هرات ـ قندهار شاه یولیده یوز بیرگن قانلی بیر ترافیکی حادثه ده اینگ آز ۱۱ کیشی اوز جانی نی قولدن بیردی.

هرات محلی رسمیلریگه کوره بو واقعه بوکون ایرته لب ( پنجشنبه ۱۰ میزان) ادرسکن تومنی گه تیگیشلی « کوتل خاکی» منطقه سیده یوزبیرگن. هرات ولایت حاکمی سوزچیسی جیلانی فرهاد بو حادثه ده اینگ آز ۶ کیشی هم یاره لنگن دیب ایتی. فرهاد جنابلریگه کوره هرات ـ  قندهار شاه یولیده مسافر تاشوچی بیر «۴۰۴» بس فلانکوچ توریدن بولگن بیر نقلیه واسطه بیلن قرشی لشکن.

هرات ولایتی ساغلیک نی سقلش مسووللری بو حادثه ده یاره لنگن کیشی لردن ایککی کیشی نی ساغلیک وضعیتی آغیر دیب ایتکن. هرات امبولانس مسوولی ابراهیم محمدی بو حادثه آرتیدن هرات حوزوی کسل خانه سیگه ۱۱ جسد انتقال بیریلگنی نی تصدیق لشدی.

هرات ـ قندهار شاه یولیده سرک خراب لیگی و هیدوچی لر دقت سیزلیگی انده سنده بوندای قانلی حادثه لرگه سبب بولیب کیلگن.بوندن قریب تورت آی آلدین شو شاه یولده یوز بیرگن ترافیکی حادثه ده بیر عایله اعضا سی نینگ ۹ اعضاسی اوز جان لرینی قولدن بیرگندی لر.