هرات ده کانکورسیناوی نتیجه لریگه نسبتاٌ اشتراکچی لریدن یوزلب کیشی نی اعتراض دن سونگ، هرات عالی اوقویورتی بو اشتراکچی لر نتیجه لرینی قیته کوریب چیقیلشی و بو نمره لر اصلاح بولیشی خبر قیلنگن.

هرات عالی اوقویورتی عامه معلومات و علاقه لر بولیمی مسوولی گلاب الدین خپلواک بوکون( یکشنبه ۶ میزان) نشانه خبر آژانسی بیلن صحبت ده دیدی بو قرار مملکت ملی سیناولر کمیته سی دن هرات ولایت حاکم لیگی و هرات عالی اوقویورتی تمانیدن ایزلنگنی دن سونگ آلگن. خپلواک جنابلری علاوه ایتی بو شخص لرنی قیته کوریب چیقلگن نمره لر بو کون سیناولرملی کمیته سی وبسایتی ارقلی نشر ایتیلماقچی.

اوتکن کونی هرات ده کانکور سیناوی نی اوتکزگن قریب اوچ مینگ لبه سیناولر ملی کمیته سی تمانیدن کانکور نتیجه لریده بولگن عدالت سیزلیک گه اعتراض بیلدیردیلر. اعتراضچی لرگه کوره عالی تحصیلات وزیرلیگی تمانیدن اعلان بولگن نمره لرده کیرک لی دقت بولمگن و بو نمره لر قیته کوریب چیقلیشی لازم . بو طلبه لر ادعاسیگه کوره سیناولرنینگ بیرینچی کونیده اشتراک ایتکن هیچ بیر طلبه کامیاب بولمگن و ۲۰۰ بلند نمره آلمگن.

۱۳۹۹ ییلی کانکور سیناوی هرات ده اوچ کون ده اوتکزیلدی. اعتراضچی لر نمره لرینی قیته کوریب چیقیلیب اصلاح بولگندن سونگ طلبه لر قناعت لرینی حاصل قیله آلرمی یا یوق؟

 رسمی معلومات لرگه کوره جاری ییل کانکور سیناویده مملکت نینگ ۳۴ ولایتی ده ۲۱۰ مینگ طلبه اشتراک ایتکندی. بو آره دن ۱۳ مینگ طلبه هرات ولایتی دن قتنشکندی و اوندن قریب ۵۵ فایزی قیز طلبه لر بولگن.