ملي مدافعه وزيرليگي، هرات ولايتي زنده جان تومني اوچون طالبان تمانيدن حاكم تعين لنگن ” ابوذر” گه مشهور ملاسلطان اولديريلگني دن خبر بيرگن
مدافعه وزيرليگي بوكون ( يكشنبه ايككينچي جوزا) بير خبرنامه نشر ايتيب طالبان نينگ بو اولسوالي زنده جان تومني ني قلعه ريگ قشلاقي حدوديده اوزلري تيارلشكن ماين پارتلشي نتيجه سيده اولديريلگني ني تاكيدلشكن.
مدافعه وزيرليگي خبرنامه سيده بو پارتلش ده طالبان نينگ باشقه ايككي جنگچي سي اولديريلگني و بيش جنگچي سي ياره لنگني هم قيد ايتيلگن.
مدافعه وزيرليگي خبرنامه سيگه كوره بو واقعه اونداي بير حالده يوز بيرگن كه طالبان جنگچيلري اوزلري تيارلشكن ماين لرني جايلشتيرماقچي ايديلر.
عيني حالده هرات پوليسي بو ولايت نينگ انجيل تومنيده بير بشكه اي ماين ني تاپيب بيكار قيلگني دن خبر بيرگن. هرات پوليسي نشر ايتكن خبرنامه گه كوره دولت نينگ قوراللي مخالف لري بو ماين ني انجيل تومني حدودلريده امنيتي قوتلرني نشان گه توتيش مقصديده جايلشتيرگن ايكن.