يتكزيشي ني تاكيدلشدي. بو وضعيت دوام ايتيب باريشي ني اقتصاد متخصص و كوزتوچيلريني تشويشي گه سبب بولگن. اقتصاد متخصصي طارق عزيز، دالرني ايران گه قاچاق بوليش اقيمي دوام ايتكنده تقديرده افغانستان مالي تيزيمي ني جدي معما و قيينتچيليك لرگه دچار قيله دي ديدي. اونگه كوره دالرني ايران گه قاچاق بوليشي تاثيري افغاني قربي ني دالر برابريده پسگه توشيره دي ديب اورغولشدي.

هرچند هرات محلي اداره سي هرات دن ايران گه دادر انتقال تاپيشي ني بوتكل رد ايتميدي اما هرات ولايت حاكمي سوزچيسي جيلاني فرهاد، امنيتي قوتلر دالر قاچاقي آلديني آليشي لازم دير ديدي. او جاري خورشيدي ييل اولي دن حاضرگه قدر نيچه كيشي دالرني چيت ده قاچاق قيليش عيبلوي بيلن توتقين ده آلينگن ديدي. اما بو ادعا كورينيشي دن امنيتي قوتلر راپورلري بيلن اونچه ليك تينگ ايمس. هرات ولايتي امنيه قومانداني سوزچيسي عبدالاحد وليزاده ديدي جاري شمسي ييل ده دالر قاچاقي عيبلوي بيلن هيچ شخص توتقين ده الينمگن ديب ايتكن.

حاضرچه بير امريكا دالري نرخي ايران بازاريده قريب ٣٠٠ مينگ ريال يا ٣٠ مينگ تومن معامله بوله دي. ايران پولي سونگي هفته لرده دالر برابريده كوپ پسگه توشكن. هرات بازارلريده هم قريب ٧٧ افغاني و بيرمينگ ايران ليك تومن ٢/٦٠ افغاني ساتيليب آلينه دي.

افغانستان دولتي هرقنچه تيزراق خارجي پوللرني چيگره لر آرقلي قاچاقي آلديني آليش اوچون جدي چاره تدبير قول اوستيده الينيشي كوتيلماقده. اگر دولت تمانيدن بو توغريده ايجابي اديم كوتاريلمسه اقتصادي متخصصلر و صرافلر اويشمه سي گه كوره مردم اقتصادي و مملكت مالي تيزيميده يمان تاثيرات قالديريشي حتمي ديديلر.